Oloba da wold, pipol wea plenti kantri suz po teke dipren said blo ol politik samting. Lo 2022, wan ripot prom Pew Research Center soe, “moden ap ol pipol prom 19 kantri spik, i gad big o nadakain big paiting insaid kantri blo dempla, bikoz pipol sapot ol dipren politik aidia.”

 Wiswei, yu bin tekenotis pipol wea yu stap, go gense wananada mo ane mo bikoz ol suze dipren said wea politik o gabman samting? Aukam i laidat? I gad eni wei po piksemapem a? Tingbaut wanem Baibol i spik.

 Baibol olredi sabe wea diskaintaim, o “dem lasdei,” plenti pipol go gad pasin wea i stape dempla prom gri lo wananada ane i mata splitemap dempla.

•   “Wea dem lasdei bipo da wold i go pinis, i go gad nadakain tumas trabol. Wea dat taim, ol pipol i go mata tingbaut demplaselp, . . . dempla i go mata tok ol nugudtok gense ol nada pipol.”—2 Timoti 3:1-3.

 Nomata plenti pipol trai mina ad po meke gabman wok prapa, i no apen diskain. Pipol gad ol dipren aidia wad, so ol gense wananada ane i mekem ad po piksemap ol problem tugeda. Wanem yumi luk apen tidei, soe wanem Baibol bin spik bipotaim, i rait.

•   “Man bin bos oba nadaman, wea i erte dempla.”—Iklaziastis 8:9.

 Bat, da Baibol spik da wei po piksemapem—i mata wan gabman, wea i gad lida, uda ken tekemaut ebridem problem wea i meke pipol sapa tidei.

 Da Baibol tokbaut mata wan lida uda i raitwan, bikoz nobodi ken meke wanem em ken mekem: Zizas Kraist. Zizas gad da paua, da rait, ane strong ubi po elpe ebri pipol raun da wold kamwan ane stap tugeda lo pis.

•   “Lo taim blo em, ol rait ane stret pipol go gro strong, ane pis gobi ebriwea.”—Song blo Sam 72:7.

•   “Ane ebri neisin go serbe em.”—Song blo Sam 72:11.

 Zizas i da bes lida bikoz em mina kea baut pipol ane wande elpe dempla, wa, em mina tekenotis demwan uda bin sapa nugud tritment.

•   “I em uda go kam po seibe da poawan uda krai po elp, ane demwan uda ambol ane uda gad nobodi po elpe dempla. Em go pil nadakain sore po ol ambol ane poa pipol, ane laip blo da poaman, em go seibem. Em go kam po seibe demwan prom ol bad pipol uda erte dempla mina rapwei, ane blad blo dempla i mina lo ai blo em.”—Song blo Sam 72:12-14.

 Lan mo baut Kingdom blo God, wea Zizas i lida blo dat gabman antap eben. Paindaut wiskain dis rul blo em i gud po yu, ane wiskain yu ken sapot em.

•   Luk da bidyo Wanem i Kingdom blo God?

•   Rid “God’s Kingdom—A Government With No Corruption.”