KIP LUGAUT!
Ken Pipol blo ol Dipren Kantri ane Kala Skin Trite Wananada Peawei Bambai o i Mata Drim?—Wanem Baibol i Spik?
Mina plenti pipol wande ebribodi po gede pea tritment, nomata wanem kala skin ol gad o kantri ol kam prom, bat i wase drim wea i kan kam tru.
“Racism [o wen pipol tingk ol mobeta o daune pipol prom dipren kantri o kala skin] i wase poizin wea i mina erte olkain pipol ebriwea, ebridei, lo wok o skul o komuniti grup. Racism stil lide pipol po mata soe badpasin ane no trite wananada peawei.”—António Guterres, UN Secretary-General.
Wiswei, i go gad taim wen pipol blo ebri kantri o kala go trite wananada peawei a? Wanem Baibol i spik?
Wiskain God trite pipol prom ol dipren kantri
Da Baibol lane yumi wanem God tingk, baut pipol blo ol dipren kantri o kala skin.
“God i bin meke ol dipren neisin ane i bin kamaut prom wan man, ebri pipol uda i stap wea dis ert.”—Pas Misnare Wok 17:26.
“God i trite ebribodi seimwei. God em i api wea enibodi uda meke raitwei ane wosip em nomata wanem kantri dempla i kam prom.”—Pas Misnare Wok 10:34, 35.
Da Baibol soe yumi dat olgeda pipol blo ebri kala o kantri kam prom mata wan pamlelain ane God labe ebriwan.
Wanem go meke pea tritment apen po ebribodi bambai
Ebri kantriman go prapa sabe pea tritment wen Kingdom blo God i rul, diswan gabman blo em antap eben. Dat gabman go lane pipol da raitwei po trite wananada. Pipol go lan wiskain po tekemaut eni nugud tingking ol karem, bikoz sambodi gad dipren kala skin o kam prom nada ples.
“Demwan uda stap lo da lan go lane ol stret ane raitwei.”—Aizaia 26:9.
“Pis mas kam wen i gad prapa tru raitwei, ane wanem i kamaut prom da prapa tru raitwei gobi kuaiat pis ane i gobi mata seip poeba.”—Aizaia 32:17.
Tidei, plenti milion pipol olredi lan prom Baibol wiskain po trite nadaman wea rispekt and soe gudpasin po dempla.
Po lan mo, rid da Awake! Magazin “Is There a Cure for Prejudice?”
Rid “Talking to Children About Racism” po lan wiskain ol mam ane dad ken tok po pikinini baut diskainting wea aus.