KIP LUGAUT!
Saiens Pipol Seinze da Doomsday Clock Mo Klosap Nau—Wanem Baibol i Spik?
Lo Zanwari 24, 2023, saiens pipol bin seinze da Doomsday Clock a po kam moklostu po 12 midel nait nau. Ol meke dis Klok po make taim wen wold i klosap po pinis.
“Da ‘Doomsday Clock’ i wod ol yuzem po soe ert i mina wea deinza wea pipol mait go waipemaut sun. Ya Tiuzdei, dem saiens pipol bin mube dat taim moklostu po 12 aklok naittaim, wa, i neba bin dis klostu bipo, ane ol seinzem bikoz ol luk woa lo Ukraine, nuclear woa mait apen, ane ert i spoil bikoz i kam mo ot nau.”—AFP International Text Wire.
“Tiuzdei, saiens pipol spik, dat ‘Doomsday Clock’ kese 90 sekan bipo 12 aklok midel nait—pipol neba bin dis klostu po amagedon bipo.”—ABC News.
“Saiens pipol prom oloba da wold wone, laip kan kipgo diskainwei bikoz ol luk pipol redi po distroi demplaselp, moden eba.”—The Guardian.
Wiswei, ert ane laip blo ol pipol i redi po pinis a? Yu tingk yumi nid po prait baut wanem mait apen bambai? Wanem Baibol i spik?
Wanem yumi ken lukpowad po
Da Baibol i spik, “da ert i mata stap poeba” ane pipol “go stap ya poeba.” (Iklaziastis 1:4; Song blo Sam 37:29) So, man kan distroi da ert o mekem nugud sole laip kan stap ya.
Bat, da Baibol spikbaut taim wen end go kam. Wase wen i spik, “dis wold . . . i klosap pinis.”—1 Zon 2:17.
Po paindaut wanem Baibol i min wen i tokbaut end blo wold, rid “Is the World Coming to an End? What Is the Apocalypse?”
Po lan wanem Baibol i spik baut sam diprenting dat go apen wea wold sun, rid When Will the World End?”
Tingk stret ane pilgud
Da Baibol ken elpe yumi po tingk stret ane pilgud, nomata dem problem wi luk raun da wold. Aukam?
Da Baibol gibe yumi adbais po elpe yumi wea laip ebridei. (2 Timoti 3:16, 17) Po gede demkain adbais, rid “How to Control Worry” po luk wiskain da Baibol ken elpe yu po tingk stret ane no wori tumas, nomata laip i gad plenti problem.
Da Baibol promis ol nais samting yumi ken lukpowad po, wea yumi ken prapa bilibem. (Rom 15:4) I eksplein kliawan baut wanem i apen ya nau, ane wanem go apen bambai, so yumi ken stap strong nomata wanem i prant lo yumi tidei.
Sole yu ken lane mo prom Baibol, mipla wande yu po trai dem pri Baibol stadi lesen wi gad.
a “Da Doomsday Clock i wod saiens pipol i yuzem po wone pipol baut wiskain yumpla kam klostu po distroi wold wea dem nugudting man i mekem. I wei po elpe yumi tingbaut dem deinza raun mipla ane wiskain wi mas seinz, sole laip nogo pinis.”—Bulletin of the Atomic Scientists.