PERGUNTA HUSI JOVEN SIRA
Saida mak bele ajuda haʼu atu la sai kole demais?
Dala ruma, Ita sente kole demais toʼo lakon forsa hotu ka lae? Se nuneʼe, informasaun neʼe bele ajuda Ita!
Tanbasá neʼe akontese
Atividade barak demais. Feto joven ida naran Julie hatete: “Dala barak ema sempre husu ita atu halo buat neʼebé diʼak liu, kontinua hadiʼa ita-nia an, iha mehi neʼebé aas no kumpre buat barak liután. Haʼu sente kole tanba simu presaun beibeik!”
Teknolojia. Ho telemovel, tablet, no sasán eletróniku seluk, ita sempre ativu no prontu ba oras 24 loroloron. Neʼe bele duni halo estrese no ikusmai sai kole demais.
Ladún toba diʼak. Feto joven naran Miranda hatete: “Tanba okupadu demais ho eskola, serbisu no atividade halimar nian, joven barak hadeer sedu no toba tarde. No toman neʼe la diʼak. Se ita toba tarde, neʼe halo ita kole lalais.”
Tanbasá neʼe sériu
Bíblia gaba ema neʼebé badinas. (Provérbios 6:6-8; Roma 12:11) Maibé Bíblia mós hanorin ita atu balansu kona-ba serbisu no hanoin mós ita-nia saúde.
“Uluk, haʼu okupadu ho serbisu barak toʼo haʼu haluha atu han no la han loron tomak. Haʼu aprende katak labele simu knaar neʼebé haʼu labele halo. Haʼu tenke hanoin kona-ba haʼu-nia saúde.”—Ashley.
Bíblia hatete: “Asu neʼebé moris mak diʼak liu fali leaun neʼebé mate ona.” (Eclesiastes 9:4) Obriga Ita-nia an atu halo buat oioin karik halo Ita sente iha forsa boot hanesan leaun ba tempu balu. Maibé ikusmai Ita sei sai kole demais no lori konsekuénsia aat ba Ita-nia saúde.
Buat neʼebé Ita bele halo
Aprende atu dehan lae. Bíblia hatete: “Matenek sei hamutuk ho ema neʼebé haraik an.” (Provérbios 11:2) Ema neʼebé matenek hatene sira-nia limitasaun no la simu buat neʼebé liu fali sira-nia kbiit.
“Ema neʼebé iha posibilidade boot atu sai kole demais toʼo lakon forsa hotu mak ema neʼebé labele dehan lae, ema neʼebé koko atu simu knaar hotu neʼebé ema seluk oferese ba nia. Neʼe laʼós hahalok modestu. Ikusmai ita sei sai kole demais toʼo lakon forsa hotu.”—Jordan.
Toba diʼak. Bíblia hatete: “Diʼak liu deskansa uitoan duké serbisu makaʼas demais, tanba neʼe hanesan duni tuir anin.” (Eclesiastes 4:6) Toba mak hanesan “hahán ba kakutak”. Loloos, joven sira presiza toba ba oras ualu toʼo oras sanulu kalan-kalan. Maibé, joven barak la halo ida-neʼe.
“Bainhira haʼu okupadu tebetebes, haʼu ladún toba. Maibé loloos, haʼu presiza toba diʼak atu bele serbisu ho badinas no kontente iha loron tuirmai.”—Brooklyn.
Organizadu. Bíblia hatete: “Ema badinas nia planu sei hetan duni susesu.” (Provérbios 21:5) Aprende atu maneja Ita-nia tempu no atividade mak matenek ida neʼebé sei ajuda Ita iha moris tomak.
“Hodi halo oráriu, neʼe bele ajuda hamenus estrese. Se ita bele haree ho didiʼak ita-nia oráriu, fasil ba ita atu haree mudansa saida mak ita bele halo atu la sai kole demais.”—Vanessa.