Ita presiza kontinua tau matan didiʼak ba ita-nia sasán sira neʼebé iha folin-boot hanesan, uma ka karreta. Ita mós presiza tau matan didiʼak ba ita-nia relasaun diʼak ho Maromak. Saida mak Ita presiza halo atu bele kontinua iha relasaun metin ho Jeová depois hetan tiha batizmu?

Iha informasaun neʼe

•  Kontinua estuda Maromak nia Liafuan

•  Kontinua halo orasaun ba Jeová

•  Kontinua haklaken ba ema

•  Kontinua tuir reuniaun

 Eskritura: “Kontinua fó fuan iha serbisu diʼak hotu no aumenta imi-nia koñesimentu neʼebé loos kona-ba Maromak.”—Koloso 1:10.

 Signifikadu: Depois hetan tiha batizmu, Ita sei presiza kontinua lee Bíblia no hanoin kleʼan kona-ba buat neʼebé Ita aprende.—Salmo 25:4; 119:97.

 Susar neʼebé bele mosu: Dala ruma, Ita ladún iha hakarak atu estuda. Karik Ita hanoin kedas katak Ita ladún matenek atu estuda.

 Buat neʼebé Ita bele halo: Aprende liután kona-ba Bíblia nia tópiku neʼebé Ita gosta. Halo Ita-nia programa estuda rasik. Halo oráriu neʼebé fasil ba Ita rasik atu halo tuir. Hanoin-hetan bá, Ita estuda Bíblia ho objetivu atu hadomi liután Jeová no mós Ninia Liafuan. Se Ita halo nuneʼe, Ita bele hetan benefísiu husi Ita-nia estuda no mós sente kontente atu estuda.—Salmo 16:11.

 Sujestaun: Atu bele hetan benefísiu liután husi Ita-nia estuda Bíblia, buka fatin estuda neʼebé hakmatek hodi nuneʼe ema seluk labele atrapalla Ita.

 Presiza informasaun liután?

•   Lee:

   “Oinsá mak Bíblia bele ajuda haʼu?—Parte 2: Dalan atu lee Bíblia ho kontente”

   “Oinsá haʼu bele aprende atu tau fokus?”

•   Nonton:

   Ita-nia kolega hanoin saida—Lee Bíblia

•   Download:

   “Programa atu lee Bíblia”

 Eskritura: “Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan no mós fó agradese.”—Filipe 4:6.

 Signifikadu: Komunika ho Maromak signifika nia koʼalia mai Ita no Ita koʼalia ba nia: Ita rona ba nia bainhira Ita lee ninia Liafuan; Ita koʼalia ba nia bainhira Ita halo orasaun. Bainhira Ita halo orasaun, Ita bele husu Maromak nia ajuda no mós hatoʼo agradese ba nia kona-ba bensaun neʼebé nia haraik ona mai Ita.

 Susar neʼebé bele mosu: Dala ruma, karik Ita sente katak Ita temi beibeik buat neʼebé hanesan iha Ita-nia orasaun no Ita-nia orasaun ladún mai husi laran. Karik Ita mós duvida se Jeová rona duni Ita-nia orasaun ka hakarak rona ba Ita.—Salmo 10:1.

 Buat neʼebé Ita bele halo: Loroloron, hanoin kona-ba buat sira neʼebé Ita bele temi iha orasaun. Se Ita-nia situasaun la permite atu halo kedas orasaun neʼebé naruk, halo planu atu halo ida-neʼe iha tempu seluk iha loron neʼe kedas. Keta hanoin deʼit kona-ba Ita rasik nia presiza, maibé hanoin mós kona-ba ema seluk nia presiza.—Filipe 2:4.

 Sujestaun: Se Ita sente katak Ita sempre temi beibeik buat neʼebé hanesan iha Ita-nia orasaun, fó sai ida-neʼe ba Jeová liuhusi orasaun. Nia hakarak rona problema hotu neʼebé Ita konta ba nia, inklui buat neʼebé liga ho Ita-nia orasaun.—1 João 5:14.

 Presiza informasaun liután?

•   Lee:

   “Tanbasá haʼu presiza halo orasaun?”

•   Download:

   “Cara agar Doamu Semakin Bermakna”

 Eskritura: “Kontinua hanoin didiʼak ó-nia an no ó-nia hanorin. . . . Hodi halo nuneʼe mak ó sei salva ó-nia an rasik no mós ema sira neʼebé rona ó.”—1 Timóteo 4:16.

 Signifikadu: Kuandu Ita fó sai ba ema seluk buat neʼebé Ita aprende husi Bíblia, neʼe mós bele hametin liután Ita-nia fiar. Rezultadu mak se sira rona, Ita bele salva sira-nia moris, no Ita rasik nia moris.

 Susar neʼebé bele mosu: Dala ruma Ita sente baruk atu fó sai kona-ba Ita-nia fiar. Karik Ita sente taʼuk atu halo ida-neʼe, liuliu iha eskola.

 Buat neʼebé Ita bele halo: Apóstolu Paulo hakerek: “Maibé se haʼu fó sai liafuan diʼak ho laran-todan, haʼu halo nafatin serbisu neʼe tanba Naʼi fó ona mai haʼu.” (1 Korinto 9:16, 17) Halo desizaun metin atu la husik sentimentu negativu hanesan taʼuk domina Ita-nia desizaun.

 Sujestaun: Ho Ita-nia inan-aman nia lisensa, husu ajuda husi Testemuña ida neʼebé sai nuʼudar ezemplu diʼak no bele ajuda Ita atu sai matenek liután iha serbisu haklaken.—Provérbios 27:17.

 Presiza informasaun liután?

•   Lee:

   “Mengapa Aku Takut Berbicara tentang Imanku?”

 Eskritura: “Mai ita hanoin malu hodi fó laran-manas ba malu atu hatudu domin no hahalok diʼak, no maski ema balu sai toman ona atu la halibur hamutuk, maibé imi keta haluha atu halibur hamutuk.”—Ebreu 10:24, 25.

 Signifikadu: Razaun prinsipál tanbasá Ita bá reuniaun mak atu adora Jeová. Maibé Ita mós bele hetan benefísiu rua bainhira Ita tuir reuniaun. Primeiru, Ita bele hetan anima husi maluk Testemuña seluk. Segundu, Ita bele fó anima ba ema seluk kuandu Ita tuir reuniaun no fó komentáriu.—Roma 1:11, 12.

 Susar neʼebé bele mosu: Dala ruma durante reuniaun, karik Ita komesa hanoin kona-ba buat seluk. Rezultadu mak karik Ita la tau atensaun ba lisaun importante neʼebé oradór hatoʼo daudaun. Ka karik Ita la tuir reuniaun hotu. Karik Ita okupadu liu ho atividade seluk, hanesan halo TPC toʼo Ita la buka tempu atu tuir reuniaun.

 Buat neʼebé Ita bele halo: Klaru katak Ita presiza duni halo Ita-nia TPC. Maibé hakaʼas an atu sempre tuir reuniaun hodi nuneʼe bele aprende buat barak. Hola parte iha reuniaun liuhusi hiʼit liman atu fó komentáriu. Depois reuniaun remata, gaba irmaun ka irmán ida nia komentáriu ka sira-nia parte.

 Sujestaun: Prepara uluk antes bá reuniaun. Download aplikasaun JW Library®, no loke parte “Perhimpunan” atu hatene tópiku ba reuniaun ida-idak.

 Presiza informasaun liután?

•   Lee:

   “Mengapa Harus Berhimpun?”