Desportu bele fó benefísiu no mós bele lori perigu mai ita. Neʼe depende ba desportu neʼebé ita halo, oinsá ita halo ida-neʼe, no ita gasta tempu hira ba desportu neʼe.

•  Benefísiu husi desportu mak saida?

•  Perigu husi desportu mak saida?

•  Ita-nia kolega hanoin saida

 Halo desportu bele ajuda ita atu iha saúde neʼebé diʼak. Bíblia dehan katak “halo ezersísiu lori buat diʼak”. (1 Timóteo 4:8, nota-rodapé) Mane joven ida naran Ryan hatete katak, “halo desportu mak dalan diʼak atu ita bele book an. Neʼe diʼak liu fali duké tuur deʼit iha uma no halimar game.”

 Halo desportu bele treinu ita atu serbisu hamutuk no dixiplina an. Bíblia konta ilustrasaun kona-ba desportu ida atu hanorin pontu importante ba ita. Bíblia dehan: “Sira neʼebé halai-taru, sira hotu halai atu manán, maibé ida deʼit mak simu prémiu.” Neʼe mós dehan: “Ema hotu neʼebé hola parte iha kompetisaun, sira kontrola an iha buat hotu.” (1 Korinto 9:24, 25) Pontu mak, ita tenke kontrola an no apoia malu hodi bele halo tuir regra iha desportu. Feto joven ida naran Abigail konkorda ho ida-neʼe hodi dehan: “Halo desportu hanorin haʼu oinsá atu serbisu hamutuk no komunika ho ema seluk.”

 Halo desportu ajuda ita iha belun sira. Baibain desportu halo ema halibur hamutuk. Mane joven ida naran Jordan hatete katak “besik desportu hotu mak atu kompete malu, maibé se ita halo desportu atu sente kontente, neʼe mak dalan diʼak atu ransu ho ita-nia belun sira.”

 Desportu neʼebé ita halo. Bíblia dehan: “Jeová haree didiʼak ba ema laran-loos no mós ba ema laran-aat; nia odi ema hotu neʼebé gosta violénsia.”​—Salmo 11:5.

 Iha desportu balu neʼebé hatudu duni violénsia. Porezemplu, feto joven ida naran Lauren hatete: “Desportu hanesan boxing, ninia objetivu mak atu baku malu. Nuʼudar ema Kristaun ita lakohi duni baku malu. Entaun tanbasá mak ita hakarak bá haree ema seluk baku malu?”

 Hanoin toʼok: Karik ita buka razaun ruma atu halo ka haree desportu balu neʼebé iha hahalok violénsia. Karik ita hanoin haʼu sei la halo violénsia. Se nuneʼe, hanoin-hetan Salmo 11:5 neʼebé dehan katak Jeová “odi ema hotu neʼebé gosta violénsia,” laʼós deʼit ema neʼebé halo hahalok violénsia.

 Oinsá ita halo ida-neʼe. Bíblia dehan: “Keta halo buat ida hodi buka atu manán deʼit ka foti an, maibé ho haraik an hodi haree ema seluk boot liu fali imi.”​—Filipe 2:3.

 Klaru katak, bainhira ekipa rua hasoru malu sira kompete malu. Maibé se ita hakarak atu manán deʼit kuandu halimar, ita sei la sente kontente. Mane joven ida naran Brian hatete katak “sentimentu hakarak manán deʼit bele sai importante liu ba ita.” Nia dehan tan: “Se ita mak jogadór neʼebé diʼak, neʼe katak ita mós presiza hakaʼas an hodi nafatin haraik an.”

 Hanoin toʼok: Mane joven ida naran Chris konta: “Semana-semana ami joga bola hamutuk, no dala ruma kolega balu hetan kanek.” Entaun husu ba ita-nia an, ‘Tanba razaun saida mak ema balu hetan kanek? Saida mak haʼu bele halo atu prevene situasaun hanesan neʼe?’

 Tempu hira mak ita gasta. Bíblia dehan: “Buka-hatene loloos buat sira neʼebé importante liu.”​—Filipe 1:10.

 Ita presiza deside atividade saida mak importante ba ita. Atividade espirituál nian tenke sai buat neʼebé importante liu. Desportu sira bele han oras barak, maski ita mak halo desportu ka haree deʼit. Feto joven ida naran Daria hatete: “Uluk haʼu sempre istori malu ho haʼu-nia amá tanba haʼu gasta oras barak atu nonton desportu iha televizaun, tanba tuir loos haʼu bele uza tempu neʼe atu halo atividade seluk neʼebé importante.”

 Hanoin toʼok: Bainhira ita-nia inan-aman fó konsellu ba ita kona-ba saida mak importante liu, ita rona ka lae? Feto joven ida naran Trina hatete: “Bainhira haʼu ho haʼu-nia maun alin sira nonton desportu no la halo serbisu importante sira iha uma laran, haʼu-nia amá sempre fó-hanoin mai ami katak jogadór sira-neʼe nafatin simu osan maski ami nonton ka la nonton. No nia husu ami, ‘Entaun sé mak sei selu imi?’ Buat neʼebé amá hakarak dehan mak: Jogadór sira-nia serbisu mak neʼe. Maibé se ami baruk halo ami-nia TPC no serbisu seluk neʼebé importante, ami labele tau matan ba ami-nia an iha futuru. Loos, amá hakarak fó-hatene ami katak haree ka halimar desportu labele sai buat neʼebé importante liu iha ami-nia moris.”