“Tinan balu liubá, haʼu laran-taridu tebes toʼo sente katak haʼu luta hela deʼit ho haʼu-nia an loroloron. Durante tempu neʼebá, haʼu hanoin kona-ba oho an. Haʼu ladún hakarak atu mate. Haʼu hakarak deʼit atu hapara terus neʼe.”—Jonathan, tinan 17.

 Iha peskiza ida ho alunu iha eskola sekundária maizumenus naʼin-14.000, besik porsentu 20 dehan katak sira hanoin sériu atu oho an iha fulan 12 nia laran. a Se Ita sente lakohi moris tan, saida mak Ita bele halo?

•   Hein. Deside katak Ita sei la halo buat ruma kedas tuir Ita-nia sentimentu. Maski Ita-nia problema haree hanesan boot liu fali Ita-nia kbiit, maibé iha opsaun oioin neʼebé bele ajuda Ita atu hasoru problema sira-neʼe.

 Karik Ita sente katak la iha solusaun ba Ita-nia problema. Maibé tan deʼit Ita sente buat ruma, neʼe la dehan katak Ita-nia hanoin mak loos. Iha duni dalan oioin atu hasoru Ita-nia situasaun. Hodi simu ajuda neʼebé loos, karik Ita bele hetan solusaun lalais liu fali buat neʼebé Ita imajina.

•  Bíblia nia prinsípiu: “Ami hetan terus makaʼas oioin husi sorin-sorin, maibé ami bele book an. Ami la hatene atu halo saida, maibé neʼe laʼós katak la iha dalan atu sai.”—2 Korinto 4:8.

   Sujestaun: Se Ita-nia hanoin atu oho an sai makaʼas ka mosu beibeik iha Ita-nia neon, hanoin toʼok ajuda saida deʼit mak Ita bele hetan. Karik Ita bele hetan ajuda husi ospitál ka husi ema neʼebé serbisu atu fó konsola ba sira neʼebé hakarak oho an. Sira simu ona treinu atu ajuda, no sira hakarak tebes atu ajuda Ita.

•   Koʼalia ba ema ruma. Iha duni ema neʼebé hanoin Ita no hakarak ajuda Ita. Karik neʼe inklui belun no família neʼebé seidauk hatene katak ita iha daudaun susar laran.

 Ema balu presiza uza ókulu atu ajuda sira bele haree moos. Belun mós bele ajuda Ita atu hanoin ho klaru kona-ba Ita-nia problema no hametin fali Ita-nia hakarak atu moris.

•  Bíblia nia prinsípiu: “Belun neʼebé loos . . . sai hanesan maun ka alin ida iha tempu susar.”—Provérbios 17:17.

   Sujestaun: Atu hahú koʼalia hamutuk, Ita bele dehan: “Ba tempu balu, haʼu hanoin hela kona-ba buat neʼebé negativu tebes. Haʼu bele koʼalia ba Ita kona-ba neʼe ka lae?” Ka bele mós dehan: “Haʼu iha problema neʼebé karik haʼu labele rezolve mesak. Ita bele ajuda haʼu ka lae?”

•   Konsulta ho doutór. Problema saúde hanesan laran-taridu ka depresaun bele halo ema lakohi moris tan. Maibé kondisaun hanesan neʼe bele sai diʼak fali hodi simu tratamentu.

 Hanesan gripe bele halakon ema nia vontade atu han, depresaun bele halakon Ita-nia hakarak atu moris. Maibé, moras sira-neʼe bele sai diʼak kuandu hetan tratamentu.

•  Bíblia nia prinsípiu: “Ema neʼebé isin-diʼak la presiza doutór, maibé ema moras presiza.”—Mateus 9:12.

   Sujestaun: Tau matan Ita-nia saúde hodi toba diʼak, halo ezersísiu, no han hahán neʼebé diʼak ba saúde. Ita-nia saúde fíziku nian bele afeta Ita-nia emosaun.

•   Halo orasaun. Bíblia dehan katak ita-nia Kriadór “mak boot liu fali ita-nia laran no hatene buat hotu”. (1 João 3:20) Diʼak atu halo orasaun ba nia agora kedas. Uza Maromak nia naran Jeová, no koʼalia nakloke ba nia hodi fó sai Ita-nia sentimentu.

 Iha duni problema balu neʼebé susar demais ba Ita atu rezolve rasik. Ita-nia Kriadór Jeová prontu atu ajuda Ita.

•  Bíblia nia prinsípiu: “Husu ajuda husi Maromak liuhusi orasaun; no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin.”—Filipe 4:6, 7.

   Sujestaun: Nuʼudar Ita fó sai Ita-nia problema ba Jeová, koko atu hanoin pelumenus kona-ba buat diʼak ida neʼebé Ita bele fó agradese ba nia ohin. (Koloso 3:15) Kuandu Ita fó agradese, neʼe bele ajuda Ita atu iha hanoin pozitivu kona-ba Ita-nia moris.

 Se Ita sente katak Ita labele duni kontinua moris, simu ajuda. Jonathan neʼebé temi iha leten halo nuneʼe. Nia dehan: “Haʼu presiza koʼalia beibeik ho inan-aman no hetan tratamentu médiku. Maibé agora haʼu sente diʼak liu duké uluk. Maski dala ruma haʼu triste, maibé haʼu la sente ona hakarak atu oho an.”