PERGUNTA HUSI JOVEN SIRA
Tanbasá haʼu-nia inan-aman la husik haʼu atu goza moris?
Ita-nia belun sira konvida Ita atu tuir festa iha findesemana. Ita husu Ita-nia inan-aman se Ita bele ba ka lae, maibé sira hatán kedas “Lae”. Ita la hakfodak tanba dala ikus neʼebé Ita husu lisensa, sira mós hatán hanesan neʼe.
Iha informasaun neʼe
Tanbasá mak haʼu-nia inan-aman sempre dehan lae?
Haree hanesan Ita-nia inan-aman sempre dehan lae kuandu Ita husu lisensa husi sira. Karik neʼe mós halo Ita hanoin katak sira lakohi Ita atu goza moris.
Feto joven ida naran Marie sente hanesan neʼe bainhira nia foin iha telefone ba dala primeiru. Nia hatete: “Haʼu-nia apá halo regra barak tebes kona-ba aplikasaun saida deʼit mak haʼu bele download, haʼu bele komunika ho sé, no tempu hira mak haʼu bele koʼalia ho sira. Maibé haʼu-nia kolega fali bele halo buat naran deʼit neʼebé sira hakarak!”
Hanoin toʼok: Marie nia apá koko duni atu hapara nia goza moris ka lae? Saida mak karik halo ninia apá hanoin barak?
Iha regra kona-ba karreta nia velosidade no neʼe tau limitasaun ba Ita-nia liberdade, maibé neʼe bele proteje Ita husi perigu sira, nuneʼe mós ho inan-aman nia regra sira
Koko toʼok: Imajina katak Ita mak inan-aman ida, no Ita iha oan joven ida neʼebé foin iha telefone. Saida deʼit mak sei halo Ita hanoin barak? Ita sei halo regra saida atu bele proteje Ita-nia oan? Saida mak Ita sei hatete se Ita-nia oan joven dehan katak Ita lakohi nia atu goza moris?
“Haʼu-nia apá sempre hatete: ‘Koko hanoin toʼok se ó mak inan-aman ida.’ Hodi halo nuneʼe ajuda haʼu atu haree benefísiu husi ninia regra no mós ninia razaun sira. Se haʼu iha oan, haʼu mós hakarak sira halo tuir regra neʼebé haʼu-nia apá fó mai haʼu.”—Tanya.
Oinsá mak haʼu bele halo haʼu-nia inan-aman atu dehan bele?
“Hakilar sei la lori rezultadu diʼak ruma, Ita no Ita-nia inan-aman sei sente kole deʼit. Se Ita haksesuk malu ho Ita-nia inan-aman, sira sei haree Ita hanesan labarik kiʼik no sira sei la fó liberdade ba Ita.”—Richard.
“Haʼu-nia inan-aman sempre iha razaun diʼak ba regra ida-idak neʼebé sira halo. Haʼu-nia inan-aman la koko atu halakon haʼu-nia kontente, sira só hakarak haʼu hetan kontente neʼebé loos, katak kontente neʼebé la lori problema ba haʼu-nia moris.”—Ivy.
Bíblia nia prinsípiu: “Ema neʼebé beik fakar sai ninia sentimentu hotu, maibé ema neʼebé matenek kontrola ninia sentimentu no kalma nafatin.”—Provérbios 29:11.
“Haʼu koko kontra subasubar regra neʼebé haʼu-nia apá halo kona-ba uza telefone. Haʼu buka dalan atu bele mensajen haʼu-nia kolega sira iha kalan-boot ka download aplikasaun sira neʼebé haʼu-nia apá bandu. Ikusmai, nia sempre kaer toman haʼu, no nia fó regra neʼebé makaʼas liután ba haʼu tanba nia labele fiar haʼu. Koko atu kontra regra mak laʼós hahalok neʼebé matenek.”—Marie.
“Hatudu pasiénsia. Karik presiza tempu atu Ita-nia inan-aman halo mudansa ba regra ida, maibé se sira haree katak Ita halo tuir regra oioin neʼebé sira fó, karik sira sei fó Ita liberdade barak liután.”—Melinda.
Bíblia nia prinsípiu: “Halo tuir imi-nia inan-aman iha buat hotu.”—Koloso 3:20.
“Ita sei la halo situasaun sai diʼak ka hetan buat neʼebé Ita hakarak, se Ita obriga sira atu husik Ita halo buat neʼebé Ita hakarak.”—Natalie.
“Inan-aman hakarak haree katak Ita bele halo desizaun diʼak. Entaun bainhira koʼalia ho inan-aman, haʼu koko uza lójiku duké emosaun atu fó sai haʼu-nia hanoin. Bainhira haʼu halo nuneʼe, haʼu hetan susesu.”—Joseph.
Bíblia nia prinsípiu: “Hatudu respeitu ba imi-nia inan-aman.”—Éfeso 6:2.
Karik Ita sei gosta
PERGUNTA HUSI JOVEN SIRA
Oinsá haʼu bele koʼalia ho haʼu-nia inan-aman kona-ba regra neʼebé sira halo?
Aprende oinsá atu bele koʼalia ho respeitu ba Ita-nia inan-aman no haree rezultadu diʼak saida mak Ita bele hetan.
ISTÓRIA HUSI PINTÓR
Oinsá haʼu bele hetan liberdade liután?
Ita lakohi Ita-nia inan-aman atu haree Ita hanesan labarik kiʼik nafatin. Saida mak Ita bele halo atu inan-aman bele tau fiar liután ba Ita?
ITA-NIA KOLEGA HANOIN SAIDA
Oinsá haʼu bele koʼalia ho haʼu-nia inan-aman?
Ita bele hetan benefísiu barak liután bainhira koʼalia ho Ita-nia inan-aman.
PERGUNTA HUSI JOVEN SIRA
Saida mak haʼu bele halo atu haʼu-nia inan-aman tau fiar mai haʼu?
Hakat tolu neʼebé bele ajuda ita hetan liberdade liután.
