Bíblia dehan katak “Jeová sei la hanetik buat diʼak ida ba sira neʼebé laʼo ho laran-metin”. (Salmo 84:11) Liafuan “laʼo ho laran-metin” katak sá? Neʼe katak moris tuir promesa neʼebé Ita halo ona ba Jeová bainhira dedika Ita-nia moris ba nia. (Eclesiastes 5:4, 5) Oinsá mak Ita bele kontinua laran-metin ba Jeová depois hetan tiha batizmu?

Iha informasaun neʼe

•  Kontinua tahan hasoru problema

•  Kontinua hakaʼas an atu la monu ba tentasaun

•  Kontinua serbí Jeová ho laran-manas

 Eskritura: “Ita tenke tama ba Maromak nia Ukun liuhusi susar barak.”—Apóstolu 14:22.

 Signifikadu: Realidade mak ema Kristaun hotu sei hasoru problema iha sira-nia moris. Problema balu mak hanesan ema goza ka kontra tanba Ita mak ema Kristaun. Iha mós problema seluk neʼebé akontese ba ema hotu, hanesan problema ekonomia ka moras.

 Susar neʼebé bele mosu: Dala ruma, Ita-nia situasaun moris bele troka iha dalan neʼebé Ita la gosta. Bíblia dehan katak buat neʼebé aat bele akontese ba ema hotu.—Eclesiastes 9:11.

 Buat neʼebé Ita bele halo: Tanba hatene katak Ita sei hasoru problema oioin, Ita bele prepara an agora. Haree problema sira nuʼudar oportunidade atu hametin Ita-nia fiar no sadere liután ba Jeová. (Tiago 1:2, 3) Ikusmai, Ita bele sente hanesan apóstolu Paulo neʼebé dehan: “Iha situasaun hotu haʼu hetan forsa liuhusi nia neʼebé fó kbiit mai haʼu.”—Filipe 4:13.

 Sujestaun: Aprende kona-ba José. Ita bele lee ninia istória iha Génesis kapítulu 37 no 39 toʼo 41. Hanoin pergunta tuirmai: Susar saida mak akontese ba José derrepente deʼit, no oinsá mak nia tahan hasoru susar sira-neʼe? Oinsá mak Jeová ajuda José?

 Presiza informasaun liután?

•   Lee:

   “Oinsá mak haʼu bele tahan laran-triste bainhira hasoru situasaun susar?”

   “Haʼu bele tahan bainhira hasoru susar ka lae?”

   “Hatoman an ho situasaun foun”

•   Download:

   “Jika Orang Tuaku Sakit”

 Eskritura: “Ema ida-idak hetan koko liuhusi ninia hakarak rasik neʼebé dada nia no tenta nia.”—Tiago 1:14.

 Signifikadu: Dala ruma, ita hotu hetan tentasaun husi ita-nia an rasik. Se ita la kontrola ita-nia hakarak, ita bele monu ba sala.

 Susar neʼebé bele mosu: Maski hetan ona batizmu, Ita nafatin iha “hakarak neʼebé sala”. (2 Pedro 2:18) Karik Ita mós hasoru tentasaun atu halo relasaun seksuál antes kaben.

 Buat neʼebé Ita bele halo: Foti desizaun agora antes Ita hetan tentasaun, hodi nuneʼe Ita la husik Ita-nia hakarak rasik book Ita atu foti desizaun neʼebé sala. Hanoin-hetan Jesus nia liafuan neʼebé dehan: “La iha ema ida mak bele sai atan ba patraun naʼin-rua.” (Mateus 6:24) Ita bele hili sé mak Ita-nia patraun. Diʼak liu hili Jeová. Maski Ita-nia hakarak neʼebé sala mak makaʼas, maibé Ita bele kontrola ida-neʼe.—Galásia 5:16.

 Sujestaun: Buka-hatene Ita-nia hahalok diʼak no Ita-nia fraku. Ransu ho kolega sira neʼebé ajuda Ita atu haburas hahalok diʼak. Hadook an husi ema, fatin, no situasaun neʼebé halo susar ba Ita atu halo buat neʼebé loos.—Salmo 26:4, 5.

 Presiza informasaun liután?

•   Lee:

   “Oinsá mak haʼu bele hadook an husi tentasaun?”

   “Bagaimana Supaya Aku Tidak Terus-terusan Memikirkan Seks?”

   “Oinsá atu tahan hasoru susar husi kolega”

   “Ita halo Jeová nia hanoin sai Ita-nian ka lae?”

 Eskritura: “Hatudu badinas hanesan uluk . . . toʼo rohan, atu nuneʼe imi labele sai baruk.”—Ebreu 6:11, 12.

 Signifikadu: Ema neʼebé la fokus ba ninia serbisu bele sai baruk lalais deʼit.

 Susar neʼebé bele mosu: Karik Ita sente laran-manas tebes kuandu hetan batizmu, no Ita-nia laran nakonu ho domin ba Jeová. Maibé liutiha tempu balu, karik Ita sente susar atu kontinua halo tuir Jeová iha buat hotu, no neʼe bele halo Ita laran-kraik no hamenus Ita-nia laran-manas.—Galásia 5:7.

 Buat neʼebé Ita bele halo: Kontinua halo buat neʼebé loos maski dala ruma Ita ladún iha hakarak atu halo nuneʼe. (1 Korinto 9:27) Iha tempu hanesan, hakbesik ba Aman Jeová hodi aprende liután kona-ba nia no koʼalia beibeik ba nia liuhusi orasaun. No mós, kontinua hametin Ita-nia relasaun ho belun sira neʼebé hadomi no serbí Jeová.

 Sujestaun: Hanoin-hetan katak Jeová hadomi tebes Ita no prontu atu ajuda Ita. Labele hanoin katak Jeová la gosta Ita se Ita ladún laran-manas ba tempu balu. Bíblia dehan: “Nia fó kbiit ba ema neʼebé kole no fó forsa boot ba sira neʼebé fraku.” (Isaias 40:29) Jeová sei haraik bensaun ba Ita-nia hakaʼas an atu sai laran-manas fali.

 Presiza informasaun liután?

•   Lee:

   “Joven sira ‘kontinua hakaʼas an atu hetan imi-nia salvasaun’”

   “Bagaimana Beribadat kepada Allah Bisa Menyenangkan?”

•   Nonton:

   Ita-nia kolega hanoin saida—Moris neʼebé diʼak liu hotu

 Konkluzaun: Se Ita kontinua laran-metin, Ita halo Jeová nia laran kontente! (Provérbios 27:11) Nia sei kontente tanba Ita foti desizaun atu apoia nia, no nia sei fó Ita buat hotu neʼebé Ita presiza atu kontra Satanás.