PERGUNTA HUSI JOVEN SIRA

Oinsá mak haʼu bele kontrola haʼu-nia emosaun?

LOKE

“Loron neʼe haʼu sente kontente loos, no loron tuirmai haʼu sente triste tebetebes. Buat neʼebé horiseik haʼu haree nuʼudar buat kiʼik deʼit, loron neʼe haʼu haree nuʼudar problema neʼebé susar atu rezolve.”—Carissa.

Ita-nia emosaun tun-saʼe hanesan estrada neʼebé aat ka lae? a Se nuneʼe, informasaun neʼe bele ajuda Ita!

Tanbasá neʼe akontese

Emosaun neʼebé tun-saʼe durante tempu joven mak normál. Maski Ita-nia tempu joven mak laʼo ho diʼak, maibé karik Ita hakfodak katak Ita-nia emosaun la estavel no tun-saʼe makaʼas.

Se Ita konfuzaun ho Ita-nia emosaun neʼebé tun-saʼe, hanoin-hetan katak sentimentu sira-neʼe mosu tanba mudansa iha ormona, no mós tanba sentimentu laran-taridu no la hakmatek. Neʼe mak prosesu neʼebé normál atu sai ema boot ida. Maski nuneʼe, Ita bele komprende no aprende atu kontrola Ita-nia emosaun.

Realidade: Importante atu aprende oinsá Ita bele kontrola Ita-nia emosaun bainhira Ita sei joven, tanba neʼe bele ajuda Ita hasoru situasaun oioin bainhira Ita sai boot.

Sentimentu negativu mak hanesan kuak sira iha estrada. Ita bele hasees an husi kuak sira-neʼe se Ita iha matenek

Buat tolu neʼebé Ita bele halo

Koʼalia. Bíblia hatete: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.

“Ami-nia família iha belun diʼak ida neʼebé haʼu haree nuʼudar tia. Bainhira haʼu konta haʼu-nia problema, nia rona didiʼak mai haʼu, no neʼe halo haʼu sente livre atu fó sai haʼu-nia sentimentu. Bainhira haʼu iha hanoin neʼebé loos, nia gaba haʼu, no se haʼu sala, nia korrije haʼu iha dalan neʼebé diʼak.”—Yolanda.

Sujestaun: Duké koʼalia deʼit ba Ita-nia kolega sira neʼebé mós emosaun tun-saʼe hanesan Ita, diʼak liu koʼalia ba inan-aman ka ema boot seluk neʼebé Ita bele tau fiar.

Hakerek. Bíblia konta kona-ba Job neʼebé sente estrese tebetebes. Job hatete: “Haʼu sei hasai lian halerik. Haʼu sei koʼalia tanba haʼu iha terus boot laran!” (Job 10:1) Dalan seluk atu fó sai Ita-nia sentimentu mak hodi hakerek ida-neʼe.

“Haʼu lori haʼu-nia kadernu kiʼik ba fatin hotu. Bainhira buat ruma halo haʼu sente la kontente, haʼu hakerek kona-ba neʼe. Hakerek mak terapia ida neʼebé diʼak tebes mai haʼu.”—Iliana.

Sujestaun: Diʼak atu iha kadernu ida neʼebé Ita uza deʼit atu hakerek kona-ba saida mak Ita sente, tanbasá mak sente nuneʼe, no oinsá atu kontrola Ita-nia emosaun.

Orasaun. Bíblia hatete: “Entrega ó-nia laran-susar ba Jeová, no nia sei apoia ó. Nia sei nunka husik ema laran-loos atu monu.”—Salmo 55:22.

“Haʼu halo orasaun beibeik ba Jeová bainhira haʼu sente estrese. Haʼu sempre sente kmaan depois haʼu fakar sai tiha haʼu-nia sentimentu ba Jeová.”—Jasmine.

Sujestaun: Maski Ita sente laran-taridu, hanoin kona-ba buat tolu iha Ita-nia moris neʼebé Ita bele hatoʼo agradese. Bainhira halo orasaun ba Jeová, husu ninia ajuda, maibé mós hatoʼo agradese ba bensaun neʼebé Ita simu.

a Informasaun neʼe fó sai kona-ba emosaun tun-saʼe neʼebé joven barak hasoru. Se Ita iha moras bipolar ka moras seluk neʼebé liga ho depresaun, haree informasaun ho títulu “Oinsá mak haʼu bele tahan hasoru depresaun?”