Segredu #1: Se Ita gosta atu fó ba ema seluk, dala barak Ita mós sei hetan fali buat diʼak.

 Ema bele haree katak Ita mak ema neʼebé laran-luak. Rezultadu mak karik sira mós sei hatudu fali laran-luak ba Ita. Bíblia hatete:

•  “Kontinua fó ba ema seluk, no sira mós sei fó ba imi. . . . Tanba buat neʼebé imi sukat ba ema, nuneʼe mós ema sei sukat ba imi.”​—Lucas 6:38.

•  “Fo ba, no imi sei simu; . . . Basa imi sura oin sa ba ema, nuneʼe mos ema sei sura ba imi.”​—Lucas 6:38, Liafuan diʼak ba imi, segundu edisaun.

 Segredu #2: Kuandu Ita ajuda ema seluk, tuir loloos Ita ajuda Ita-nia an rasik.

 Hodi halo buat diʼak ba ema seluk, Ita sei sente orgullu ho Ita-nia an no sente kontente tanba fó ba ema seluk. Bíblia hatete:

•  “Kontente liu atu fó duké simu.”​—Apóstolu 20:35.

•  “Kuandu ó halo festa, konvida ema kiak, ain-kudeʼik, matan-delek no aleijadu. No ó sei haksolok, tanba sira la iha kbiit atu selu fali ó.”​—Lucas 14:13, 14.

 Iha joven barak neʼebé gosta atu ajuda ema seluk. Haree toʼok ezemplu balu tuirmai.

 “Dala ruma haʼu gosta tuur deʼit iha sofá no haree televizaun. Haʼu hanoin kona-ba haʼu-nia amá no apá neʼebé serbisu hela, no oinsá sira sente kole tebes bainhira sira fila fali ba uma. Entaun, haʼu fase bikan no hamoos uma. Haʼu mós halo kafé tanba haʼu-nia amá no apá gosta tebes hemu kafé. Kuandu amá fila ba uma, nia hatete: “Oh, moos tebes iha neʼe! No morin loos. Obrigada barak oan!” Ida-neʼe sempre halo sente diʼak tanba haʼu bele ajuda sira.”​—Casey.

 “Haʼu-nia inan-aman sempre apoia haʼu no fó buat hotu neʼebé haʼu presiza. Entaun bainhira sira-nia karreta sai aat iha tinan kotuk, haʼu fó haʼu-nia osan ba sira, maski neʼe mak osan boot tebes neʼebé haʼu rai. Foufoun sira la simu, maibé haʼu nafatin hakarak atu fó. Haʼu-nia inan-aman merese atu simu buat hotu neʼe. Haʼu sente kontente loos tanba bele fó buat ruma ba sira.”​—Holly.

 Ita hatene ka lae? Joven barak husi Testemuña ba Jeová, sente kontente tebes tanba ajuda ema seluk atu estuda Bíblia. Sira balu prontu atu muda ba rai seluk neʼebé presiza liután ema atu hanorin Bíblia.

 “Haʼu muda husi Estadus Unidus ba Méxiku atu hanorin Bíblia. Haʼu ladún iha osan ka sasán atu ajuda ema seluk. Maibé tuir loloos, bainhira haʼu fó haʼu-nia tempu no forsa atu haklaken, ema agradese liu duké fó sasán.”​—Evan.

 Ita mós hakarak sente kontente hodi ajuda ema seluk ka lae? Haree toʼok sujestaun balu tuirmai.

 Ajuda Ita-nia família:

•  Hamoos uma, fase bikan, ka hamoos kuartu maski ema ida la haruka

•  Teʼin

•  Hakerek karta atu fó agradese ba Ita-nia inan-aman

•  Ajuda Ita-nia alin atu halo TPC

 Ajuda ema seluk neʼebé laʼós Ita-nia família:

•  Hakerek karta ba ema neʼebé moras hela

•  Ajuda hamoos viziñu neʼebé ferik ka katuas nia uma oin

•  Vizita ema neʼebé labele sai husi uma tanba moras ka ferik-katuas ona

•  Fó prezente ba ema neʼebé hasoru daudaun susar

 Sujestaun: Koko hanoin kona-ba buat seluk neʼebé Ita bele halo. Depois, koko atu ajuda ema ida iha semana neʼe. Karik Ita sei hakfodak tebes kona-ba buat neʼebé Ita sei sente!

 “Depois ajuda tiha ema seluk, Ita kontente tebes. Ita sente katak Ita kumpre atu halo buat ruma, no sira mós agradese tebes. Bainhira ajuda hela sira, Ita mós sente kontente, maski foufoun Ita la hanoin katak Ita sei kontente hanesan neʼe. Ikusmai Ita sei la hanoin katak Ita halo ona sakrifísiu, tanba Ita rasik mós hetan benefísiu barak.”​—Alana.