Saida mak Ita sei halo iha situasaun sira tuirmai neʼe?

1.   Ita-nia profesór hirus makaʼas ba Ita iha Ita-nia maluk sira-nia oin tanba Ita nakar iha klase laran.

    Ita presiza husu deskulpa ba profesór neʼe ka lae, maski Ita hanoin nia hirus demais liu?

2.   Ita konta aat Ita-nia kolega iha kotukotuk no ikusmai nia hatene.

    Ita presiza husu deskulpa ba Ita-nia kolega ka lae, maski Ita hanoin katak buat neʼebé Ita konta mak loos?

3.   Ita hirus toʼo hatán fali Ita-nia apá nia liafuan.

    Ita presiza husu deskulpa ba Ita-nia apá ka lae, maski Ita sente katak apá mak provoka Ita atu hirus?

 Pergunta tolu neʼe nia resposta mak sin. Maibé tanbasá husu deskulpa, maski Ita sente katak Ita iha razaun loos ba buat neʼebé Ita halo?

•  Tanbasá husu deskulpa?

•  Oinsá atu husu deskulpa?

•  Ita-nia kolega hanoin saida

•   Husu deskulpa hatudu katak Ita ema maduru. Se Ita kaer responsabilidade ba buat ruma neʼebé Ita halo ka koʼalia, Ita komesa haburas hahalok sira neʼebé Ita presiza bainhira Ita sai boot.

   “Haraik an no pasiénsia bele ajuda ita atu husu deskulpa, no sai prontu atu rona ba ema seluk nia hanoin.”—Rachel.

•   Husu deskulpa ajuda Ita hadame malu ho ema seluk. Ema neʼebé husu deskulpa hatudu katak buat neʼebé importante liu ba nia mak halo dame ho ema seluk, duké hanoin kona-ba sé mak loos no sé mak sala.

   “Maski ita sente ita la sala, maibé halo dame ho ema seluk mak importante liu. Atu husu deskulpa neʼe mak buat simples ida, no neʼe bele hadiʼa ita-nia relasaun ho ema seluk.”—Miriam.

•   Husu deskulpa halo Ita kmaan iha laran. Se Ita-nia liafuan no hahalok ruma hakanek ema nia laran, neʼe halo Ita sente laran susar tebes. Maibé bainhira Ita husu deskulpa Ita sente kmaan iha laran, hanesan hasai buat todan husi Ita-nia kabaas. a

   “Dala ruma haʼu koʼalia makaʼas ba haʼu-nia apá no amá. Haʼu sente la diʼak kona-ba neʼe, maibé atu husu deskulpa mak susar. Bainhira husu tiha deskulpa, haʼu sente kmaan duni tanba situasaun família nian iha dame.”—Nia.

 Fasil atu husu deskulpa ka lae? Lae! Dena mak joven ida neʼebé presiza husu deskulpa dala barak tanba koʼalia la ho respeitu ba ninia amá. Nia hatete: “La fasil atu dehan ‘Deskulpa’. Haʼu sente hanesan buat ruma belit metin iha haʼu-nia garganta no liafuan sira labele sai husi haʼu-nia ibun!”

•   Se bele, bá no hasoru ema neʼebé Ita atu husu deskulpa. Hodi husu deskulpa oin ba oin, neʼe sei ajuda ema neʼe hatene katak Ita husu deskulpa ho laran. Maibé bainhira Ita husu deskulpa liuhusi mensajen, karik ladún kona ema neʼe nia laran. Maski Ita uza emoji oin triste nian, maibé karik ema la fiar katak Ita husu deskulpa ho laran.

   Sujestaun: Se Ita labele hasoru ema neʼe atu husu deskulpa, diʼak atu telefone ka hakerek karta ba nia. Importante atu hanoin uluk liafuan sira ho didiʼak.

   Bíblia nia prinsípiu: “Ema laran-loos hanoin didiʼak antes atu hatán.”—Provérbios 15:28.

•   Lalais atu husu deskulpa. Se Ita mak dada an atu husu deskulpa, problema neʼe sei aumenta sai boot, no neʼe sei halo imi sente la diʼak ba malu.

   Sujestaun: Halo planu, porezemplu, ‘Haʼu hakarak husu deskulpa loron neʼe kedas.’ Deside tempu saida mak Ita sei husu deskulpa no halo tuir buat neʼebé Ita deside ona.

   Bíblia nia prinsípiu: “Hadiʼa lalais problema ho ema.”—Mateus 5:25.

•   Husu deskulpa husi laran. Hodi dehan “Deskulpa se ó sente la diʼak”, neʼe laʼós husu deskulpa! Feto joven ida naran Janelle, dehan: “Se ita mak sente sala duni ho buat neʼebé ita halo no husu deskulpa husi laran, baibain ema neʼebé ita hakanek sei prontu simu ita-nia deskulpa.”

   Sujestaun: Keta dehan, “Haʼu sei husu deskulpa ba sala neʼebé haʼu halo, naran katak ó husu deskulpa ba sala neʼebé ó halo.”

   Bíblia nia prinsípiu: “Mai ita buka atu halo buat neʼebé haburas dame.”—Roma 14:19.