Se Ita-nia valór matemátika la diʼak, karik Ita hanoin buat neʼebé Ita presiza halo mak estuda makaʼas liután. Se Ita ladún diʼak iha desportu, karik Ita hanoin buat neʼebé Ita presiza halo mak pratika liután. Maibé karik buat neʼebé Ita presiza mak toba liután. Hanoin toʼok tanbasá.

•  Tanbasá Ita presiza toba?

•  Saida mak halo Ita susar atu toba?

•  Oinsá mak Ita bele toba ho diʼak?

•  Ita-nia kolega hanoin saida

 Peskizadór sira hatete katak maioria joven sira presiza toba durante oras ualu ka oras sanulu kalan-kalan. Tanbasá mak importante ba Ita atu toba durante oras barak hanesan neʼe?

•   Toba ajuda Ita-nia neon. Toba mak hanesan “ai-han ba ita-nia kakutak”. Toba ajuda Ita-nia neon atu sai fresku bainhira iha eskola, halo desportu no atu rezolve problema.

•   Toba ajuda Ita atu sente kontente. Ema neʼebé ladún toba diʼak, sira-nia sentimentu troka bá-mai lalais, sente triste no depresaun, no mós susar atu iha relasaun diʼak ho ema seluk.

•   Toba ajuda Ita atu hasees an husi asidente bainhira lori transporte. Peskiza ida neʼebé halaʼo iha Estadus Unidus hatudu katak bainhira lori transporte joven sira ho tinan 16 toʼo 24 mak hetan asidente dala rua liu duké ema neʼebé idade 40 toʼo 59 tanba dukur.

•   Toba ajuda Ita-nia saúde. Toba ajuda Ita-nia isin atu mantein no hafoun sélula sira, no uat sira. Se Ita toba diʼak, ida-neʼe ajuda hamenus posibilidade atu sai bokur, raan-midar no stroke.

 Maski toba lori benefísiu barak, maibé joven barak ladún toba tuir oras neʼebé sira-nia isin presiza. Porezemplu, Elaine neʼebé tinan 16 hatete:

 “Profesora husu ba haʼu no haʼu-nia kolega sira kona-ba tuku hira mak ami toba. Kolega barak hatán tuku rua dadeer. Kolega balu hatán tuku 5 dadeer. Estudante ida deʼit mak hatán tuku 9:30 kalan.”

 Saida deʼit mak bele halo Ita susar atu toba?

 Ransu. “Fasil tebes atu hadeer kalan tomak no gasta tempu, liuliu iha kalan neʼebé haʼu sai hamutuk ho kolega sira.”​—Pamela.

 Responsabilidade. “Haʼu gosta toba, maibé susar tanba haʼu okupadu tebes.”​—Ana.

 Teknolojia. “Razaun tansá haʼu ladún iha tempu atu toba mak haʼu-nia telefone. Susar atu la haree ba telefone bainhira latan iha kama leten.”​—Anisa.

•   Buka-hatene Ita-nia hanoin kona-ba toba. Bíblia hatete: “Diʼak liu deskansa uitoan duké serbisu makaʼas demais, tanba neʼe hanesan duni tuir anin.” (Eclesiastes 4:6) Toba mak importante, neʼe laʼós buat ida neʼebé Ita bele hili atu halo ka la halo. Se Ita ladún toba ho diʼak, Ita sei la halo serbisu ho didiʼak no Ita mós sei la sente kontente bainhira halimar.

•   Buka-hatene saida deʼit mak halo Ita susar atu toba. Porezemplu, Ita hadeer toʼo kalan-boot ho Ita-nia belun sira ka lae? Ita-nia serbisu uma-laran no TPC barak demais ka lae? Ita-nia telefone mak halo Ita toba tarde ka fanu Ita iha kalan-boot ka lae?

 Hanoin toʼok: Presiza hakaʼas an atu bele luta hasoru buat neʼebé halo Ita susar atu toba, maibé Ita mós sei hetan rezultadu neʼebé diʼak. Provérbios 21:5 hatete: “Ema badinas nia planu sei hetan duni susesu.”

 Buat neʼebé bele ajuda ema ida atu toba, karik la ajuda ema seluk. Porezemplu, ema balu hatete katak se sira buka tempu atu toba uitoan iha meiudia, ida-neʼe sei ajuda sira atu toba dukur iha kalan. Maibé ema seluk hatete katak sujestaun neʼe la ajuda sira. Buka-hatene métodu saida mak diʼak ba Ita. Sujestaun sira tuirmai neʼe bele ajuda:

•   Fó tempu ba Ita-nia an atu tuur hakmatek. Se Ita tuur hakmatek antes tempu atu toba, karik neʼe sei ajuda Ita dukur lalais.

   “Diʼak atu remata sedu ita-nia serbisu ka knaar, atu nuneʼe ita la hanoin barak kona-ba buat sira-neʼe kuandu oras atu toba.”​—Maria.

•   Halo planu. Duké husik Ita-nia situasaun mak kontrola Ita, diʼak atu halo oráriu, hodi nuneʼe Ita bele toba diʼak.

   “Haʼu presiza toba durante oras ualu ka liu kalan-kalan. Entaun, se haʼu presiza atu hadeer sedu liu, haʼu tenke kalkula tuku hira mak haʼu presiza toba.”​—Vincent.

•   Koko atu sai toman. Se Ita treinu Ita-nia an atu toba tuir tempu, Ita-nia isin sei sai toman ho ida-neʼe. Matenek-naʼin sira fó sujestaun atu hadeer no toba iha oras neʼebé hanesan loroloron. Koko toʼok sujestaun neʼe durante fulan ida, no haree rezultadu saida mak Ita hetan.

   “Se ita toba iha oras neʼebé hanesan kalan-kalan, ita-nia neon sei fresku iha loron tuirmai. Neʼe sei ajuda ita atu sai susesu liu iha ita-nia atividade.”​—Jared.

•   Sai balansu kona-ba ransu. Bíblia anima atu ‘kontrola ita-nia hahalokʼ no neʼe inklui buat neʼebé Ita halo iha Ita-nia tempu halimar nian.​—1 Timóteo 3:2, 11.

   “Haʼu aprende atu tau limite ba haʼu-nia tempu atu ransu iha kalan. Se haʼu la tau limite ba tempu neʼebé haʼu uza atu halo atividade halimar nian, ikusmai haʼu rasik mak terus, haʼu la iha tempu atu toba!”​—Rebecca.

•   Ita-nia telefone mós presiza “toba”. Oras ida antes toba, luta hasoru tentasaun atu uza internét ka haruka mensajen ba kolega iha kalan. Peskizadór balu fó avizu katak naroman husi telefone, televizaun ka tablet bele halo susar ba Ita atu toba.

   “Ema hakarak atu bele kontaktu ita durante oras 24. Maibé atu bele deskansa ho diʼak, presiza duni atu para uza ita-nia telefone.”​—Julissa.