“Imi hetan tentasaun neʼebé baibain ema seluk mós hetan. Maibé Maromak mak laran-metin, no nia sei nunka husik imi atu hetan tentasaun neʼebé liu fali imi-nia kbiit, maibé kuandu imi hasoru tentasaun ruma, nia mós sei hatudu dalan ba imi atu sai, atu nuneʼe imi bele tahan.”—1 Korinto 10:13, Tradusaun Mundu Foun.

 “Imi sei la hetan babeur neʼebé laʼós ema nian. Maromak nia laran la bosok, no Nia sei la husik imi hetan babeur neʼebé boot liu fali imi-nia kbiit; maibé wainhira Nia koko imi, Nia sei fó mós dalan atu imi bele lori nia.”—1 Korinto 10:13, Liafuan diak ba imi, segunda edisaun.

 Versíkulu neʼe fó sai Maromak nia hahalok furak ida. Neʼe mak ninia hahalok laran-metin. Ema neʼebé adora Maromak ho laran-metin fiar katak nia sei ajuda sira, liuliu kuandu sira hetan susar ka tentasaun.

 “Imi hetan tentasaun neʼebé baibain ema seluk mós hetan.” Ema neʼebé adora Maromak bele hetan tentasaun atu halo buat ruma neʼebé halo Maromak triste. Maski tentasaun sira-neʼe mak difisil, maibé ita hatene katak ema seluk mós hasoru tentasaun neʼebé hanesan. a Tan neʼe, ema neʼebé adora Maromak bele fiar katak sira mós sei hasoru no tahan.

 “Maromak mak laran-metin.” Jeová b mak Maromak neʼebé ita bele tau fiar duni ba nia. Nia sempre kumpre ninia promesa atu la husik ema neʼebé hadomi nia no laran-metin nafatin ba nia. (Deuteronómio 7:9; Salmo 9:10; 37:28) Tan neʼe, ema neʼebé adora Maromak bele fiar duni katak nia sei kumpre promesa rua husi liafuan tuirmai iha versíkulu neʼe.

 “Nia sei nunka husik imi atu hetan tentasaun neʼebé liu fali imi-nia kbiit.” Maromak hatudu laran-metin hodi la husik ema hasoru tentasaun neʼebé susar liu toʼo sira labele tahan. Nia hatene ita ema nia limitasaun.—Salmo 94:14.

 “Kuandu imi hasoru tentasaun ruma, nia mós sei hatudu dalan ba imi atu sai, atu nuneʼe imi bele tahan.” Maromak bele hasai tiha tentasaun ida ka nia mós bele fó buat neʼebé ita presiza atu bele tahan. Porezemplu, nia bele fó matadalan liuhusi espíritu santu, kmaan liuhusi Bíblia, ka ajuda husi maluk fiar-naʼin sira.—João 14:26; 2 Korinto 1:3, 4; Koloso 4:11.

 Versíkulu neʼe mosu iha karta neʼebé apóstolu Paulo hakerek ba ema Kristaun iha Korinto. Iha karta neʼe, Paulo temi nasaun Izraél antigu nia hahalok nuʼudar ezemplu hodi fó avizu ba ema iha Korinto. (1 Korinto 10:11) Paulo temi tentasaun oioin neʼebé ema Izraél hetan, inklui mós adora estátua no halo sala seksuál. (1 Korinto 10:6-10) Sira balu monu ba tentasaun sira-neʼe. Tan neʼe mak Paulo fó hanoin ba ema Kristaun atu la fiar ba sira-nia an demais, hodi hanoin katak sira sei nunka monu ba tentasaun. (1 Korinto 10:12) Maski nuneʼe, nia mós fó kmaan ba sira hodi temi liafuan iha 1 Korinto 10:13. Ema neʼebé adora Maromak ho laran-metin bele kontra hasoru no manán tentasaun oioin.

 Haree vídeo badak neʼe hodi komprende kona-ba livru 1 Korinto.