“Haʼu-nia laran-diʼak neʼebé boot toʼo ona ba ó, tanba haʼu-nia kbiit sai kompletu kuandu ó fraku.”—2 Korinto 12:9, Tradusaun Mundu Foun.

 “Haʼu nia grasa toʼo ona ba o, basa Haʼu nia kbiit sai lo-los wainhira ema kbiit laek.”—2 Korinto 12:9, Liafuan diak ba imi, segunda edisaun.

 Maromak promete atu fó kbiit ba apóstolu Paulo hodi bele tahan hasoru susar sira no hetan susesu maski nia iha limitasaun.

 “Haʼu-nia laran-diʼak neʼebé boot toʼo ona ba ó.” Maromak nia resposta ba apóstolu Paulo nia orasaun mak: “Ó presiza deʼit haʼu-nia laran-diʼak.” Neʼe katak, Maromak nia laran-diʼak neʼebé boot mak toʼo atu ajuda Paulo tahan hasoru ninia susar sira. Oinsá? Liafuan neʼebé tradús nuʼudar “laran-diʼak neʼebé boot” ka “grasa” koʼalia kona-ba prezente neʼebé Maromak fó maski ema la merese atu simu. Paulo nia karta sira hatudu katak Maromak nia laran-diʼak neʼebé boot ajuda tebes nia. Maski Paulo uluk fó-terus ba ema Kristaun sira, maibé Maromak fó ba nia kbiit neʼebé nia presiza atu troka ninia hahalok no ajuda ema seluk sai ema Kristaun. (1 Korinto 15:9, 10; 1 Timóteo 1:12-14) Paulo fiar metin katak nia bele sadere ba Maromak nia ajuda atu manán hasoru problema ka susar naran deʼit.

 “Tanba haʼu-nia kbiit sai kompletu kuandu ó fraku.” Maromak Jeová a fó-hanoin Paulo katak Nia hatudu sai Ninia kbiit ho klaru liután bainhira Nia uza ida-neʼe atu ajuda ema neʼebé fraku no sala-naʼin. (2 Korinto 4:7; 12:8) Bainhira ema Kristaun rekoñese sira-nia limitasaun no buka Jeová nia ajuda, neʼe hanesan sira husik Maromak Jeová nia kbiit atu ajuda sira iha dalan kompletu. (Éfeso 3:16; Filipe 4:13) Neʼe katak, ita bele haree ho klaru Maromak nia kbiit bainhira ita fraku.

 Paulo hakerek karta ba ema Kristaun iha Korinto maizumenus iha tinan 55 EC. Iha parte ikus husi ninia karta neʼe, nia defende ninia pozisaun nuʼudar apóstolu ida. Nia sente nia presiza halo ida-neʼe tanba ema balu neʼebé bolu sira-nia an nuʼudar mestre kritika nia, karik sira hatún nia tanba haree hanesan ema fraku no la iha matenek atu koʼalia.—2 Korinto 10:7-10; 11:5, 6, 13; 12:11.

 Paulo defende ninia an hodi esplika katak se nia sadere ba ninia kbiit rasik, nia labele halaʼo ninia knaar no tahan hasoru susar oioin. (2 Korinto 6:4; 11:23-27; 12:12) Iha kapítulu 12, nia koʼalia kona-ba ‘ai-tarak iha ninia isin’, karik neʼe mak problema ruma neʼebé halo nia moras iha dalan fíziku ka emosionál. (2 Korinto 12:7) Maski Paulo la esplika problema saida mak nia hasoru, maibé nia hakarak duni atu tahan ho Maromak nia ajuda.

 Ema Kristaun ohin loron mós hasoru susar no terus oioin. Sira sente kmaan hodi hatene katak sira bele tahan hasoru susar naran deʼit ho Maromak nia kbiit. Hanesan Paulo, sira bele hatete ho fiar metin: “Kuandu haʼu fraku, haʼu iha kbiit.”—2 Korinto 12:10.

 Haree vídeo badak neʼe hodi komprende kona-ba livru 2 Korinto.