“Hatudu respeitu ba imi-nia inan-aman, atu nuneʼe imi bele moris naruk iha rai neʼebé Jeová, imi-nia Maromak, sei fó ba imi.”​—Éxodo 20:12, Tradusaun Mundu Foun.

 Maromak fó ukun-fuan ba ema Izraél iha tempu uluk atu hatudu respeitu ba sira-nia inan-aman. Tanba Maromak promete katak se sira halo tuir, sira sei moris naruk, neʼe fó sira razaun ida tan atu halo tuir. Maski ema Kristaun la presiza halo tuir Moisés nia Ukun-Fuan, maibé Maromak nia hanoin la troka kona-ba neʼe. Prinsípiu sira husi Moisés nia Ukun-Fuan sei vale hela, no neʼe importante ba ita ohin loron.​—Koloso 3:20.

 Oan sira, maski labarik ka joven, presiza hatudu respeitu no halo tuir sira-nia inan-aman. (Levítico 19:3; Provérbios 1:8) Maski oan sira neʼebé kaben ona mós presiza nafatin hadomi no ajuda sira-nia inan-aman. Porezemplu, sira haree nafatin katak sira-nia inan-aman nia situasaun diʼak hela kuandu sai idade liu ona, karik mós fó ajuda ho osan se sira presiza.​—Mateus 15:4-6; 1 Timóteo 5:4, 8.

 Ema Izraél tenke hatudu respeitu ba sira-nia aman no mós sira-nia inan. Neʼe hatudu katak inan nia knaar mós importante iha família laran. (Provérbios 6:20; 19:26) Ohin loron, oan sira mós tenke hatudu respeitu ba aman, no mós inan.

 Maibé, ukun-fuan neʼe mós iha limite. Ema Izraél sei la halo tuir sira-nia inan-aman, ka ema naran deʼit, se sira presiza kontra Maromak. (Deuteronómio 13:6-8) Ohin loron mós, ema Kristaun “halo tuir Maromak nuʼudar ukun-naʼin duké halo tuir ema”.​—Apóstolu 5:29.

 Iha Maromak nia Ukun-Fuan ba ema Izraél sira, nia promete katak oan sira neʼebé halo tuir sira-nia inan-aman sei “moris naruk” no buat hotu sei “sai diʼak” ba sira iha rai neʼebé Jeová fó ba sira. (Deuteronómio 5:16) Sira sei la hetan kastigu neʼebé oan sira hetan bainhira la halo tuir Maromak nia ukun-fuan hodi kontra hasoru sira-nia inan-aman. (Deuteronómio 21:18-21) Maski ukun-fuan neʼe fó iha tempu uluk, maibé ninia prinsípiu sei vale toʼo agora. (Éfeso 6:1-3) Maski joven ka idade ona, ita hotu sei hatán ba Maromak se ita la hatudu respeitu ba inan-aman. No hanesan buat neʼebé Maromak promete, oan sira neʼebé halo tuir Maromak no inan-aman sei moris naruk, no mós iha esperansa atu moris ba nafatin.​—1 Timóteo 4:8; 6:18, 19.

 Iha Ukun-Fuan Sanulu, ukun-fuan atu hatudu respeitu ba inan-aman mak iha númeru lima. (Éxodo 20:1-17) Ukun-fuan númeru primeiru toʼo haat koʼalia kona-ba ema Izraél iha devér atu halo tuir Maromak, hanesan sira tenke adora nia mesak deʼit. No ukun-fuan númeru neen toʼo sanulu koʼalia kona-ba sira iha devér atu halo ba malu, inklui ukun-fuan atu kaben-naʼin sira laran-metin ba malu no bandu atu naʼok. Tan neʼe, ema balu dehan katak, ukun-fuan “hatudu respeitu ba imi-nia inan-aman” mak hanesan ponte neʼebé diʼak, tanba neʼe envolve halo tuir devér ba Maromak no mós ba ema.