“Tanba iha situasaun hotu haʼu hetan forsa liuhusi nia neʼebé fó kbiit mai haʼu.”—Filipe 4:13, Tradusaun Mundu Foun.

 “Haʼu bele halo buat hotu iha Nia nebe fo kbiit mai haʼu.”—Filipe 4:13, Liafuan diak ba imi, segunda edisaun.

 Apóstolu Paulo nia liafuan neʼe halo ita fiar metin katak ema neʼebé adora Maromak sei hetan kbiit atu kumpre Ninia hakarak.

 Tradusaun Bíblia balu hatete katak Kristu mak ida neʼebé fó kbiit ba Paulo. Maibé manuskritu lian Gregu nian neʼebé tuan liu la temi liafuan “Kristu” iha versíkulu neʼe. Tan neʼe, tradusaun Bíblia barak uza liafuan hanesan “nia neʼebé fó kbiit mai haʼu”. Entaun, Paulo koʼalia kona-ba sé?

 Kontestu hatudu katak Paulo koʼalia kona-ba Maromak. (Filipe 4:6, 7, 10) Iha karta neʼebé hanesan, nia hakerek ba ema iha Filipe: “Maromak mak fó forsa ba imi, hodi fó ba imi . . . kbiit atu halo buat neʼebé nia hakarak.” (Filipe 2:13) No iha 2 Korinto 4:7, nia hakerek katak Maromak mak fó kbiit ba nia atu kumpre ninia knaar. (Kompara 2 Timóteo 1:8.) Tan neʼe, ita iha razaun diʼak atu fiar katak Paulo koʼalia kona-ba Maromak bainhira temi “nia neʼebé fó kbiit mai haʼu”.

 Bainhira Paulo dehan katak nia hetan kbiit “iha situasaun hotu”, nia hakarak dehan saida? Paulo hakarak refere ba situasaun oioin neʼebé nia hasoru ona bainhira nia kumpre Maromak nia hakarak. Bainhira nia iha sasán barak ka uitoan deʼit, nia tau fiar ba Maromak atu tau matan ba nia. Tan neʼe, Paulo aprende atu sente kontente hodi la depende ba situasaun.—2 Korinto 11:23-27; Filipe 4:11.

 Paulo nia liafuan bele anima Maromak nia atan sira ohin loron. Maromak sei fó kbiit neʼebé sira presiza atu bele tahan hasoru susar oioin no kumpre ninia hakarak. Maromak bele fó kbiit ba sira liuhusi ninia espíritu santu, no mós liuhusi maluk fiar-naʼin sira no ninia Liafuan Bíblia.—Lucas 11:13; Apóstolu 14:21, 22; Ebreu 4:12.

 Liafuan neʼe mak parte ikus husi Paulo nia karta ba ema Kristaun iha Filipe. Nia hakerek ida-neʼe maizumenus tinan 60-61 EC, bainhira nia sai dadur iha Roma ba dala primeiru. Ba tempu balu, ema Kristaun iha Filipe labele haruka sasán atu ajuda apóstolu Paulo. Maibé ikusmai sira komesa haruka buat neʼebé Paulo presiza.—Filipe 4:10, 14.

 Paulo gaba ema Kristaun iha Filipe tanba sira hatudu laran-luak, no nia mós fó-hatene ba sira katak nia iha buat hotu neʼebé nia presiza. (Filipe 4:18) Nia mós aproveita oportunidade neʼe atu fahe lia-loos importante kona-ba ema Kristaun nia moris: Ema Kristaun hotu, maski riku ka kiak, bele moris kontente se sira sadere ba Maromak nia ajuda.—Filipe 4:12.