ESPLIKASAUN KONA-BA ESKRITURA

Isaias 42:8—“Haʼu mak NAʼI”

LOKE

“Haʼu mak Jeová. Neʼe mak haʼu-nia naran; Haʼu la fó haʼu-nia glória ba sé deʼit, no la fó haʼu-nia hahiʼi ba estátua sira.”—Isaias 42:8, Tradusaun Mundu Foun.

“Hau mak NAI, no Hau nia naran mak nee, no Hau sei la foo Hau nia glória ba ema seluk, no liafuan nebee hahii Hau neʼe, Hau sei la foo ba estátua lulik.”—Isaias 42:8, Bíblia Kadi Kapasidade.

Signifikadu husi Isaias 42:8

Maromak fó-hatene ninia naran mai ita no fó sai katak nia la fahe ninia glória ba estátua sira.

Maromak rasik mak hili ninia naran, no naran neʼe baibain tradús nuʼudar “Jeová” iha lian Portugés no Tetun. a (Éxodo 3:14, 15) Maski Maromak nia naran neʼe mosu besik dala 7.000 iha Testamentu Tuan (Eskritura Lian Ebraiku-Aramaiku), tradusaun Bíblia barak troka naran neʼe ho títulu “NAI” (ho letra boot). Ezemplu ida mak iha Salmo 110:1, neʼebé refere ba Jeová no Jesus iha liafuan profesia nian. Iha tradusaun Bíblia Kadi Kapasidade, eskritura neʼe dehan: “NAI [Jeová] dehan ba hau nia Nai [Jesus].” (Apóstolu 2:34-36) Bíblia Tradusaun Mundu Foun halakon konfuzaun entre liafuan “Naʼi” hodi tau Maromak nia naran iha fatin neʼebé loos. Eskritura neʼe dehan: “Jeová hatete ba haʼu-nia Naʼi: ‘Tuur iha haʼu-nia liman-loos toʼo haʼu tau ó-nia inimigu sira iha ó-nia ain okos.’”

Matenek-naʼin barak fiar katak Maromak nia naran neʼe signifika “Nia mak halo sai”. Maromak loos deʼit mak merese atu iha naran neʼe, tanba nia mesak deʼit mak bele halo ninia an ka ninia kriasaun atu sai buat naran deʼit hodi bele kumpre ninia hakarak.

Nuʼudar ita-nia Kriadór no Maromak loos mesak deʼit, Jeová merese ita atu adora nia ho laran tomak. La iha maromak seluk ka buat seluk neʼebé iha direitu atu simu ita-nia adorasaun hanesan neʼe, inklui estátua ka imajen.—Éxodo 20:2-6; 34:14; 1 João 5:21.

Kontestu husi Isaias 42:8

Iha parte primeiru husi Isaias kapítulu 42, Jeová fó sai nanis kona-ba “ida neʼebé nia hili ona” no buat neʼebé nia sei halo. Kona-ba atan neʼe, Maromak dehan nia sei “lori justisa ba nasaun sira”. (Isaias 42:1) Tuirmai Maromak dehan: “Agora haʼu fó sai fali buat foun sira. Antes buat sira-neʼe akontese, haʼu fó-hatene nanis ona ba imi.” (Isaias 42:9) Profesia kona-ba “ida neʼebé Maromak hili” komesa sai loos bainhira Mesias, ka Kristu, toʼo mai no halaʼo ninia knaar iha mundu.—Mateus 3:16, 17; 12:15-21.

a Maromak nia naran iha lian Ebraiku mak letra konsoante haat, neʼebé hakerek ho alfabetu modernu nuʼudar YHWH, no tradusaun Bíblia balu temi nuʼudar “Yahweh”. Atu hetan informasaun liután, haree Bíblia Sagrada Tradusaun Mundu Foun, Apéndise 4 “Maromak nia naran iha Eskritura Lian Ebraiku”.