“Bolu haʼu bá, no haʼu sei hatán ba ó no fó-hatene kedas ba ó kona-ba buat kmanek sira neʼebé susar atu komprende, neʼebé ó seidauk hatene.”—Jeremias 33:3, Tradusaun Mundu Foun.

 “Bolu ba Hau, no Hau sei hataan ba o. Hau sei foo hatene ba o buat sira nebee boot no subar, buat sira nebee o la hatene.”—Jeremias 33:3, Bíblia Kadi Kapasidade.

 Ho liafuan sira-neʼe, Maromak konvida ema atu bolu nia liuhusi orasaun. Kuandu ema ida simu konvite neʼe no halo orasaun ba Maromak, Maromak sei fó sai buat neʼebé sei akontese iha futuru.

 “Bolu haʼu bá, no haʼu sei hatán ba ó.” Liafuan “bolu haʼu” laʼós katak bolu Maromak ka hakilar hodi temi Maromak nia naran. Maibé neʼe katak halo orasaun hodi husu Maromak nia ajuda no matadalan.—Salmo 4:1; Jeremias 29:12.

 Foufoun, konvite neʼe hatoʼo ba nasaun Izraél antigu. Nasaun neʼe fila kotuk ba Maromak, no ikusmai hetan ameasa husi tropa Babilónia. (Jeremias 32:1, 2) Maromak Jeová a konvida ema Izraél atu bolu nia liuhusi orasaun no fila fali ba nia.

 “Haʼu sei . . . fó-hatene kedas ba ó kona-ba buat kmanek sira neʼebé susar atu komprende, neʼebé ó seidauk hatene.” Buat neʼebé Maromak promete atu fó sai mak “susar atu komprende” (ka, labele komprende) tanba ema labele komprende ho sira-nia matenek rasik. Fraze ‘buat neʼebé susar atu komprende’ bele mós tradús nuʼudar “buat neʼebé subar”.

 “Buat neʼebé subar” refere ba saida? Neʼe mak kona-ba buat neʼebé sei akontese iha futuru, katak sidade Jeruzalein sei harahun tiha no sai fuik, no ikusmai ema sei harii fali sidade neʼe no hela iha neʼebá. (Jeremias 30:1-3; 33:4, 7, 8) Liután neʼe, Maromak mós promete katak ninia atan sira nuʼudar nasaun ida sei la lakon mohu.—Jeremias 32:36-38.

 Profeta Jeremias hetan lia-menon neʼe husi Jeová iha tinan 608 AEC, neʼe mak bainhira Liurai Zedequias nia ukun tama ona ba tinan sanulu. Antes neʼe, Jeremias fó-hatene nanis ona katak sidade Jeruzalein sei lakon no inimigu sira sei lori Zedequias nuʼudar dadur. Tanba Liurai la gosta liafuan neʼe, nia kaer no sulan Jeremias.—Jeremias 32:1-5; 33:1; 37:21.

 Iha situasaun hanesan neʼe mak Maromak fó sai ninia konvite iha Jeremias 33:3. Triste mak Liurai Zedequias no maioria husi povu lakohi troka sira-nia hahalok no ulun-toos nafatin. (Jeremias 7:26; 25:4) Sira la bolu Maromak, no la buka Maromak nia matadalan. Liutiha tinan ida, Zedequias lakon ninia kbiit, sidade Jeruzalein naksobu, no tropa Babilónia kaer ema barak no lori ba Babilónia nuʼudar dadur.—Jeremias 39:1-7.

 Liafuan iha Jeremias 33:3 fó-hanoin ita katak Maromak bele fó “koñesimentu neʼebé loos kona-ba ninia hakarak” no hatudu sai “buat kleʼan” ba ema neʼebé halo orasaun no estuda ninia Liafuan Bíblia. (Koloso 1:9; 1 Korinto 2:10) Buat kleʼan neʼe inklui promesa kona-ba buat neʼebé Maromak sei halo iha futuru.—Apokalipse 21:3, 4.

 Haree vídeo badak neʼe atu komprende kona-ba livru Jeremias.