“Haʼu dehan ona buat sira-neʼe ba imi atu imi bele hetan dame liuhusi haʼu. Iha mundu imi sei hasoru susar, maibé aten-brani bá! Tanba haʼu manán tiha ona mundu.”—João 16:33, Tradusaun Mundu Foun.

 “Haʼu fo hatene buat neʼe ba imi atu imi hetan dame. Iha mundu imi sei hetan susar barak; maibe imi aten berani ba, basa Haʼu manan tiha mundu.”—Joao 16:33, Liafuan diak ba imi, segunda edisaun.

 Ho liafuan sira-neʼe, Jesus ho laran-diʼak fó fiar ba ninia dixípulu sira katak sira mós bele hetan susesu atu halo Maromak kontente maski hasoru susar oioin no ema kontra sira.

 “Haʼu dehan ona buat sira-neʼe ba imi atu imi bele hetan dame liuhusi haʼu a.” Parte ikus husi versíkulu neʼe hatudu katak dame neʼe mak laʼós kona-ba kondisaun neʼebé la iha konflitu, maibé neʼe mak dame iha laran no neon. Ita bele hetan dame hanesan neʼe “liuhusi” Jesus, neʼebé promete atu haruka espíritu santu. “Ajuda-naʼin” neʼe iha forsa boot, no ajuda Jesus nia dixípulu sira kuandu hasoru susar oioin.—João 14:16, 26, 27.

 “Iha mundu imi sei hasoru susar, maibé aten-brani bá!” Jesus fó sai ho klaru katak ninia dixípulu sira sei hasoru susar oioin, hanesan situasaun la justisa, ka ema sei kontra sira-nia fiar. (Mateus 24:9; 2 Timóteo 3:12) Maski nuneʼe, sira iha razaun diʼak atu sai “aten-brani”.

 “Haʼu manán tiha ona mundu.” Liafuan “mundu” refere ba ema neʼebé la iha relasaun diʼak ho Maromak. b 1 João 5:19 dehan: “Aat-naʼin [ka, Satanás] mak domina mundu tomak.” Entaun, ema iha “mundu” neʼe iha hanoin no hahalok neʼebé kontra Maromak nia hakarak.—1 João 2:15-17.

 Satanás no ninia mundu koko atu hapara Jesus atu kumpre buat neʼebé Maromak haruka nia atu halo, inklui mós hanorin kona-ba Maromak no fó ninia moris perfeitu atu salva ema. (Mateus 20:28; Lucas 4:13; João 18:37) Maibé Jesus la husik mundu atu book ninia hanoin no kontra fali Maromak. Jesus kontinua laran-metin toʼo mate. Tan neʼe, Jesus bele hatete katak nia manán ona mundu no Satanás neʼebé “ukun-naʼin mundu neʼe nian” la konsege “kontrola” nia.—João 14:30.

 Jesus uza ninia ezemplu rasik atu hatudu katak ninia dixípulu sira mós bele laran-metin nafatin ba Maromak maski hetan koko. Tuir loloos, Jesus hakarak hatete: “Haʼu konsege manán mundu, se nuneʼe, imi mós bele.”

 Jesus hatete ida-neʼe iha kalan antes nia mate. Nia hatene katak lakleur nia sei mate, tan neʼe nia uza oportunidade ida-neʼe atu fó konsellu ikus ba ninia apóstolu sira neʼebé laran-metin. Nia fahe informasaun balu neʼebé dixípulu sira presiza hanoin ho sériu, porezemplu: Sira sei la haree tan nia, ema sei fó susar ba sira no oho sira balu. (João 15:20; 16:2, 10) Karik neʼe bele halo apóstolu sira sente taʼuk, tan neʼe Jesus remata ninia lia-menon ho liafuan husi João 16:33 atu fó aten-brani no kmaan ba sira.

 Jesus nia liafuan no ezemplu bele anima ninia dixípulu sira ohin loron. Ema Kristaun hotu bele hatudu laran-metin ba Maromak maski hasoru susar naran deʼit.