“Glória ba Maromak neʼebé iha fatin aas, no dame ba ema sira neʼebé Maromak simu iha rai.”—Lucas 2:14, Tradusaun Mundu Foun.

 “Gloria ba Maromak iha leten aas ba, dame iha raiklaran ba ema sira nebe Nia hadomi!”—Lucas 2:14, Liafuan diak ba imi, segunda edisaun.

 Bainhira Jesus foin moris, anju sira hahiʼi Maromak ho liafuan sira-neʼe. Neʼe hatudu katak Maromak sei simu ema neʼebé tau fiar ba Jesus, no sira bele hetan dame.

 “Glória ba Maromak neʼebé iha fatin aas.” Anju sira hatete hanesan neʼe hodi fó sai katak Maromak merese simu glória hotu. Fraze neʼe mós hatudu katak Jesus nia moris no serbisu haklaken iha mundu sei fó glória boot ba Maromak Jeová. a Porezemplu, bainhira Jesus hanorin ema, nia sempre fó glória ba Maromak, porezemplu nia dehan: “Buat neʼebé haʼu hanorin ba imi laʼós haʼu-nian, maibé husi Ida neʼebé haruka haʼu mai.” (João 7:16-18) Bainhira Jesus halo milagre sira, dala barak ema neʼebé haree “hahú atu hahiʼi Maromak”. (Lucas 5:18, 24-26; João 5:19) Jesus nia mate mós fó glória ba Maromak. Jesus nia mate loke dalan ba Maromak atu kumpre ninia planu atu halo mundu nakonu ho ema neʼebé laran-loos no hadomi dame.—Génesis 1:28.

 “Dame . . . iha rai.” Dame neʼe la refere deʼit ba situasaun kuandu funu la iha, maibé envolve buat barak liután. Neʼe inklui dame ka kalma neʼebé ita sente iha laran só deʼit kuandu ita hatene katak Maromak simu ita. Ita agradese tanba liuhusi Jesus, ita ema bele iha relasaun diʼak ho Maromak. (Tiago 4:8) No nuʼudar Liurai ba Maromak nia Ukun, Jesus sei lori dame ba nafatin iha raiklaran tomak no dame neʼe sei nunka lakon.—Salmo 37:11; Lucas 1:32, 33.

 “Ema sira neʼebé Maromak simu.” Fraze neʼe refere ba ema neʼebé halo Maromak kontente tanba sira tau fiar ba Maromak no Jesus neʼebé nia haruka mai. Fraze neʼe la hatudu katak Maromak simu ema hotu, inklui ema neʼebé hatudu atitude no hahalok la diʼak. Fraze neʼe mós la refere ba ema neʼebé hatudu deʼit laran-diʼak. Tradusaun balu, hanesan King James Version iha lian Inglés, tradús fraze neʼe nuʼudar “laran-diʼak ba ema”. Maibé, manuskritu Gregu sira neʼebé antigu liu fó ideia hanesan ho Bíblia Tradusaun Mundu Foun, no tradusaun barak seluk mós fó ideia kona-ba dame ba ema neʼebé Maromak simu.—Haree “ Lucas 2:14 husi tradusaun seluk”.

 Lucas kapítulu 2 konta kona-ba Jesus nia moris bainhira nia kiʼik hela. Bainhira Jesus moris, anju ida mosu ba bibi-atan sira neʼebé “hein hela sira-nia bibi-lubun iha rai-luan durante kalan tomak”. b (Lucas 2:4-8) Anju neʼe fó sai “liafuan diʼak neʼebé sei lori ksolok boot”, no hatete: “Ohin, salvadór ida moris ona ba imi iha David nia sidade, nia mak Kristu no Naʼi.” (Lucas 2:9-11) Anju neʼe fó-hatene bibi-atan sira kona-ba fatin neʼebé sira bele hetan bebé neʼe, tuirmai anju lubun boot mosu no hahiʼi Maromak. Bibi-atan sira-neʼe bá Belein, no hetan Maria, José no kosok-oan Jesus. (Lucas 2:12-16) Bibi-atan sira konta sira-nia esperiénsia furak, depois sira fila fali ba sira-nia bibi-lubun nuʼudar sira “fó glória no hahiʼi Maromak tanba buat hotu neʼebé sira rona no haree”.—Lucas 2:17-20.

 “Glória ba Maromak iha fatin aas liu, no dame iha mundu ba ema nebee Maromak kontenti ho sira!”—Lucas 2:14, Bíblia Kadi Kapasidade.

 Haree vídeo badak neʼe hodi komprende kona-ba livru Lucas.