“Hanorin labarik atu laʼo iha dalan neʼebé diʼak ba nia; bainhira nia sai boot, nia sei la sees husi dalan neʼe.”—Provérbios 22:6, Tradusaun Mundu Foun.

 “Foo treinu ba labarik ida atu lao tuir dalan nebee loos, no bainhira nia ema idade, nia sei la husik dalan nee.”—Provérbios 22:6, Bíblia Kadi Kapasidade.

 Inan-aman neʼebé hanorin sira-nia oan atu hadomi Maromak no respeitu ninia ukun-fuan sira bele fiar katak treinamentu neʼe sei fó ajuda oan sira iha sira-nia moris tomak.

 “Hanorin labarik atu laʼo iha dalan neʼebé diʼak ba nia.” Liafuan sira-neʼe mós bele signifika “halo labarik komesa laʼo iha dalan neʼebé loos”. Versíkulu barak iha livru Provérbios enkoraja inan-aman atu hanorin oan kona-ba buat neʼebé loos no sala husi kiʼik kedas. (Provérbios 19:18; 22:15; 29:15) Maibé, inan-aman neʼebé nakonu ho domin rekoñese katak sira-nia oan mós iha liberdade atu hili hanesan ema neʼebé boot ona. Entaun duké fó-hatene deʼit sira-nia oan kona-ba saida mak sira presiza halo, sira hanorin no ajuda oan atu sai ema neʼebé maduru, bele kaer responsabilidade no bele halo rasik desizaun neʼebé diʼak.—Deuteronómio 6:6, 7; Koloso 3:21.

 Matenek-naʼin balu kona-ba Bíblia hanoin katak liafuan neʼe signifika “treinu labarik tuir ninia hahalok rasik”. Karik neʼe rona hanesan lójiku, maibé fraze iha lian Ebraiku neʼebé tradús nuʼudar “iha dalan neʼebé diʼak ba nia”, neʼe refere ba dalan moris nian neʼebé diʼak no loos. Livru Provérbios temi dalan rua neʼebé ema bele hili atu moris tuir. Dalan ida mak “ema diʼak nia dalan”, “dalan matenek nian”, no “dalan neʼebé loos”. (Provérbios 2:20; 4:11; 23:19) Dalan seluk fali temi nuʼudar “ema laran-aat sira-nia dalan”, “ema beik nia dalan”, no “dalan neʼebé sala”. (Provérbios 4:14; 12:15; 16:29) Nuneʼe, “dalan neʼebé diʼak” ba oan refere ba “dalan loos”, neʼe mak dalan moris neʼebé Maromak nia Liafuan Bíblia hanorin.—Salmo 119:105.

 “Bainhira nia sai boot, nia sei la sees husi dalan neʼe.” Bainhira inan-aman hanorin sira-nia oan kona-ba Maromak nia morál, dala barak oan neʼe sei laʼo iha dalan loos durante ninia moris tomak. Neʼe la dehan katak oan ida neʼebé simu treinu ho didiʼak sei nunka sees husi dalan loos ka laʼo sees husi Maromak nia ukun-fuan. Porezemplu, se ema ida gasta tempu ho ema neʼebé gosta halo buat neʼebé la diʼak, karik nia sei husik “dalan loos” no halo buat neʼebé sala. (Provérbios 2:12-16; 1 Korinto 15:33) Maski neʼe bele akontese, bainhira inan-aman treinu sira-nia oan atu halo tuir Maromak nia morál, inan-aman fó oportunidade diʼak liu ba oan sira atu hetan susesu iha sira-nia moris.—Provérbios 2:1, 11.

 Provérbios kapítulu 22 iha liafuan murak sira neʼebé tau hamutuk neʼebé haleno Maromak nia matenek kona-ba situasaun oioin iha moris. Liafuan murak sira-neʼe énfaze katak iha reputasaun neʼebé diʼak iha Jeová a nia haree mak folin boot, neʼe mak buat neʼebé ema bele hetan liuhusi hatudu haraik an, laran-diʼak no badinas. (Provérbios 22:1, 4, 9, 29) Maibé, eskritura seluk hatudu katak ema sira neʼebé la halo tuir Maromak nia morál no trata ema kiak iha dalan neʼebé aat sei hetan konsekuénsia la diʼak.—Provérbios 22:8, 16, 22-27.

 Maski laʼós versíkulu hotu iha Provérbios kapítulu 22 mak refere ba treinu oan sira, maibé versíkulu sira-neʼe hatudu duni dalan moris neʼebé Maromak simu no oinsá hetan kontente neʼebé loos. (Provérbios 22:17-19) Hodi fó treinu ba sira-nia oan atu moris tuir dalan neʼe, inan-aman hatudu katak sira hakarak buat neʼebé diʼak liu ba sira-nia oan.—Éfeso 6:1-3.

 Haree vídeo badak neʼe hodi komprende kona-ba livru Provérbios.