“Sala nia kolen mak mate, maibé prezente neʼebé Maromak fó mak moris rohan-laek liuhusi Kristu Jesus ita-nia Naʼi.”—Roma 6:23, Tradusaun Mundu Foun.

 “Basa sala nia kolen mak mate, maibe Maromak nia presente mak moris rohan laek iha Kristu Jesus, ita Naʼi.”—Roma 6:23, Liafuan diak ba imi, segunda edisaun.

 Apóstolu Paulo esplika katak ema mate tanba sira sala-naʼin. Maibé, Maromak oferese prezente furak ba ninia povu neʼebé laran-metin, neʼe mak moris rohan-laek.

 “Sala nia kolen mak mate.” Ema hotu moris mai la perfeitu, tan neʼe fasil atu halo sala. a (Salmo 51:5; Eclesiastes 7:20) Tanba moris mai nuʼudar ema sala-naʼin, ita hotu sai ferik-katuas no mate.—Roma 5:12.

 Atu esplika kona-ba pontu neʼe, Paulo kompara sala hanesan patraun neʼebé selu kolen ka saláriu ba ninia serbisu-naʼin. Hanesan serbisu-naʼin sei simu kolen ba ninia serbisu, nuneʼe mós ita sei simu mate nuʼudar kolen tanba ita-nia kondisaun la perfeitu.

 Maibé Paulo mós esplika katak “ema neʼebé mate, nia selu ona tusan hotu ba ninia sala”. (Roma 6:7) Bainhira ema ida mate, nia sai livre husi sala hotu neʼebé nia halo ona. Tan neʼe la iha razaun atu hanoin katak ema neʼebé mate ona sei kontinua terus iha fatin ruma tanba sala neʼebé sira halo antes sira mate. Tuir loloos, Bíblia fó sai ho klaru katak ema neʼebé mate ona la iha hanoin, labele halo buat ruma, no labele sente buat ida.—Eclesiastes 9:5.

 “Maibé prezente neʼebé Maromak fó mak moris rohan-laek liuhusi Kristu Jesus.” La hanesan ho “kolen” neʼebé ita hetan husi sala, Maromak oferese moris rohan-laek nuʼudar prezente. Liafuan orijinál husi “prezente” bele mós tradús nuʼudar “prezente neʼebé ita la merese simu” ka “prezente neʼebé fó ho laran-luak”. Neʼe refere ba buat ruma neʼebé ita simu laʼós tanba ita mak hakaʼas an atu hetan. La iha ema sala-naʼin ida neʼebé merese simu salvasaun no moris rohan-laek. (Salmo 49:7, 8) Maibé, Maromak fó prezente folin-boot tebes ba ema neʼebé hatudu fiar ba Jesus, neʼe mak moris rohan-laek.—João 3:16; Roma 5:15, 18.

 Paulo hakerek karta neʼe ba ema Kristaun iha Roma maizumenus iha tinan 56 E.C. Ema Kristaun balu iha tempu neʼebá iha hanoin sala kona-ba Maromak nia laran-sadiʼa. Tanba hetan influénsia husi ema Gregu nia filozofia, sira hanoin katak se sira halo sala barak liután, sira sei hetan benefísiu liután husi Maromak nia laran-sadiʼa. (Roma 6:1) Ema seluk fali hanoin katak sira sei la hetan kastigu ba sira-nia sala tanba sira laʼós tan iha Moisés nia Ukun-Fuan okos. (Roma 6:15) Iha karta neʼe, Paulo fó sai ho klaru katak ema Kristaun sei la hetan Maromak nia laran-sadiʼa se sira kontinua halo sala.—Roma 6:12-14, 16.

 Paulo nia liafuan fó kmaan ba Maromak nia atan sira ohin loron, katak maski sira moris mai iha sala nia laran, sira sei iha esperansa. Se sira halo tuir Maromak nia standar kona-ba morál no la monu ba hakarak neʼebé sala, Maromak promete atu fó moris rohan-laek.—Roma 6:22.

 Haree vídeo badak neʼe hodi komprende kona-ba livru Roma.