“Haksolok bá tanba Jeová, no nia sei fó ba ó buat neʼebé ó-nia laran hakarak.”—Salmo 37:4, Tradusaun Mundu Foun.

 “Sai kontenti iha NAI, no Nia sei foo ba o buat nebee o nia fuan laran hakarak.”—Salmu 37:4, Bíblia Kadi Kapasidade.

 Ema neʼebé hakerek salmo neʼe anima Maromak nia atan sira atu sente haksolok tanba iha relasaun diʼak ho Maromak. Ema hotu neʼebé sai belun ho Maromak Jeová a bele fiar katak Nia sei kumpre buat neʼebé sira husu se neʼe tuir Ninia hakarak.

 “Haksolok bá tanba Jeová.” Liafuan neʼe bele mós tradús nuʼudar “hetan ó-nia haksolok boot liu iha Jeová”, “haksolok bá hodi serbí NAʼI”, ka “haksolok tanba buat neʼebé NAʼI promete ba ó”. Neʼe katak, ita presiza “hetan ksolok boot liu” hodi adora Maromak neʼebé loos. (Salmo 37:4, nota) Tanbasá mak ita bele hatete hanesan neʼe?

 Iha situasaun naran deʼit, ema neʼebé adora Jeová hanoin tuir Ninia hanoin neʼebé fó sai ona iha Bíblia. Sira laʼós deʼit hatene Maromak, maibé mós iha matenek atu halo tuir nia. Rezultadu mak sira mantein konxiénsia neʼebé diʼak no sees husi desizaun aat neʼebé ikusmai lori susar ba sira-nia moris. (Provérbios 3:5, 6) Porezemplu, kuandu ema neʼebé kaan-teen ka bosok-teen mak haree hanesan hetan susesu, Maromak nia atan sira sei la husik sentimentu hirus ka laran-moras atu halakon dame iha sira-nia laran. (Salmo 37:1, 7-9) Maromak nia povu sente kontente tanba hatene katak Nia sei hadiʼa situasaun hotu neʼebé la iha justisa no fó kolen ba ema laran-metin neʼebé hatudu hahalok diʼak. (Salmo 37:34) Sira mós sente haksolok tanba hatene katak sira-nia Aman iha lalehan mak simu sira.—Salmo 5:12; Provérbios 27:11.

 “Nia sei fó ba ó buat neʼebé ó-nia laran hakarak.” Fraze neʼe bele mós tradús nuʼudar “nia sei hatán ba ó-nia orasaun”. Klaru, Jeová sei la fó buat naranaran deʼit neʼebé ita husu. Hanesan inan-aman neʼebé diʼak, Jeová hatene buat neʼebé diʼak liu ba Ninia oan sira. Liután neʼe, buat neʼebé ita husu no dalan neʼebé ita halaʼo ita-nia moris tenkesér tuir Jeová nia hakarak no ninia standard. (Provérbios 28:9; Tiago 4:3; 1 João 5:14) Kuandu ita halo nuneʼe, ita bele hatoʼo ita-nia hakarak ba “Maromak neʼebé rona ba orasaun” hodi fiar metin katak nia sei rona ita.—Salmo 65:2; Mateus 21:22.

 Salmo 37 mak knananuk husi Liurai David iha nasaun Izraél antigu. Nia hakerek salmo neʼe hodi tuir alfabetu. b

 Dala barak David hasoru situasaun neʼebé la iha justisa. Nia tenke halai sees husi Liurai Saul no ema seluk neʼebé hakarak oho nia. (2 Samuel 22:1) Maibé David sempre tau fiar tomak ba ninia Maromak. David hatene katak ikusmai Jeová sei fó kastigu ba ema aat sira. (Salmo 37:10, 11) Maski ema aat sira haree hanesan moris diʼak agora, tuir loloos sira mak hanesan “duʼut matak” neʼebé ikusmai sai namlaek no mate.—Salmo 37:2, 20, 35, 36.

 Salmo 37 fó sai buat neʼebé sei akontese ba ema neʼebé halo tuir Maromak nia matadalan no mós rezultadu ba ema neʼebé lakohi halo tuir Maromak. (Salmo 37:16, 17, 21, 22, 27, 28) Salmo neʼe ajuda ita atu aumenta matenek no sai ema neʼebé Maromak simu.

 Haree vídeo badak neʼe hodi komprende kona-ba livru Salmo.