Ita-nia oan-mane tanis no dehan: “Haʼu labele halo ida-neʼe! Neʼe susar tebes! Haʼu sei nunka bele halo ida-neʼe!” Nia lalais rende an atu halo buat neʼebé difisil ba nia. Ita la kontente haree Ita-nia oan hanesan neʼe. Maibé Ita hakarak Ita-nia oan aprende oinsá atu hasoru susar. Ita sei koko atu ajuda kedas nia ka lae? Ita sei husik deʼit nia para? Ka Ita sei hanorin Ita-nia oan atu la rende an bainhira halo buat ruma maski difisil?

 Hahalok la rende an mak importante. Kuandu inan-aman hanorin sira-nia oan atu haburas oan nia abilidade liuhusi serbisu makaʼas, oan neʼe iha posibilidade liután atu hetan rezultadu diʼak iha eskola, iha saúde emosaun no fíziku nian neʼebé diʼak, no iha relasaun diʼak ho ema seluk. Maibé, se inan-aman la husik sira-nia oan atu hasoru difikuldade no falla, oan neʼe sei lalais atu hetan depresaun, hanoin katak nia la iha abilidade, no halaʼo moris neʼebé ladún kontente kuandu nia sai boot.

 Ita bele haburas hahalok la rende an. Oan neʼebé kiʼik tebes mós bele haburas hakarak atu koko halo buat sira neʼebé susar no rezolve problema. Peskiza ida hatudu katak bebé sira neʼebé fulan 15 sei koko makaʼas atu halo buat neʼebé difisil, se sira haree uluk ema boot ida la rende atu halo buat ruma neʼebé susar, duké ema neʼebé konsege halo buat ruma ho fasil deʼit.

 “Haʼu hanoin-hetan tempu neʼebé haʼu hanorin haʼu-nia oan-feto sira oinsá atu kesi sira-nia sapatu talin. Neʼe laʼós abilidade neʼebé bele aprende iha loron ida deʼit nia laran. Dala ida-idak neʼebé sira kesi sapatu talin, sira sei tuur mesak ba minutu 10 toʼo 15 atu hanoin-hetan oinsá atu kesi. Depois neʼe haʼu sei ajuda sira. Sira koko neʼe ba fulan balu no dala ruma sira estrese tebes toʼo tanis, maibé ikusmai sira hatene oinsá atu kesi sapatu talin. Tuir loloos, haʼu bele deʼit sosa sapatu neʼebé la iha talin ba sira tanba neʼe fasil liu. Maibé dala ruma, inan-aman mak presiza hatudu hahalok la rende an hodi hanorin sira-nia oan kona-ba hahalok la rende an.”—Colleen.

 Hahalok la rende an bele sai fraku. Inan-aman balu la ho neon halo fraku sira-nia oan nia abilidade kona-ba hahalok la rende an. Oinsá? Karik inan-aman balu ajuda kedas sira-nia oan hodi oan sira la sente estrese ka sente falla. Maibé ajuda hanesan neʼe bele lori impaktu neʼebé la diʼak ba oan. Hakerek-naʼin ida naran Jessica Lahey hatete: “Dala ida-idak neʼebé ita salva . . . ita-nia oan sira husi buat neʼebé susar, ita hatudu ba sira katak sira la iha kapasidade no abilidade atu halo buat ruma, no ita la tau fiar ba sira.” a Rezultadu mak saida? Labarik sira sei rende an lalais deʼit iha futuru bainhira hasoru susar oioin, no sira sei sente katak sira sempre presiza ema boot nia ajuda.

 Enkoraja atu halo serbisu ho badinas. Inan-aman bele hanorin sira-nia oan hahalok la rende an lalais hodi fó knaar ruma neʼebé tuir sira-nia idade. Porezemplu, oan sira neʼebé tinan tolu toʼo lima bele ajuda atu lulun roupa no arruma rasik sira-nia brinkedu. Labarik sira neʼebé boot ona bele ajuda atu arruma ai-han no sasán neʼebé ita kompras, prepara no arruma meza, soe lixu, no hamoos buat balu neʼebé foʼer. Joven sira bele halo knaar neʼebé susar uitoan hanesan limpeza, halo manutensaun, no hadiʼa buat ruma. Dala ruma oan sira lakohi atu halo knaar ruma, maibé sira sei hetan benefísiu kuandu inan-aman fó knaar balu ba sira husi kiʼik kedas. Oinsá mak oan sira hetan benefísiu? Sira aprende atu halo serbisu ho badinas, no neʼe sei ajuda sira atu la rende an kuandu halo serbisu neʼebé susar bainhira sira sai boot ona.

 Bíblia nia prinsípiu: “Serbisu makaʼas hotu sei lori buat diʼak.”—Provérbios 14:23.

 “Keta fó serbisu ba oan sira tan deʼit ita hakarak halo sira okupadu. La iha ema ida mak gosta ida-neʼe. Fó knaar ruma neʼebé diʼak ba sira no tuir sira-nia presiza. Se Ita-nia oan mak kiʼik, husu nia atu hamoos armáriu, meza ka kadeira tuir sira-nia aas. Se Ita fase hela karreta, husu nia atu fase parte kraik neʼebé susar ba Ita atu hamoos. Tuirmai Ita bele gaba Ita-nia oan katak nia serbisu ho badinas.”—Chris.

 Ajuda Ita-nia oan kuandu nia halo serbisu neʼebé susar. Dala ruma labarik sira rende an lalais tanba sira la hatene oinsá atu halo serbisu toʼo remata. Entaun kuandu hanorin serbisu foun ba Ita-nia oan, Ita bele koko métodu tuirmai. Primeiru, Ita rasik halo serbisu neʼe iha ninia oin atu nia bele haree uluk. Depois, halo serbisu neʼe hamutuk. Tuirmai, husu Ita-nia oan atu halo serbisu neʼe nuʼudar Ita haree nia no fó sujestaun neʼebé bele ajuda nia. Ikusliu, husu Ita-nia oan atu halo mesak serbisu neʼe toʼo remata.

 Bíblia nia prinsípiu: “Haʼu fó ezemplu ba imi, hodi nuneʼe imi mós tenke halo tuir buat neʼebé haʼu halo.”—João 13:15.

 “Tuir haʼu-nia esperiénsia, se ita hakarak ita-nia oan atu sai ema neʼebé la rende an lalais, ita nuʼudar inan-aman mak presiza hatudu ezemplu diʼak ba sira. Ita presiza hatudu hahalok neʼebé ita hakarak oan sira atu haburas.”—Doug.

 Ajuda Ita-nia oan atu simu realidade katak normál atu sente susar no falla. Konta ba Ita-nia oan kona-ba tempu neʼebé Ita halo buat ruma neʼebé difisil tebes, maibé Ita koko nafatin no hetan benefísiu tanba la rende an. Esplika ba Ita-nia oan katak normál se ita sente susar bainhira halo buat ruma neʼebé foun, no se nia halo sala, neʼe sei ajuda nia atu aprende lisaun ruma. Fó-hatene Ita-nia oan katak bainhira nia falla, neʼe la hamenus Ita-nia domin ba nia. Hanesan múskulu bele sai boot kuandu uza beibeik, Ita-nia oan nia abilidade atu la rende an sei aumenta se Ita husik nia atu hasoru susar oioin. Entaun kuandu Ita-nia oan hasoru susar, duké ajuda kedas nia, diʼak liu fó tempu ba nia atu koko halo buat ruma maski nia sai estrese. Livru How Children Succeed, hatete: “Dalan diʼak liu ba joven sira atu sai ema neʼebé maduru no forsa mak hodi koko atu halo buat ruma neʼebé karik iha posibilidade boot katak nia sei falla.”

 Bíblia nia prinsípiu: “Diʼak se mane ida lori naha todan durante ninia tempu joven.”—Lamentasaun 3:27.

 “Kuandu ita husik ita-nia oan atu koko halo buat ruma neʼebé susar ba tempu balu, no se nia hatene katak ninia amá no apá prontu atu ajuda nia, neʼe sei fó benefísiu ba oan. Liutiha tempu balu, sira sei la sente tan susar no sira sei hetan abilidade no fiar katak hahalok la rende an sei lori duni rezultadu diʼak.”—Jordan.

 Gaba oan nia hakaʼas an, laʼós ninia matenek. Porezemplu, duké hatete: “Ó halo diʼak loos! Ó matenek loos.” Diʼak liu dehan: “Ó halo diʼak loos! Haʼu kontente tebes tanba ó estuda makaʼas.” Tanbasá importante atu gaba oan nia hakaʼas an duké ninia matenek? Dr. Carol Dweck hatete katak gaba oan nia matenek “halo oan duvida kona-ba ninia an bainhira nia komesa hasoru susar ka buat ruma la laʼo ho susesu. Se inan-aman hakarak fó buat neʼebé diʼak ba sira-nia oan, buat diʼak liu neʼebé sira bele halo mak hanorin oan atu gosta halo buat neʼebé susar, hakarak aprende husi sala, kontente ho serbisu makaʼas, koko dalan foun atu halo buat ruma, no kontinua aprende. Se inan-aman halo nuneʼe, sira-nia oan sei la kaan atu hetan gaba.” b

 Bíblia nia prinsípiu: “Liafuan gaba neʼebé hatoʼo ba ema ida bele koko nia.”—Provérbios 27:21.