Ita-nia oan hatete katak nia hetan susar ka bully iha eskola. Saida mak Ita sei halo? Ita sei fó-hatene kedas ba mestre iha eskola atu kastigu labarik neʼebé bully nia? Hanorin Ita-nia oan atu vinga fali? Antes Ita halo desizaun, hanoin toʼok buat balu tuirmai neʼe.

•  Haʼu presiza hatene saida kona-ba bully?

•  Oinsá haʼu bele ajuda?

 Saida mak bully? Bully mak asaun neʼebé halo buat ruma la para no ho neon atu haterus ema seluk iha dalan fíziku ka emosaun. Laʼós hahalok aat ka insulta hotu mak bully.

 Nuʼudar inan-aman, importante tebes atu hatene saida mak bully. Tanbasá? Tanba ema balu uza liafuan bully atu refere ba hahalok hotu neʼebé la diʼak, inklui mós buat kiʼik sira. Maibé se Ita hakarak kedas envolve an iha problema kiʼik hotu neʼebé Ita-nia oan hasoru, ikusmai Ita-nia oan sei la aprende oinsá atu rezolve problema. Tuir loloos, neʼe mak abilidade importante ida ba ninia futuru.

 Bíblia nia prinsípiu: “Keta sente an lalais.”​—Eclesiastes 7:9.

 Pontu importante: Iha situasaun balu, inan-aman presiza duni atu rezolve. Maibé iha mós situasaun balu neʼebé fó oportunidade ba oan sira atu aprende oinsá atu tahan no rezolve problema ho ema seluk.​—Koloso 3:13.

 Maibé se Ita-nia oan kontinua sai vítima, saida mak Ita bele halo?

•   Rona didiʼak. Kuandu Ita-nia oan koʼalia, koko atu buka-hatene (1) saida mak akontese no (2) tanbasá mak ema bully nia. Keta foti kedas konkluzaun antes hatene faktu hotu. Karik Ita presiza koʼalia uluk ho ninia mestre ka mestra ka labarik sira seluk nia inan-aman atu nuneʼe bele hatene ho loloos saida mak akontese.

   Bíblia nia prinsípiu: “Kuandu ema ida hatán kedas antes nia rona buat hotu, neʼe mak hahalok beik no sei hamoe nia an rasik.”​—Provérbios 18:13.

•   Se Ita-nia oan hasoru daudaun bully, ajuda nia atu komprende katak ninia reasaun bele hadiʼa ka bele mós aumenta problema. Porezemplu, Bíblia hatete: “Hatán ho liafuan mamar sei hatún hirus, maibé liafuan neʼebé makaʼas halo ema hirus liután.” (Provérbios 15:1) Loos duni, hahalok vinga bele halo situasaun sai aat liu, no bele halo labarik seluk fó susar makaʼas liután ba Ita-nia oan.

   Bíblia nia prinsípiu: “Keta selu aat ho aat ka liafuan kroʼat ho liafuan kroʼat.”​—1 Pedro 3:9.

•   Esplika ba Ita-nia oan katak nia laʼós ema neʼebé taʼuk-teen se nia la kontra fali. Neʼe hatudu katak nia aten-brani tanba la husik ema seluk mak kontrola ninia hahalok. Neʼe hanesan Ita-nia oan sei manán hasoru ema neʼebé bully nia hodi la sai hanesan ema neʼe.

   Ida-neʼe importante liuliu kuandu Ita-nia oan hetan bully husi média sosiál. Se nia responde ka tau komentáriu neʼebé makaʼas, neʼe hanesan fó razaun ba ema neʼebé bully nia atu kontinua ninia hahalok, no aat liután mak Ita-nia oan rasik mós sai fali ema neʼebé bully ema seluk! Tan neʼe, baibain dalan diʼak liu atu responde mak keta responde fali. Rezultadu mak ema neʼebé bully Ita-nia oan karik la provoka tan Ita-nia oan tanba Ita-nia oan la responde fali.

   Bíblia nia prinsípiu: “Ahi sei mate kuandu la iha ai.”​—Provérbios 26:20.

•   Dala ruma, Ita-nia oan bele hadook an husi fatin ka ema neʼebé baibain bully nia. Porezemplu, se Ita-nia oan hatene fatin neʼebé ema sempre fó susar ba ema seluk, nia bele laʼo liuhusi fatin seluk atu la kona problema.

   Bíblia nia prinsípiu: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.”​—Provérbios 22:3.

 KOKO TOʼOK: Ajuda Ita-nia oan atu hanoin kona-ba rezultadu diʼak no la diʼak bainhira nia halo buat tuirmai neʼe. Porezemplu:

•  Saida mak sei akontese se nia la responde ba ema neʼebé bully nia?

•  Oinsá se nia koʼalia makaʼas ba ema neʼe atu para?

•  Oinsá se nia kesar ba mestre ka mestra?

•  Nia bele hatudu laran-diʼak ka koʼalia liafuan halimar atu halo kalma ema neʼebé bully nia ka lae?

 Ita-nia oan bele hetan bully liuhusi média sosiál ka bele mós oin ba oin no situasaun ida-idak la hanesan, tan neʼe dalan atu ajuda Ita-nia oan hasoru problema mós la hanesan. Fó-hanoin Ita-nia oan katak Ita sei nafatin ajuda no apoia nia.

 Bíblia nia prinsípiu: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”​—Provérbios 17:17.