Ita-nia kaben hatete katak nia hanoin barak kona-ba Ita-nia toman atu hemu tua ka lae? Se nuneʼe, iha buat balu neʼebé Ita presiza hanoin didiʼak.

Iha informasaun neʼe

•  Hemu tua demais bele lori problema ba moris kaben

•  Ita sadere demais ba tua ka lae?

•  Labele nega

•  Buat neʼebé Ita bele halo

 Hemu tua barak demais bele lori problema oioin ba saúde, inklui moras-fuan, moras-aten, no kankru. Maibé hemu tua barak laʼós deʼit lori problema ba saúde, neʼe mós bele lori problema ba moris kaben nian hanesan violénsia doméstika, problema ho osan, la laran-metin ba Ita-nia kaben, no divórsiu.

 Bíblia hatete katak kuandu ema ida hemu tua demais, ikusmai “ida-neʼe sei tata [nia] hanesan samea, no sei hasai venenu hanesan samea venenu”. (Provérbios 23:32) Oinsá mak Ita hatene katak Ita sadere demais ba tua?

 Pergunta tuirmai bele ajuda Ita atu hatene se Ita sadere demais ba tua ka lae:

•   Susar ba Ita atu kontrola Ita-nia an kona-ba hemu tua ka lae?

•   Ita hanoin beibeik bainhira mak Ita sei hemu tua fali ka lae?

•   Ita hemu tua maski neʼe hamosu problema oioin ba Ita rasik no Ita-nia moris kaben ka lae?

•   Kuandu Ita koko atu para hemu tua, Ita hetan sintoma moras oioin ka lae?

•   Bainhira Ita hemu tua, neʼe hamosu diskute malu ho Ita-nia kaben ka lae?

•   Ita bele hemu tua barak liu duké iha pasadu ka lae?

•   Ita hemu tua subasubar ka subar tua iha uma ka iha serbisu-fatin?

 Se ita-nia resposta mak sin ba pergunta ida ka liu, karik Ita sadere demais ona ba tua ka sai ona atan ba tua.

 Ita-nia kaben hatete katak nia hanoin barak kona-ba Ita-nia toman atu hemu tua ka lae? Se nuneʼe, karik Ita esplika hodi fó razaun oioin atu hatudu katak neʼe laʼós problema ida. Karik Ita fó sala ba ema seluk, inklui Ita-nia kaben, hodi hatete liafuan sira hanesan tuirmai neʼe:

•   “Se Ita trata haʼu ho didiʼak, haʼu sei la presiza hemu tua.”

•   “Se Ita halo serbisu susar hanesan haʼu-nian, Ita mós sei hemu tua.”

•   “Haʼu koñese ema barak neʼebé hemu tua barak liu fali haʼu.”

 Se Ita mak koʼalia hanesan neʼe, karik Ita tau uluk Ita-nia hakarak atu hemu tua liu fali Ita-nia moris kaben nian neʼebé kontente. Maibé tuir loloos, ida-neʼebé mak importante liu?

 Bíblia nia prinsípiu: “Ema neʼebé kaben ona hanoin liu kona-ba . . . oinsá atu halo ninia feen kontente.”—1 Korinto 7:33.

•   Tau atensaun didiʼak ba buat neʼebé Ita-nia kaben hatete. Se Ita-nia kaben hanoin demais kona-ba problema neʼe, Ita bele halo mudansa balu ka lae? Se Ita labele halo mudansa no kontinua hemu tua maski Ita-nia kaben laran-taridu kona-ba ida-neʼe, karik neʼe mak sinál neʼebé hatudu katak Ita iha problema kona-ba hemu tua.

   Bíblia nia prinsípiu: “Ema ida-idak tenke kontinua buka uluk ema seluk nia diʼak, laʼós buka diʼak deʼit ba ninia an.”—1 Korinto 10:24.

•   Aprende kona-ba faktu sira. Atu manán funu ida, soldadu sira presiza hatene inimigu nia estratéjia atu ataka. Hanesan neʼe mós, atu manán Ita-nia fraku kona-ba hemu tua, Ita presiza hatene faktu oioin husi problema hemu tua demais no oinsá ida-neʼe bele halo ema sai atan ba tua. Ita mós presiza aprende estratéjia neʼebé bele ajuda Ita atu manán hasoru problema kona-ba hemu tua barak demais no ajuda Ita atu la hemu tan iha futuru.

   Bíblia nia prinsípiu: “Kontinua hasees an husi hakarak isin nian neʼebé halo funu kontra imi.”—1 Pedro 2:11.

•   Buka ajuda. Iha programa saúde nian oioin neʼebé fokus atu ajuda ema neʼebé iha problema ho tua, neʼe inklui programa rekuperasaun, sentru tratamentu, no ospitál sira. Ita mós bele koʼalia ho belun neʼebé maduru atu ajuda Ita hatene se iha razaun seluk neʼebé halo Ita sai dependente ba tua. Ita mós bele kontaktu ema neʼe hodi husu ajuda se Ita hetan tentasaun atu fila fali ba toman uluk nian.

   Bíblia nia prinsípiu: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.

 Hemu tua barak demais mak problema komplikadu ida neʼebé labele rezolve hodi lee deʼit informasaun balu, no Ita mós labele manán hasoru toman neʼe hodi dehan: “Haʼu sei koko atu hemu uitoan deʼit.” Maibé, Ita tenke hatene katak buat neʼebé Ita halo atu hasoru problema neʼe sei fó impaktu ba Ita-nia saúde fíziku no mós Ita-nia moris kaben.

 Atu hatene liután: Lee informasaun sira tuirmai atu aprende kona-ba oinsá ema balu manán ona sira-nia toman kona-ba hemu tua demais.

 “Haʼu laʼós tan ema siʼak-teen”

 “Haʼu la moe ona ho haʼu-nia an”

 “Dalan sira sai fali haʼu-nia hela-fatin”

 No mós, haree vídeo ‘Haʼu baruk ona ho haʼu-nia moris uluk’