Inan-aman balu neʼebé serbisu deside atu husik sira-nia oan neʼebé sei kiʼik iha fatin neʼebé ema bele tau matan. Fatin sira-neʼe baibain atu hanesan ho eskola. Neʼe diʼak ba Ita-nia oan ka lae?

•  Pergunta neʼebé Ita presiza husu

•  Saida mak Ita bele halo

 Neʼe fó impaktu la diʼak ba haʼu-nia relasaun ho haʼu-nia oan ka lae? Bele. Durante labarik ida sei kiʼik, ninia kakutak lalais deʼit atu dezenvolve, no neʼe afeta ninia relasaun ho ema seluk. Saida mak akontese durante nia sei kiʼik sei kona ninia moris tomak. Tan neʼe, diʼak atu uza tempu barak liu ho Ita-nia oan bainhira nia sei kiʼik.—Deuteronómio 6:6, 7.

•    Antes atu husik oan ba ema seluk mak tau matan, hanoin kona-ba oinsá mak Ita bele nafatin iha relasaun besik ho oan.

 Ikusmai haʼu-nia oan sei rona liu ema seluk duké rona mai haʼu ka lae? Neʼe bele akontese. Livru Hold On to Your Kids hatete: “Labarik neʼebé gasta tempu barak liu ho labarik seluk, ikusmai sei hetan influénsia barak liu husi sira.”

•    Antes atu husik oan ba ema seluk mak tau matan, hanoin kona-ba Ita nafatin bele fó influénsia ba sira nuʼudar inan-aman ka lae.

 Ita-nia oan sei sai matenek liu no prontu atu tama eskola ka lae? Ema balu dehan sin, maibé ema balu hatete katak maski ema seluk mak atu tau matan mós la fó impaktu ba labarik nia kapasidade atu aprende. Maski nuneʼe, psikolojia kona-ba labarik naran Penelope Leach, hatete: “Labele hanoin katak ‘edukasaun’ mak xave ba labarik atu hetan susesu. No labele hanoin katak se labarik eskola lalais, neʼe diʼak liu. Tanbasá? Tanba se Ita sente hanesan neʼe, tuir loloos Ita la hafolin benefísiu husi ‘edukasaun’ neʼebé Ita fó ba Ita-nia oan husi tempu neʼebé nia moris mai.”

•   Antes atu husik oan ba ema seluk mak tau matan, hanoin kona-ba neʼe lori benefísiu ka neʼe presiza duni.

 Ita ka Ita-nia kaben bele tau matan rasik ba Ita-nia oan ka lae? Dala ruma, inan-aman serbisu tan deʼit sira hakarak hetan osan barak liután no moris diʼak. Maibé neʼe lori diʼak duni ba oan ka lae?

•   Antes atu husik oan ba ema seluk mak tau matan, hanoin kona-ba imi bele ka lae hamenus gastu ruma atu nuneʼe imi ida bele tau matan ba oan.

 Antes atu foti desizaun, diʼak atu hanoin uluk kona-ba rezultadu diʼak no aat. Maibé, oinsá se Ita nafatin sente katak Ita presiza duni atu ema seluk mak tau matan ba Ita-nia oan?

 Bíblia hatete katak “ema neʼebé matenek hanoin didiʼak kona-ba ninia hakat ida-idak”. (Provérbios 14:15) Tan neʼe, diʼak atu buka informasaun oioin antes halo desizaun.

 Buka-hatene kona-ba opsaun saida deʼit mak iha

•   Inan-aman balu husik oan iha fatin atu tau matan ba labarik iha ema nia uma privadu. Baibain iha ema ida ka balu deʼit mak tau matan, no labarik sira mós la barak.

•   Inan-aman balu husu ajuda ba sira-nia família ka selu ema atu matan ba sira-nia oan.

 Opsaun ida-idak mak iha diʼak no la diʼak. Husu toʼok ba inan-aman seluk neʼebé husik ona sira-nia oan ba ema seluk mak tau matan. Bíblia hatete: “Ema neʼebé buka konsellu mak iha matenek.”—Provérbios 13:10.

 Oinsá se Ita hili atu hatama Ita-nia oan iha fasilidade atu tau matan ba labarik sira? Saida deʼit mak Ita presiza hatene?

 Buka-hatene kona-ba fasilidade neʼe

•   Fasilidade neʼe hetan lisensa no tuir lei ka lae? Oinsá ho ninia reputasaun?

•   Fasilidade neʼe moos no seguru ka lae?

•   Atividade saida deʼit mak Ita-nia oan sei halo iha neʼebá? a

 Buka-hatene kona-ba ema neʼebé tau matan

•   Treinamentu saida deʼit mak sira simu ona? Neʼe inklui treinamentu atu hanorin labarik, primeiru sokorru, no ressuscitação cardiopulmonar (CPR).

•   Sira iha reputasaun neʼebé diʼak ka lae?

•   Serbisu-naʼin sira sempre troka ka lae? Se troka beibeik, neʼe katak Ita-nia oan sempre presiza adapta an ho ema foun neʼebé tau matan ba nia.

•   Serbisu-naʼin ida presiza tau matan ba labarik naʼin-hira? Se nia presiza tau matan ba labarik barak, neʼe katak Ita-nia oan sei la hetan atensaun barak. Klaru, atensaun neʼebé Ita-nia oan presiza depende ba tinan no ninia abilidade.

•   Serbisu-naʼin sira iha komunikasaun diʼak ho inan-aman sira ka lae?