Joven balu la fila ba uma tuir oras neʼebé inan-aman hatete. Joven seluk tan lohi sira-nia inan-aman, hodi bosok ka sai subasubar husi uma atu bá hasoru kolega. Se Ita-nia oan joven halo Ita lakon konfiansa ba nia, saida mak Ita bele halo?

•  Haʼu-nia oan joven mak kontradór ka lae?

•  Oinsá se haʼu-nia oan joven lohi haʼu?

•  Neʼe sé-nia sala?

•  Oinsá mak haʼu bele ajuda haʼu-nia oan sai fali ema neʼebé haʼu bele tau fiar?

•  Buat neʼebé inan-aman sira dehan

 Keta lalais atu hanoin katak nia mak kontradór. Bíblia dehan: “Hahalok beik mak metin iha joven ida nia laran”, no dala barak joven sira hatudu katak liafuan sira-neʼe mak loos duni. (Provérbios 22:15, nota-rodapé) Doutór Laurence Steinberg hakerek: “Joven sira dala ruma halo desizaun ho ansi no beik.” a

 Labele hanoin kedas katak Ita-nia oan ho neon hakarak kontra Ita. Tuir loloos, peskiza hatudu katak joven barak loloos hafolin duni sira-nia inan-aman nia hanoin kona-ba sira, maski sira-nia hahalok hatudu katak sira la hafolin. Maski Ita-nia oan la hatudu sai ida-neʼe, karik nia laran-triste kona-ba ninia hahalok rasik no mós tanba nia halo Ita triste.

•    Neʼe tanba ninia ransu ka lae? Bíblia dehan: “Ransu hamutuk ho ema aat sei estraga toman diʼak.” (1 Korinto 15:33) Tuir loloos, joven sira-nia kolega bele fó duni influénsia makaʼas ba sira. Buat seluk hanesan média sosiál no iklan mós bele fó influénsia makaʼas ba sira. No tanba joven sira ladún iha esperiénsia kona-ba moris, fasil ba sira atu halo desizaun neʼebé la matenek. Se sira aprende atu simu konsekuénsia husi sira-nia sala, ida-neʼe sei ajuda sira sai ema boot neʼebé bele kaer responsabilidade.

•    Neʼe mak haʼu-nia sala ka lae? Karik Ita hanoin Ita fó lei makaʼas liu no barak liu toʼo halo Ita-nia oan kontra Ita. Ka karik Ita hanoin Ita-nia lei sira la toʼo no nia livre liu. Duké hanoin barak katak problema neʼe mosu tanba Ita mak halo sala buat ruma, diʼak liu hanoin kona-ba saida mak Ita bele halo atu hadiʼa situasaun.

•   Kontrola Ita-nia reasaun. Ita-nia oan karik hanoin Ita sei hirus nia. Tan neʼe, oinsá se koko buat seluk. Koko koʼalia ba Ita-nia oan ho kalma kona-ba tanbasá problema neʼe mosu. Buka-hatene saida mak book nia atu halo ida-neʼe. Nia kuriozu? Baruk? Sente mesamesak? Ka tanba nia hakarak tebes atu iha kolega? Klaru katak buat sira-neʼe labele sai nuʼudar razaun, maibé neʼe sei ajuda Ita no Ita-nia oan joven komprende diʼak liután saida mak book nia atu halo ida-neʼe.

   Bíblia nia prinsípiu: “Ema hotu tenke lalais atu rona, la ansi atu koʼalia, no neineik atu hirus.”​—Tiago 1:19.

•   Ajuda Ita-nia oan atu hanoin kona-ba buat neʼebé akontese. Husu pergunta sira hanesan: Ó aprende saida husi neʼe? Se ó hasoru fali situasaun hanesan neʼe iha futuru, ó sei halo saida? Pergunta sira hanesan neʼe bele ajuda Ita-nia oan aumenta ninia kbiit atu hanoin atu bele halo desizaun neʼebé diʼak liu.

   Bíblia nia prinsípiu: “Korrije, fó avizu makaʼas no fó konsellu ho pasiénsia no ho matenek atu hanorin.”​—2 Timóteo 4:2.

•   Ajuda nia komprende katak ninia hahalok iha konsekuénsia. Fó kastigu neʼebé liga ho sala neʼebé nia halo, atu nia bele aprende husi neʼe. Porezemplu, se Ita-nia oan joven lohi Ita atu bele bá halimar ho ninia kolega sira, karik Ita bele tau limite ba tempu neʼebé nia uza ho ninia kolega sira.

   Bíblia nia prinsípiu: “Buat naran deʼit neʼebé ema kari, nia mós sei koʼa ida neʼe.”​—Galásia 6:7.

•   Fokus ba oinsá atu tau fali konfiansa ba nia. Klaru, ida neʼe presiza tempu. Maski nuneʼe, Ita-nia oan joven presiza hatene katak, ikusmai nia bele halo Ita tau fiar fali ba nia. Se Ita-nia oan joven sente katak Ita sei nunka tau fiar fali ba nia, karik nia sei rende an.

   Bíblia nia prinsípiu: “Keta halo imi-nia oan sai laran-hirus, atu nuneʼe sira la sai laran-triste.”​—Koloso 3:21.