Relatóriu ida fó sai katak porsentu 97 husi joven sira ho tinan 13 toʼo 19 uza média sosiál. Ita-nia oan mós hakarak uza média sosiál ka lae? Sé nuneʼe, iha buat balu neʼebé Ita presiza hanoin didiʼak.

Iha informasaun neʼe

•  Oinsá mak Ita-nia oan uza ninia tempu?

•  Ita-nia oan hanoin oinsá kona-ba kolega sira?

•  Oinsá ida-neʼe fó impaktu ba oan nia emosaun?

•  Ita-nia oan sei halo saida ho internét?

•  Presiza iha média sosiál ka lae?

•  Buat neʼebé inan-aman sira dehan

 Website HelpGuide dehan: “Ema kria média sosiál ho matenek hodi bele hadau Ita-nia atensaun, halo Ita sempre online, no haree fila-fila sasán eletróniku atu haree buat foun ruma.”

 “Haʼu hanoin atu haree média sosiál ba minutu balu deʼit, maibé afinál haʼu haree ba oras balu. Susar tebes atu husik telefone hodi halo buat seluk neʼebé diʼak liu.”—Lynne, tinan 20.

 Husu Ita-nia an: Haʼu-nia oan sei halo tuir tempu neʼebé haʼu deside ona kona-ba uza média sosiál ka lae? Haʼu-nia oan bele deside rasik tempu neʼebé nia sei uza média sosiál no halo tuir ninia desizaun neʼe ka lae?

 Bíblia nia prinsípiu: “Kontinua haree didiʼak oinsá imi halaʼo imi-nia moris . . . nuʼudar ema matenek. Uza didiʼak imi-nia tempu.”—Éfeso 5:15, 16.

  Ema kria “média sosiál” atu halo ita iha ligasaun ho ema oioin no sente katak ita iha kolega barak. Maibé, dala barak kolega sira-neʼe laʼós kolega neʼebé loos.

 “Haʼu nota joven barak hanoin sala katak se sira hetan “like” ka “follower” barak, neʼe katak ema barak interese ho sira, maski loloos sira ladún koñese ema sira-neʼe.”—Patricia, tinan 17.

 Husu Ita-nia an: Haʼu-nia oan komprende ka lae katak labele buka demais “follower” ka “like”? Nia hatene oinsá atu habelun ho ema neʼebé nia hasoru oin ba oin ka lae?

 Bíblia nia prinsípiu: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.

 Matenek-naʼin sira nota katak uza demais média sosiál bele halo ema sente mesamesak, laran-susar, no depresaun.

  “Haree kolega nia foto oioin neʼebé hatudu katak sira halo atividade ho sira-nia kolega, laʼós ho Ita, neʼe halo Ita sente triste.”—Serena, tinan 19.

 Husu Ita-nia an: Haʼu-nia oan sei hakaʼas an atu la hanoin an deʼit, la buka atu manán ema seluk, ka la hetan influénsia demais husi ema seluk iha média sosiál?

 Bíblia nia prinsípiu: “Ita labele sai foti an, labele buka atu manán deʼit, no labele laran-moras ba malu.”—Galásia 5:26.

 Média sosiál bele book ema atu halo hahalok aat hanesan abuza no hatún ema (cyberbullying), sexting, no haree pornografia. Maski karik Ita-nia oan la iha intensaun atu halo buat sira-neʼe, maibé sira bele hetan tentasaun liuhusi média sosiál.

 “Haʼu nota katak informasaun iha média sosiál foufoun la problema atu haree, maibé bele lori lalais ita ba buat neʼebé aat. Iha liafuan no múzika barak neʼebé book ema atu halo hahalok aat.”—Linda, tinan 23.

  Husu Ita-nia an: Haʼu-nia oan uza internét ho didiʼak ka lae? Sira hatene atu hadook an kedas husi informasaun neʼebé la diʼak ka lae?

 Bíblia nia prinsípiu: “Iha imi-nia leet keta temi hahalok sala seksuál, hahalok oioin neʼebé la moos, ka hahalok kaan-teen, . . . no imi mós labele halo hahalok neʼebé lori moe, ka koʼalia buat neʼebé beik, ka konta istória neʼebé foʼer, tanba buat sira-neʼe la loos.”—Éfeso 5:3, 4.

 Média sosiál laʼós buat neʼebé ema presiza atu bele moris, ka atu sai kontente. Joven barak halaʼo moris kontente hodi la uza média sosiál, neʼe inklui sira neʼebé uluk uza média sosiál, maibé agora para ona.

 “Depois haʼu haree oinsá média sosiál fó impaktu negativu ba haʼu-nia biin, haʼu deside atu para uza ida-neʼe. Husi tempu neʼebá, haʼu sai kontente liu no hetan esperiénsia neʼebé diʼak iha haʼu-nia moris.”—Nathan, tinan 17.

 Konkluzaun: Antes fó lisensa ba Ita-nia oan atu uza média sosiál, haree didiʼak katak Ita-nia oan iha ona matenek hodi tuir oras neʼebé deside ona, mantein relasaun diʼak ho kolega sira, no hasees an husi informasaun la diʼak.

  Bíblia nia prinsípiu: “Ema neʼebé matenek hanoin didiʼak kona-ba ninia hakat ida-idak.”—Provérbios 14:15.