Atu labarik sira bele sai kriativu, sira presiza halo atividade neʼebé bele book sira-nia imajinasaun no sira-nia hakarak atu buka-hatene liután. Neʼe bele ajuda sira atu aumenta sira-nia kapasidade atu hanoin no sai matenek atu halo buat oioin ho sira-nia liman.

 Atividade hanesan neʼe inklui:

•   Pinta

•   Teʼin

•   Halo drama

•   Kanta

•   Forma bloku

•   Halimar ho sasán simples sira neʼebé fasil atu hetan, porezemplu kaixa.

 Iha rai barak, labarik sira ladún halo ona atividade hanesan neʼe. Maibé sira toman atu halimar telefone, nonton televizaun, no halo atividade sira neʼebé ema seluk mak organiza nanis ona.

 Tuir Ita-nia hanoin, situasaun hanesan neʼe fó impaktu aat ba sira ka lae?

•   Buat neʼebé Ita presiza hatene

•   Buat neʼebé Ita bele halo

•   Halimar ho buat neʼebé kriativu bele ajuda atu aumenta labarik nia kapasidade. Neʼe bele ajuda oan atu iha saúde fíziku no mentál neʼebé diʼak, no mós ajuda sira hatene oinsá atu ransu ho ema seluk. Neʼe mós ajuda sira atu haburas hahalok pasiénsia, halo desizaun neʼebé diʼak, kontrola emosaun, no halimar hamutuk ho labarik seluk. Atividade kriativu bele ajuda oan atu sai ema neʼebé diʼak bainhira nia sai boot.

•   Uza demais sasán eletróniku bele lori perigu. Neʼe bele halo oan sai atan ba teknolojia. No mós tuir peskiza, neʼe bele halo oan sai bokur no hirusdór. Tan neʼe, inan-aman presiza kuidadu atu la husik sasán eletróniku mak tau matan ba oan neʼebé sei kiʼik.

•   Atividade barak ladún lori benefísiu. Inan-aman presiza kuidadu atu la halo sira-nia oan okupadu demais hodi halo atividade neʼebé organiza nanis ona. Tanbasá? Tanba oan sira sei la iha tempu atu halimar ho livre no halo atividade oioin neʼebé aumenta sira rasik nia hakarak atu hatene liután no halo sira sai kriativu.

•   Prepara atividade neʼebé bele ajuda oan sai kriativu. Se bele, lori oan laʼo pasiar atu sira bele halimar no aprende husi natureza. Husik sira atu halo buat neʼebé sira gosta no halimar ho brinkedu sira neʼebé ajuda sira sai kriativu. a

   Hanoin toʼok: Se haʼu-nia oan halo atividade kriativu, neʼe ajuda nia atu haburas hahalok no abilidade saida? Oinsá mak ida-neʼe sei ajuda nia bainhira nia sai boot?

   Bíblia nia prinsípiu: “Halo ezersísiu lori buat diʼak.”—1 Timóteo 4:8, nota-rodapé.

•   Tau limite ba tempu atu husik oan uza telefone ka nonton televizaun. Hanoin didiʼak antes atu husik Ita-nia oan halimar telefone, tablet, ka nonton televizaun. Doutór ba labarik nian dehan katak diʼak liu ba labarik sira neʼebé tinan rua ba kraik atu la uza sasán eletróniku, no labarik sira neʼebé tinan rua toʼo lima labele uza sasán eletróniku liu oras ida loroloron. b

   Hanoin toʼok: Haʼu fó lisensa ba oan atu uza telefone ka nonton televizaun ba oras hira? Haʼu tenke nonton hamutuk ho oan sira ka lae? Atividade saida deʼit mak haʼu-nia oan bele halo atu nia la presiza uza sasán eletróniku?

   Bíblia nia prinsípiu: “Kontinua haree didiʼak oinsá imi halaʼo imi-nia moris, atu imi la moris nuʼudar ema beik maibé nuʼudar ema matenek. Uza didiʼak imi-nia tempu.”—Éfeso 5:15, 16.

•   Tetu didiʼak kona-ba atividade neʼebé organiza nanis ona. Klaru katak atividade hanesan neʼe bele aumenta oan nia abilidade atu halo buat ruma. Maibé se oráriu nakonu demais, baibain neʼe bele lori estrese ba oan no mós ba inan-aman neʼebé lori sira. Iha situasaun hanesan neʼe, ita mós bele aplika matadalan iha Éfeso 5:15 kona-ba uza tempu ho didiʼak.

   Hanoin toʼok: Haʼu arranja atividade barak demais ba haʼu-nia oan ka lae? Se resposta mak sin, mudansa saida mak haʼu bele halo?

   Bíblia nia prinsípiu: “Buka-hatene loloos buat sira neʼebé importante liu.”—Filipe 1:10.