AJUDA BA FAMÍLIA | HABOOT OAN
Proteje Ita-nia oan husi pornografia
“Ami rekoñese katak pornografia mak perigu duni, maibé ami la hanoin katak fasil ba ami-nia oan-feto atu haree ida-neʼe.”—Nicole.
Iha informasaun neʼe
Buat neʼebé Ita presiza hatene
Oan sira karik bele haree pornografia maski sira sei tinan kiʼik. Peskiza sira hatudu katak ohin loron idade média ba labarik sira atu haree pornografia ba dala primeiru mak bainhira sira tinan 11.
Oan sira bele haree pornografia maski sira la buka ida-neʼe. Porezemplu, karik sira haree pornografia bainhira sira buka hela buat ruma iha internét ka bainhira sira uza hela média sosiál. Karik promosaun ba pornografia mosu derrepente bainhira sira halimar hela game. Pornografia iha formatu oioin, dala barak nuʼudar foto no vídeo. No mós fasil atu hetan istória ho pornografia neʼebé ita bele lee ka rona nuʼudar gravasaun áudio iha internét.
Ita mós presiza matan-moris tanba ema balu karik haruka matéria pornografia ba Ita-nia oan liuhusi sasán eletróniku, hanesan liuhusi aplikasaun mensajen nian. Iha peskiza ida, husi joven naʼin-900, feto besik porsentu 90 no mane besik porsentu 50 mak hatete katak sira-nia kolega haruka beibeik foto no vídeo neʼebé hatudu ema isin-molik.
Pornografia neʼebé populár mak dala barak liga ho violénsia. Pornografia neʼebé populár liu no fasil atu asesu mak dala barak envolve violénsia, no dala barak feto mak sai vítima.
Pornografia estraga labarik nia hanoin. Peskiza hatudu katak labarik sira neʼebé haree ona pornografia dala barak sei:
labele tau fokus bainhira aprende iha eskola
laran-taridu, depresaun, no sente folin-laek
hanoin katak uza violénsia iha relasaun seksuál mak hahalok baibain deʼit
Buat neʼebé importante: Se labarik sira haree pornografia, neʼe sei afeta sira iha dalan negativu, no inan-aman sira mak bele duni ajuda proteje oan sira.
Bíblia nia prinsípiu: “Liafuan sira neʼebé haʼu fó sai ba imi ohin tenke rai iha imi-nia laran, no imi tenke hanorin liafuan sira-neʼe ba imi-nia oan no koʼalia kona-ba buat sira-neʼe kuandu imi tuur iha imi-nia uma, kuandu imi laʼo iha dalan, kuandu imi toba, no kuandu imi hadeer.”—Deuteronómio 6:6, 7.
Oinsá atu proteje Ita-nia oan husi pornografia
Hatene faktu sira. Hanoin kona-ba bainhira no iha neʼebé mak Ita-nia oan iha posibilidade atu haree pornografia. Porezemplu, nia bele asesu internét bainhira tempu deskansa iha eskola ka lae?
Ita-nia oan iha posibilidade atu haree pornografia liuhusi dalan oioin
Aprende kona-ba ninia telefone nia funsaun sira, no sai toman ho aplikasaun sira neʼebé nia uza no game sira neʼebé nia halimar. Porezemplu, aplikasaun mensajen nian balu iha funsaun atu apaga mensajen foʼer, foto no vídeo depois tempu badak nia laran. No vídeo game barak liután mak oferese pornografia ba ema neʼebé halimar game neʼe, no sira mós bele sai ema neʼebé halo relasaun seksuál iha game neʼe nia laran.
“Haʼu koʼalia ida-neʼe husi esperiénsia: Se Ita-nia oan iha telemovel, Ita nuʼudar inan-aman tenke hatene oinsá atu uza, oinsá atu kontrola buat neʼebé nia bele haree no website saida mak nia bele vizita, no oinsá atu cek saida mak Ita-nia oan halo ho ninia telemovel.”—David.
Bíblia nia prinsípiu: “Ema neʼebé iha kbiit atu komprende halibur koñesimentu iha ninia laran.”—Provérbios 18:15.
Halo buat naran deʼit neʼebé Ita bele atu Ita-nia oan la haree, lee no rona pornografia. Halo buat ruma atu hamenus risku. Porezemplu: Troka setting iha Ita-nia oan nia telefone no sasán eletróniku hotu iha uma laran atu block matéria sira neʼebé liga ho pornografia, no kontrola website neʼebé oan bele asesu. Diʼak mós atu hatene password hotu neʼebé Ita-nia oan uza.
“Haʼu sente neʼe ajuda boot hodi aproveita setting iha Ita-nia telemovel, tau limite ba programa iha smart TV neʼebé Ita-nia oan bele asesu, no hatene PIN iha ninia telemovel.”—Maurizio.
“Haʼu la husik haʼu-nia oan sira haree vídeo iha kuartu laran ho odamatan taka. Bainhira tempu atu toba, haʼu la fó lisensa ba sira atu lori sira-nia telemovel ba kuartu laran.”—Gianluca.
Bíblia nia prinsípiu: “Ema neʼebé matenek haree perigu no subar nia an.”—Provérbios 22:3.
Prepara Ita-nia oan antes sira haree pornografia. Inan ida naran Flavia hatete: “Inan-aman balu lakohi koʼalia ba sira-nia oan kona-ba pornografia, hodi hanoin katak sira-nia oan sei nunka hasoru problema neʼe.” Inan-aman seluk karik hanoin: ‘Se haʼu temi kona-ba pornografia, karik haʼu-nia oan sei buka-hatene kona-ba neʼe.’ Hanoin hanesan neʼe mak sala. Inan-aman neʼebé matenek sei eduka sira-nia oan kona-ba perigu husi pornografia antes oan sira haree pornografia. Oinsá Ita bele halo ida-neʼe?
Hanorin labarik sira saida mak sira presiza halo se sira haree buat neʼebé foʼer. Porezemplu, sira bele taka sira-nia matan ka taka sira-nia telemovel. No enkoraja sira atu koʼalia ba Ita kona-ba saida mak sira haree ka rona. a
“Ami komesa koʼalia kona-ba pornografia nia perigu ba ami-nia oan-mane bainhira nia sei kiʼik. Bainhira nia maizumenus tinan 11, promosaun ba pornografia komesa mosu iha game neʼebé nia download ona iha ninia telemovel. Promosaun sira-neʼe mosu ho konvite atu husu nia haruka ninia foto rasik. Tanba ami koʼalia ona kona-ba neʼe, nia fó-hatene kedas mai haʼu buat hotu neʼebé akontese.”—Maurizio.
Bíblia nia prinsípiu: “Hanorin labarik atu laʼo iha dalan neʼebé diʼak ba nia; bainhira nia sai boot, nia sei la sees husi dalan neʼe.”—Provérbios 22:6.
Ajuda oan joven sira atu la monu ba tentasaun atu haree, rona ka lee pornografia. Porezemplu, Ita bele ajuda Ita-nia oan halo kontratu ida, nia bele hakerek buat neʼebé nia presiza halo se nia haree pornografia no tanbasá nia hakarak halo ida-neʼe. Haruka nia hakerek konsekuénsia saida mak nia sei hetan se nia haree pornografia, hanesan sente folin-laek, inan-aman sei la tau fiar tan ba nia, no sei estraga ninia relasaun ho Maromak. b
“Nuʼudar oan sai boot ba daudaun, ajuda sira hanoin kona-ba konsekuénsia neʼebé sira sei hasoru iha futuru se sira monu ba tentasaun atu haree pornografia.”—Lauretta.
“Se Ita-nia oan komprende katak perigu atu haree pornografia no mós oinsá Jeová sente kona-ba neʼe, fasil liu ba sira atu la monu ba tentasaun neʼe.”—David.
Bíblia nia prinsípiu: “Matenek bele fó protesaun.”—Eclesiastes 7:12.
Koʼalia beibeik. Karik susar ba Ita atu fiar katak loloos labarik sira hakarak atu koʼalia kona-ba buat seksuál ho sira-nia inan-aman, inklui kona-ba pornografia. Señora Rachel de Souza, membru husi komisaun neʼebé tau matan labarik sira iha Inglaterra dehan: “Ami aprende katak labarik sira hakarak koʼalia kona-ba buat seksuál husi kiʼik kedas, no koʼalia beibeik kona-ba neʼe. Loloos, sira hakarak koʼalia kona-ba asuntu neʼe iha dalan neʼebé tuir sira-nia idade no tuir sira-nia presiza.”
“Bainhira haʼu sei labarik, iha tópiku balu neʼebé haʼu-nia inan-aman nunka koʼalia ho haʼu. Haʼu hanoin diʼak liu se ami bele koʼalia nakloke no livre iha tempu neʼebá. Agora nuʼudar inan ida, haʼu hakaʼas an atu koʼalia nakloke beibeik ho haʼu-nia oan kona-ba buat seksuál nian iha dalan neʼebé la halo sira moe.”—Flavia.
Se Ita-nia oan haree ona pornografia
Nafatin kalma. Se Ita hatene katak Ita-nia oan haree, rona ka lee pornografia, koko atu kontrola Ita-nia reasaun. Karik nia sente triste, hakfodak no fó sala an kona-ba buat neʼebé akontese. Se Ita hirus, neʼe sei halo Ita-nia oan sente aat liután no sei halo nia taʼuk atu koʼalia ba Ita kona-ba neʼe iha futuru.
Bíblia nia prinsípiu: “Ema neʼebé iha koñesimentu kuidadu kona-ba ninia liafuan sira, no ema neʼebé matenek sei kalma nafatin.”—Provérbios 17:27.
Buka-hatene faktu hotu. Duké foti kedas konkluzaun, husu pergunta sira ba Ita-nia oan atu buka-hatene oinsá mak ida-neʼe akontese. Porezemplu, ema ruma haruka foto neʼe ba nia ka nia buka rasik foto sira-neʼe? Neʼe akontese dala ida deʼit, ka uluk mós nia haree ona pornografia? Ninia telemovel uza setting atu block pornografia, maibé nia rasik mak troka setting hodi nia bele haree pornografia ka lae? Hanoin-hetan, Ita-nia objetivu mak atu book nia fó sai ba Ita, laʼós atu halo interrogasaun ba nia.
Bíblia nia prinsípiu: “Ema nia hanoin iha ninia laran mak hanesan bee-posu neʼebé kleʼan, maibé ema neʼebé matenek mak bele kuru sai ida-neʼe.”—Provérbios 20:5.
Halo buat ruma. Porezemplu, se pornografia derrepente mosu iha Ita-nia oan nia telemovel, karik Ita presiza haree fali setting hodi bele block website ka programa balu.
Se Ita hatene katak nia rasik mak buka pornografia, fó dixiplina ba nia maibé ho domin. Ita bele lee no koʼalia hamutuk eskritura sira hanesan Job 31:1, Salmo 97:10, no Salmo 101:3 c hodi nia rasik bele deside metin atu la haree tan pornografia. Fó-hatene Ita-nia oan katak Ita sei koʼalia ho nia semana-semana atu hatene ninia situasaun no fó ajuda neʼebé nia presiza.
Bíblia nia prinsípiu: “Keta halo imi-nia oan sai laran-hirus, maibé kontinua haboot sira ho dixiplina no ho hanorin neʼebé tuir Jeová nia hakarak.”—Éfeso 6:4.
a Atu hetan ajuda oinsá Ita bele koʼalia ho Ita-nia oan kona-ba buat seksuál tuir sira-nia idade, lee informasaun “Oinsá mak inan-aman bele esplika ba oan sira kona-ba buat seksuál?”
b Atu hetan ideia kona-ba saida deʼit mak Ita bele tau iha kontratu laran, bele haree atividade “Cara Menolak Pornografi”.
c Karik Ita hamutuk ho Ita-nia oan bele haree informasaun “Mengapa Kita Harus Menolak Pornografi?”
Karik Ita sei gosta
MORIS KABEN NIAN NO FAMÍLIA
Hanorin oan sira atu uza telemovel ho matenek
Maski oan sira matenek atu uza telemovel, maibé sira presiza ita-nia matadalan atu hatene oinsá atu uza ho didiʼak.
PERGUNTA KONA-BA BÍBLIA
Bíblia dehan saida kona-ba pornografia no cybersex?
Ema barak halimar ho atividade neʼebé envolve hahalok seksuál. Entaun ladún problema atu halo buat sira-neʼe ka lae?
PERGUNTA HUSI JOVEN SIRA
Saida mak haʼu presiza hatene kona-ba sexting?
Ema ruma obriga Ita atu envolve an iha sexting ka lae? Saida mak konsekuénsia husi sexting? Neʼe mak buat neʼebé perigu ka lae?
HANORIN IMPORTANTE HUSI BÍBLIA
Pornografia mak sala neʼebé kontra Maromak ka lae?
Bíblia temi liafuan “pornografia” ka lae? Oinsá ita bele hatene Maromak nia hanoin kona-ba pornografia?