Dalan neʼebé Ita uza teknolojia bele lori benefísiu ba Ita-nia moris kaben nian ka bele estraga Ita-nia moris kaben nian. Oinsá teknolojia afeta Ita-nia moris kaben nian?

•  Buat neʼebé Ita presiza hatene

•  Buat neʼebé Ita bele halo

•  Buat neʼebé kaben-naʼin sira hatete

•  Oinsá atu koʼalia hamutuk

•   Bainhira Ita uza teknolojia iha dalan neʼebé diʼak, ida-neʼe bele lori benefísiu ba Ita-nia moris kaben nian. Porezemplu, feen-laʼen balu uza teknolojia atu kontaktu malu beibeik bainhira sira la hamutuk.

   “Mensajen simples hanesan, ‘Haʼu hadomi ó’ ka ‘Haʼu hanoin ó’, mak folin-boot.”—Jonathan.

•   Bainhira Ita uza sala teknolojia, ida-neʼe bele estraga Ita-nia moris kaben nian. Porezemplu, ema balu uza sira-nia sasán eletróniku barak demais, no ida-neʼe hamenus tempu ho sira-nia kaben no sira la tau atensaun ba sira-nia kaben.

   “Haʼu fiar katak dala ruma haʼu-nia laʼen sei kontente liu atu koʼalia ho haʼu se karik haʼu la uza beibeik haʼu-nia telemovel.”—Julissa.

•   Ema balu dehan katak sira bele uza sira-nia sasán eletróniku no iha tempu hanesan koʼalia ho sira-nia kaben. Matenek-naʼin ida naran Sherry Turkle hatete katak ema barak hanoin katak sira bele halo atividade oioin iha tempu hanesan, maibé neʼe mak hanoin neʼebé sala. Tuir loloos, bainhira ita halo atividade oioin iha tempu hanesan, neʼe laʼós buat neʼebé diʼak. Matenek-naʼin neʼe hatete katak bainhira ita halo atividade oioin iha tempu hanesan, ita la halo atividade sira-neʼe ho didiʼak. a

   “Haʼu gosta koʼalia ho haʼu-nia laʼen, no neʼe bele lori rezultadu diʼak. Maibé haʼu la gosta koʼalia ho nia kuandu nia halo atividade oioin iha tempu hanesan. Bainhira nia kaer telemovel no mós koʼalia ho haʼu, neʼe halo haʼu hanoin katak nia sei kontente liu se nia mesak deʼit ho ninia telemovel.”—Sarah

 Buat neʼebé importante: Dalan neʼebé Ita uza teknolojia bele lori benefísiu ba Ita-nia moris kaben nian ka bele estraga Ita-nia moris kaben nian.

 Deside buat neʼebé importante liu. Bíblia hatete: “Buka-hatene loloos buat sira neʼebé importante liu.” (Filipe 1:10) Husu ba Ita-nia an: ‘Tempu neʼebé haʼu no haʼu-nia feen gasta atu uza ami-nia sasán eletróniku hamenus tempu neʼebé ami gasta hamutuk ka lae?’

 “Haʼu sente triste bainhira haʼu haree mane ida no feto ida han hamutuk iha restaurante maibé sira rua hateke deʼit ba sira-nia telemovel. Importante atu la sai atan ba teknolojia no haluha buat neʼebé importante liu, neʼe mak ita-nia relasaun diʼak ba malu.”—Matthew.

 Tau limite. Bíblia hatete: “Kontinua haree didiʼak oinsá imi halaʼo imi-nia moris, atu imi la moris nuʼudar ema beik maibé nuʼudar ema matenek. Uza didiʼak imi-nia tempu.” (Éfeso 5:15, 16) Husu ba Ita-nia an: ‘Haʼu bele deside nanis tempu ruma atu lee no hatán ba mensajen sira neʼebé la importante duké hatán kedas ba mensajen hotu ka lae?’

 “Buat neʼebé ajuda haʼu mak taka haʼu-nia telemovel nia lian, no hatán ba mensajen iha tempu neʼebé haʼu deside nanis ona. Dala barak telefone neʼebé ita simu, mensajen ruma ka e-mail neʼebé tama la urjente no ita la presiza hatán kedas.”—Jonathan.

 Se bele, keta kontinua halo Ita-nia serbisu depois oras serbisu nian. Bíblia hatete: “Iha tempu neʼebé loos ba buat hotu.” (Eclesiastes 3:1) Husu ba Ita-nia an pergunta sira tuirmai neʼe: ‘Haʼu kontinua serbisu liuhusi telemovel no neʼe atrapalla haʼu-nia tempu iha uma ho família ka lae? Se nuneʼe, ida-neʼe fó impaktu saida ba haʼu-nia moris kaben nian? Haʼu-nia kaben dehan saida?’

 “Tanba teknolojia, ita bele halo serbisu iha tempu naran deʼit. Haʼu presiza hakaʼas an tebes atu la cek beibeik haʼu-nia telemovel no la halo asuntu neʼebé liga ho serbisu bainhira haʼu no haʼu-nia feen gasta tempu hamutuk.”—Matthew.

 Koʼalia hamutuk ho Ita-nia kaben kona-ba dalan neʼebé Ita uza teknolojia. Bíblia hatete: “Ema ida-idak tenke kontinua buka uluk ema seluk nia diʼak, laʼós buka diʼak deʼit ba ninia an.” (1 Korinto 10:24) Koʼalia ho Ita-nia kaben kona-ba dalan neʼebé Ita uza teknolojia no kona-ba mudansa neʼebé Ita presiza halo. Ita bele uza sujestaun iha kraik kona-ba oinsá atu koʼalia hamutuk.

 “Haʼu no haʼu-nia laʼen toman atu koʼalia nakloke ba malu. Ami sei fó-hanoin malu se ami sente katak ami uza demais ami-nia telemovel ka tablet. Ami rekoñese katak neʼe bele lori problema, tan neʼe ami hakaʼas an atu hanoin malu.”—Danielle.

 Buat neʼebé importante: Ita hakarak teknolojia mak sai Ita-nia atan, laʼós Ita mak sai atan ba teknolojia.