Maria Madalena hateke ba lalehan no hamoos ninia matan-been. Iha ninia oin, Jesus tara hela iha ai-riin terus nian. Tempu neʼe maizumenus tuku 12 meiudia, “maibé rai tomak nakukun”! (Lucas 23:44,45) Maria hakbesik ba feto balu neʼebé iha ninia sorin. Rai tomak sai nakukun ba oras tolu, klaru katak neʼe laʼós tanba eklipse neʼebé dura ba minutu balu deʼit. Karik Maria no ema seluk neʼebé hamriik besik Jesus komesa rona lian husi animál sira neʼebé baibain halo lian iha kalan. Ema balu haree buat neʼebé akontese no “sai taʼuk tebetebes no hatete: ‘Loloos, neʼe mak Maromak nia oan duni.’” (Mateus 27:54) Karik Jesus nia dixípulu sira no ema seluk hanoin katak Jeová mak hatudu sai ninia sentimentu triste no mós hirus tanba ema trata Jesus iha dalan neʼebé aat tebes.

 Maria Madalena la tahan atu haree Jesus nia mate-isin neʼebé iha kanek barak, maibé nia lakohi husik fatin neʼe. (João 19:25, 26) Loloos ema labele imajina terus boot neʼebé Jesus hetan. Jesus nia inan mós triste tebes no presiza ema ruma atu fó kmaan ba nia.

 Maria prontu atu halo buat naran deʼit atu apoia Jesus tanba nia rasik hetan ona ajuda husi Jesus. Uluk ema haree Maria la diʼak no ninia moris terus. Maibé tanba Jesus nia ajuda, Maria halaʼo fali ninia moris ho dignidade no iha objetivu ba moris. Agora, nia mak feto neʼebé iha fiar boot. Oinsá? Saida mak ita bele aprende husi Maria nia fiar?

 Iha Bíblia, Maria Madalena nia istória komesa kuandu Jesus halo nia livre husi situasaun neʼebé aat tebes. Iha tempu neʼebá, anju aat hitu neʼebé gosta haterus ema mak tama ba Maria nia laran. Ita la hatene ho loloos saida mak anju aat sira-neʼe halo ba Maria. Maibé iha Jesus nia tempu, anju aat sira fó influénsia ba ema nia moris. Sira ataka ema barak no dala ruma tama ema nia laran hodi domina sira. Maibé agora, Maria livre ona husi anju aat tanba Jesus duni sai sira!—Lucas 8:2.

 Maria sente kmaan tebes tanba sai livre ona husi anju aat no agora nia bele halaʼo moris foun. Oinsá mak nia hatudu sai ninia agradese? Maria sai Jesus nia dixípulu neʼebé laran-metin. Nia mós haree katak Jesus no apóstolu sira presiza ai-han, roupa, no fatin atu deskansa iha kalan. Jesus no apóstolu sira laʼós ema riku, no sira la halo serbisu atu manán osan. Atu sira bele fokus ba haklaken no hanorin, sira presiza ema ruma neʼebé apoia sira.

 Maria no feto barak seluk mak apoia sira iha dalan hanesan neʼe. Feto sira “uza sira-nia rikusoin rasik atu fó apoiu ba Jesus no ninia apóstolu sira”. (Lucas 8:1, 3) Karik sira balu mak ema riku. Bíblia la esplika kona-ba buat neʼebé feto sira-neʼe halo, hanesan prepara ai-han ka fase roupa ka arranja hela-fatin iha knua ida-idak. Maibé sira ho hakarak rasik apoia duni Jesus no apóstolu sira maizumenus hamutuk naʼin-20 neʼebé bá haklaken iha fatin oioin. Klaru katak feto sira-neʼe ajuda tebes Jesus no apóstolu sira atu fokus didiʼak ba haklaken no hanorin ema. Maria hatene katak buat neʼebé nia bele halo mak limitadu se kompara ho buat neʼebé Jesus halo ona ba nia, maibé nia sente kontente tebes atu apoia Jesus iha dalan hanesan neʼe!

 Ohin loron ema barak hatún ema sira neʼebé halo serbisu simples atu apoia ema seluk. Maibé Maromak nia haree la hanesan. Imajina toʼok Maromak sente haksolok tebes bainhira haree katak Maria halo buat hotu neʼebé nia bele atu apoia Jesus no apóstolu sira! Ohin loron mós ema Kristaun sira neʼebé laran-metin prontu atu serbí ema seluk ho haraik an. Dala ruma, hahalok kiʼik neʼebé hatudu laran-diʼak ka hatoʼo liafuan hodi fó kmaan, neʼe bele apoia no hametin ema seluk. Jeová hafolin tebes hahalok sira-neʼe.—Provérbios 19:17; Ebreu 13:16.

 Iha tinan 33 EC, Jesus bá Jeruzalein atu selebra Páskua. Feto barak mós akompaña Jesus bá neʼebá inklui Maria Madalena. (Mateus 27:55, 56) Bainhira Maria rona katak ema kaer Jesus no tesi-lia ba nia, Maria sente laran-susar tebes. Ikusmai situasaun sai aat liután. Ulun-naʼin relijiaun sira no povu fó influénsia ba governadór Pónsio Pilatos, no Pilatos haruka ema atu fó-kastigu mate ba Jesus hodi tara nia iha ai-riin terus nian. Maria mós karik haree bainhira Jesus hakaʼas an atu lori ai-riin terus nian neʼebé todan nuʼudar ninia isin kole no ninia raan suli husi kanek.—João 19:6, 12, 15-17.

 Ikusmai ema prega Jesus iha ai-riin. Rai tomak sai nakukun maizumenus iha meiudia. Maria Madalena no feto sira seluk “hamriik besik Jesus nia ai-riin terus nian”. (João 19:25) Maria Madalena rona Jesus husu apóstolu João atu tau matan ba ninia inan Maria. Nia mós haree no rona bainhira Jesus sente moras no halerik ba ninia Aman iha lalehan. Jesus fó sai ninia liafuan ikus hodi dehan: “Buat hotu kumpre ona!” Maria sente triste tebes. Maski nuneʼe, depois Jesus mate, Maria la husik kedas fatin neʼe. Tempu balu liutiha Maria mós bá rate neʼebé ema riku ida naran José Arimateia mak tau Jesus nia mate-isin.—João 19:30; Mateus 27:45, 46, 57-61.

 Maria nia ezemplu fó-hanoin mai ita kona-ba buat neʼebé ita bele halo kuandu ita-nia maluk fiar-naʼin sira hasoru susar. Karik ita la iha forsa atu hapara dezastre ka halakon problema neʼebé ita-nia maluk hasoru. Maski nuneʼe, ita bele hatudu katak ita hanoin sira no anima sira. Ema neʼebé hasoru susar boot bele sente kmaan tebes kuandu belun neʼebé laran-metin mak iha sira-nia sorin atu apoia sira.—Provérbios 17:17.

 Depois ema tau Jesus iha rate, Maria ho feto balu seluk sosa buat morin oioin atu tau iha Jesus nia mate-isin. (Marcos 16:1, 2; Lucas 23:54-56) Loron Sábadu liu tiha ona, iha dadeer-saan Maria laʼo iha dalan neʼebé nakukun hela hamutuk ho feto sira seluk atu bá Jesus nia rate. Iha dalan, sira hanoin hela oinsá mak sira bele duir fatuk todan iha rate nia ibun. (Mateus 28:1; Marcos 16:1-3) Maski sira rasik nia forsa la toʼo, maibé sira lakohi rende an. Sira fiar katak Jeová sei ajuda sira. Importante mak sira halo deʼit buat neʼebé sira bele halo.

 Karik Maria mak toʼo uluk rate. Nia hakfodak tanba nia haree katak fatuk boot duir sai tiha ona no rate laran mamuk. Maria halai kedas toʼo Pedro no João nia fatin hodi fó-hatene buat neʼebé nia haree. Imajina toʼok, Maria koʼalia ho iis boot: “Sira foti tiha ona Naʼi husi rate, no ami la hatene sira tau nia iha neʼebé.” Pedro no João halai kedas ba rate no haree katak rate neʼe mamuk duni, tuirmai sira fila fali ba sira-nia hela-fatin. a—João 20:1-10.

 Maria bá fali Jesus nia rate no hein nafatin iha neʼebá. Neʼe mak dadeer-saan sedu, nia hamriik mesak iha rate mamuk no komesa tanis. Nia hateke fali ba rate laran tanba susar atu fiar katak Naʼi nia mate-isin la iha ona. Tuirmai nia hakfodak tebes ho buat neʼebé nia haree. Anju rua mak tuur hela iha rate laran! Sira husu Maria: “Tanbasá mak ó tanis?” Maria sente konfuzaun, entaun nia repete deʼit buat neʼebé nia hatete ba apóstolu sira: “Sira foti ona haʼu-nia Naʼi, no haʼu la hatene sira tau nia iha neʼebé.”—João 20:11-13.

 Koʼalia tiha hanesan neʼe, Maria fila oin no haree mane ida neʼebé hamriik iha kotuk. Maria la koñese mane neʼe, entaun Maria hanoin katak nia mak ema neʼebé tau matan ba jardín. Mane neʼe husu Maria: “Feto, tanbasá mak ó tanis? Ó buka sé?” Maria hatán: “Señór, se Ita mak foti tiha nia karik, fó-hatene mai haʼu, Ita tau nia iha neʼebé, no haʼu sei lori nia bá.” (João 20:14,15) Hanoin toʼok Maria nia liafuan neʼe. Maria bele hiʼit Jesus Kristu nia mate-isin neʼebé todan ka lae? Maria la hanoin kona-ba ida-neʼe maibé nia hanoin deʼit katak nia tenke halo buat naran deʼit neʼebé nia bele.

 Kuandu ita hasoru susar ruma neʼebé liu fali ita-nia kbiit, ita bele halo tuir Maria Madalena nia ezemplu. Se ita fokus ba ita rasik nia fraku ka limitadu, karik ita labele halo buat ida tanba sente taʼuk no ita-nia kbiit la toʼo. Maibé se ita deside atu halo buat hotu neʼebé ita bele no tau fiar ba Maromak nia ajuda, karik ita bele kumpre buat barak liu fali ita imajina. (2 Korinto 12:10; Filipe 4:13) Buat neʼebé importante liu mak ita bele halo Jeová kontente bainhira ita halo nuneʼe. Maria halo duni hanesan neʼe, no Jeová fó bensaun ba nia iha dalan neʼebé úniku tebes.

 Mane neʼebé hamriik iha Maria nia oin mak laʼós ema neʼebé tau matan ba jardín. Nia uluk karpinteiru, depois sai mestre, no tuirmai sai Maria nia Naʼi. Maibé Maria la koñese mane neʼe no hanoin atu husik fatin neʼe. Maria la hanoin katak loloos Jesus moris hiʼas nuʼudar kriatura espíritu neʼebé iha forsa boot. Jesus nakfila an ba ema bainhira nia hasoru Maria, maibé ninia oin no isin la hanesan ho isin neʼebé nia sakrifika ona. Tempu balu depois Jesus moris hiʼas, Jesus nia dixípulu sira mós la rekoñese katak mane neʼebé iha sira-nia oin mak Jesus.—Lucas 24:13-16; João 21:4.

 Oinsá mak Jesus fó-hatene Maria katak nia mak Jesus? Ho liafuan ida deʼit: “Maria!” Rona tiha ida-neʼe, Maria fila oin kedas no bolu Jesus iha lian Ebraiku, “Raboni!” Neʼe mak dalan neʼebé Maria toman bolu Jesus. Maria kontente tebes hodi hasoru fali ninia mestre neʼebé nia hadomi tebes! Nia kaer metin Jesus no lakohi husik nia.—João 20:16.

 Jesus komprende Maria nia hanoin hodi dehan: “Keta kaer metin haʼu.” Ita bele imajina katak Jesus koʼalia liafuan neʼe ho laran-diʼak, karik hodi hatudu oin-midar, tuirmai Jesus dehan: “Haʼu seidauk saʼe ba Aman.” Sin, Jesus nia tempu seidauk toʼo atu saʼe ba lalehan. Jesus sei iha buat balu neʼebé nia tenke halo iha mundu, no nia hakarak Maria atu ajuda nia. Maria prontu atu rona didiʼak ba buat neʼebé Jesus dehan: “Bá hasoru haʼu-nia maun-alin sira no dehan ba sira: ‘Haʼu sei saʼe ba haʼu-nia Aman no imi-nia Aman, ba haʼu-nia Maromak no imi-nia Maromak.’”—João 20:17.

 Neʼe mak knaar neʼebé Maria simu husi ninia Naʼi! Maria simu ona priviléjiu atu haree Jesus neʼebé moris hiʼas ona antes ema seluk haree ida-neʼe, no agora nia simu priviléjiu ida tan atu fó-hatene ba ema seluk kona-ba Jesus nia lia-menon. Imajina toʼok Maria ho haksolok tebes buka lalais Jesus nia dixípulu sira, no koʼalia ho laran-manas: “Haʼu haree ona Naʼi!” Tuirmai, nia konta lalais buat hotu neʼebé Jesus dehan. (João 20:18) Jesus nia dixípulu sira rona ona husi feto balu katak Jesus nia rate mamuk, no agora hetan tan novidade husi Maria.—Lucas 24:1-3, 10.

 Apóstolu sira-nia reasaun ba feto sira-nia liafuan foufoun ladún diʼak. Bíblia dehan: “Apóstolu no dixípulu sira seluk hanoin katak liafuan neʼebé feto sira-neʼe hatete mak lia bulak, entaun sira la fiar.” (Lucas 24:11) Sira sai boot iha komunidade neʼebé ladún tau fiar ba feto sira. Tuir mestre Judeu sira-nia doutrina, feto labele sai testemuña iha tribunál. Karik apóstolu sira mós hetan influénsia husi sira-nia kultura. Maibé Jesus no ninia Aman nunka todan ba sorin, tan neʼe fó priviléjiu boot ba feto fiar-naʼin sira!

 Maria la laran-tun ho mane sira-nia reasaun. Maria hatene katak ninia Naʼi Jesus mak tau fiar ba nia, no neʼe toʼo ona ba Maria atu sente kontente. Ema hotu neʼebé moris tuir Jesus simu knaar atu hatoʼo ninia mensajen ba ema seluk. Bíblia bolu mensajen neʼe “liafuan diʼak kona-ba Maromak nia Ukun”. (Lucas 8:1) Jesus la promete ba ninia dixípulu sira katak ema hotu sei fiar mensajen neʼe ka hafolin sira-nia haklaken. Loloos Jesus dehan buat neʼebé kontráriu. (João 15:20,21) Tan neʼe, diʼak ba ema Kristaun atu hanoin-hetan Maria Madalena nia ezemplu. Maski apóstolu sira mós la fiar ba nia, maibé neʼe la halakon ninia ksolok atu hatoʼo liafuan diʼak katak Jesus moris hiʼas ona!

 Depois neʼe, Jesus mosu ba apóstolu sira no tuirmai mosu ba ninia dixípulu barak tan. Iha situasaun ida, Jesus mosu ba ema naʼin-500 liu! (1 Korinto 15:3-8) Akontesimentu sira-neʼe halo Maria nia fiar sai metin liután maski nia haree rasik ka rona deʼit husi ema seluk. Karik Maria Madalena mós hamutuk ho feto sira seluk kuandu Maromak haraik espíritu santu ba Jesus nia dixípulu sira neʼebé halibur hamutuk iha Jeruzalein iha loron Pentekostes.—Apóstolu 1:14, 15; 2:1-4.

 Ita iha razaun duni atu fiar katak Maria Madalena kaer metin ninia fiar toʼo nia mate. Ita mós bele halo hanesan neʼe! Ita iha razaun duni atu fiar katak Maria Madalena kaer metin ninia fiar toʼo nia mate. Ita mós bele halo hanesan neʼe! Ita bele banati-tuir Maria Madalena nia fiar hodi hatudu agradese ba buat hotu neʼebé Jesus halo ona mai ita, serbí ema seluk ho haraik an no tau fiar ba Maromak nia ajuda.