Labarik-feto ida subar iha duʼut leet iha Mota Nilo nia ninin. Ninia fuan tuku-tuku makaʼas nuʼudar bee iha Mota Nilo suli neineik. Oras balu liu tiha iha insetu barak semo hobur nia maibé nia hamriik metin nafatin hodi hateke ba fatin neʼebé subar raga ida. Tuir loloos ninia alin-mane neʼebé sei bebé hela mak iha raga neʼe nia laran. Labarik-feto neʼe triste no hanoin tebes ninia alin. Maibé nia hatene katak ninia inan-aman halo buat neʼebé loos tanba la iha dalan seluk ba sira atu salva bebé neʼe nia moris.

 Labarik-feto neʼe hatudu aten-brani tebes. Maibé lakleur nia presiza hatudu aten-brani liután. Maski nia idade kiʼik, nia haburas ona hahalok furak, neʼe mak fiar. Nia hatudu sai ninia fiar ho klaru, no ninia fiar neʼe lori buat diʼak barak iha ninia moris tomak. Tinan barak liu tiha, bainhira nia sai idade ona, ninia fiar nafatin ajuda nia durante tempu importante tebes iha Maromak nia povu nia istória. Fiar neʼe mós ajuda nia bainhira nia halo sala sériu. Feto neʼe mak sé? Saida mak ita bele aprende husi ninia fiar?

 Maski Bíblia la temi labarik-feto neʼe nia naran bainhira konta kona-ba akontesimentu neʼe iha Mota Nilo, maibé ita hatene sé mak labarik neʼe. Nia mak Miriam, Amram no Jokebed nia oan-feto boot. Sira mak ema Ebreu neʼebé moris nuʼudar atan iha rai-Ejitu. (Números 26:59) Tempu balu liu tiha, ema hanaran Miriam nia alin-mane neʼe nuʼudar Moisés. Moisés nia maun Arão mak maizumenus tinan tolu iha tempu neʼebá. Ita ladún hatene Miriam nia tinan, maibé parese Miriam seidauk toʼo tinan sanulu iha tempu neʼebá.

 Miriam sai boot iha tempu neʼebé ema Ebreu sira hetan susar barak. Ema Ejitu sente taʼuk ba ema Ebreu tanba sira sai barak entaun sira halo ema Ebreu sai sira-nia atan hodi domina sira no trata aat sira. Maski nuneʼe, ema Ebreu kontinua aumenta barak liután. Neʼe halo ema Ejitu sai taʼuk tebes, no ikusmai sira koko atu halo buat neʼebé aat tebes. Faraó fó orden atu oho kedas ema Ebreu nia oan-mane hotu neʼebé foin moris. Karik Miriam rona ona kona-ba ema Ebreu nia parteira naʼin-rua, Sifrá no Puá neʼebé hatudu fiar hodi la halo tuir Faraó nia orden neʼe.—Éxodo 1:8-22.

 Miriam mós haree oinsá ninia inan-aman hatudu fiar. Bainhira sira-nia oan terseiru moris mai, Amram no Jokebed subar bebé neʼe toʼo fulan tolu. Sira la taʼuk liurai nia orden. (Ebreu 11:23) Maibé susar tebes atu subar bebé, no ikusmai sira foti desizaun boot. Jokebed buka fatin ruma atu subar bebé neʼe, no hein katak ema ruma bele proteje no haboot nia. Imajina toʼok, Jokebed halo orasaun barak bainhira nia prepara raga ho duʼut-papiru no hametin raga neʼe ho alkatraun hodi bee labele tama, no tuirmai tau bebé neʼe iha raga laran no husik raga neʼe iha Mota Nilo! Karik nia mós haruka Miriam atu hein iha neʼebá hodi haree saida mak sei akontese.—Éxodo 2:1-4.

 Entaun Miriam hein raga neʼe husi dook. Tempu balu liu tiha, nia haree katak feto balu laʼo hakbesik fatin neʼe. Sira laʼós ema Ejitu baibain. Neʼe mak Faraó nia oan-feto no ninia atan-feto sira neʼebé mai Mota Nilo atu hariis. Karik Miriam sente laran-kraik no taʼuk, tanba susar ba nia atu imajina Faraó nia oan-feto rasik mak kontra Faraó nia orden hodi salva ema Ebreu nia bebé. Karik Miriam halo orasaun kedas iha tempu neʼebá.

 Faraó nia oan-feto mak hetan uluk raga neʼe iha duʼut leet, no nia haruka ninia atan-feto atu bá foti raga neʼe. Bíblia dehan kona-ba Faraó nia oan-feto: “Bainhira nia loke raga, nia haree bebé neʼe, no bebé neʼe tanis hela.” Nia siʼik kedas katak feto Ebreu ida mak koko atu salva ninia oan nia moris. Faraó nia oan-feto sente kasian loos ba bebé neʼe. (Éxodo 2:5, 6) Miriam haree ninia oin no hatene kedas ninia sentimentu. Miriam hatene katak neʼe mak tempu atu hatudu fiar ba Jeová. Entaun ho aten-brani, nia hakbesik ba Faraó nia oan-feto no ninia atan sira.

 Ita la hatene saida mak akontese se labarik-feto Ebreu neʼebé atan hela mak hakbesik no koʼalia ba liurai nia família. Miriam husu pergunta ba Faraó nia oan-feto: “Ita hakarak haʼu bá bolu feto Ebreu ida mai atu fó-susu ba bebé neʼe ka?” Neʼe mak pergunta neʼebé matenek. Faraó nia oan-feto hatene katak nia rasik labele tau matan ba bebé neʼe. Karik nia hanoin: ‘Susar ba haʼu atu haboot kedas bebé neʼe, entaun diʼak liu se ema Ebreu mak tau matan ba nia. Depois bebé neʼe sai boot uitoan mak haʼu bele haboot nia nuʼudar haʼu-nia oan-hakiak no haʼu sei fó edukasaun ba nia.’ Miriam sente haksolok tebes bainhira Faraó nia oan-feto hatete ba nia: “Bá!”—Éxodo 2:7, 8.

 Miriam halai fila ba uma tanba hatene katak ninia inan-aman hanoin barak kona-ba sira-nia bebé. Imajina toʼok Miriam koʼalia ho laran-manas bainhira konta ba ninia inan-aman kona-ba buat hotu neʼebé foin akontese. Jokebed fiar katak Jeová mak ajuda sira, entaun nia bá hamutuk ho Miriam atu hasoru Faraó nia oan-feto. Karik Jokebed koko atu la hatudu ninia sentimentu kontente bainhira Faraó nia oan-feto dehan: “Lori bebé neʼe ho ó no fó-susu ba nia, haʼu sei selu ó-nia kolen.”—Éxodo 2:9.

 Iha loron neʼe, Miriam aprende buat barak kona-ba Maromak Jeová. Nia aprende katak Maromak hanoin ninia povu no rona ba sira-nia orasaun. Miriam mós aprende katak laʼós ema neʼebé boot ona ka mane deʼit mak bele hatudu aten-brani no fiar. Jeová rona ba orasaun husi ninia atan hotu. (Salmo 65:2) Maski ita mak joven ka idade, mane ka feto, ita hotu neʼebé moris iha tempu susar ohin loron presiza hanoin-hetan kona-ba ida-neʼe.

 Ikusmai, Jokebed mak tau matan no fó-susu ba bebé neʼe. Miriam mós hadomi tebes ninia alin kiʼik. Karik nia mós ajuda ninia alin aprende oinsá atu koʼalia, no sente kontente tebes bainhira rona ninia alin temi Maromak nia naran Jeová ba dala primeiru. Bainhira alin-mane neʼe sai boot uitoan, nia presiza muda ba Faraó nia oan-feto nia fatin. (Éxodo 2:10) Família hotu triste tebes kuandu sira fahe malu. Faraó nia oan-feto hanaran nia Moisés. Miriam hakarak tebes atu hatene Moisés nia hahalok sei sai oinsá loos. Maski Moisés sai boot iha liurai Ejitu nia umakain, nia sei kontinua hadomi Jeová ka lae?

 Resposta sai klaru liu bainhira Moisés sai boot ona. Nia hili atu serbí Maromak duké simu oportunidade oioin husi liurai Faraó nia umakain. Ita fiar katak Miriam orgullu tebes tanba ninia alin kiʼik sai ona mane neʼebé fiar metin ba Jeová. Bainhira Moisés tinan 40, nia koko atu defende ninia maluk Ebreu. Moisés oho ema Ejitu ida neʼebé trata aat atan Ebreu ida. Tanba Moisés hatene katak ema sei buka atu oho nia, entaun nia halai sai husi Ejitu.—Éxodo 2:11-15; Apóstolu 7:23-29; Ebreu 11:24-26.

 Depois neʼe, karik Miriam la rona buat ida kona-ba ninia alin Moisés ba tinan barak tanba Moisés halai dook loos toʼo rai-Midian no sai bibi-atan. (Éxodo 3:1; Apóstolu 7:29, 30) Miriam hatudu pasiénsia ba tempu kleur toʼo nia sai ferik, no nia haree povu Izraél nia situasaun sai aat liután ba beibeik.

 Bainhira Moisés mai fali tanba Maromak haruka nia atu salva ninia povu, karik Miriam besik tinan 90 ona. Arão sai Moisés nia ajudante hodi hatoʼo Moisés nia mensajen. Miriam nia alin-mane naʼin-rua neʼe hakbesik ba Faraó hodi husu nia atu husik Maromak nia povu sai. Faraó lakohi rona Moisés no Arão no duni sai sira, maibé sira bá fila-fila hodi fó avizu ba Faraó kona-ba susar sanulu. Klaru katak Miriam halo buat hotu neʼebé nia bele atu apoia no anima Moisés no Arão. Ikusmai, susar ikus mak akontese no ema Ejitu nia oan-mane primeiru hotu mate. Neʼe mak tempu ba ema Izraél atu sai husi Ejitu! Imajina toʼok Miriam ajuda maluk Izraél ho badinas bainhira Moisés dirije sira atu sai husi Ejitu.—Éxodo 4:14-16, 27-31; 7:1–12:51.

 Liutiha tempu balu, ema Izraél monu ba perigu laran tanba sira labele halai sai entre Tasi Mean no tropa Ejitu. Miriam haree ninia alin Moisés hamriik iha tasi nia oin no lolo ninia ai-tonka ba tasi, no tasi hahú fahe ba rua! Bainhira Moisés dirije povu hodi hakur Tasi Mean nia klaran neʼebé maran ona, Miriam sente katak ninia fiar ba Jeová sai metin liu. Miriam serbí Maromak neʼebé bele halo buat hotu atu kumpre ninia promesa!—Éxodo 14:1-31.

 Depois neʼe, bainhira povu hotu hakur tasi ho seguru no tasi sai nakonu fali hanesan uluk hodi taka Faraó no ninia tropa hotu, Miriam komprende katak Jeová mak forsa boot liu fali tropa neʼebé forte liu iha mundu. Neʼe book povu Izraél atu kanta knananuk ba Jeová. Miriam dirije feto sira atu kanta liafuan tuirmai: “Kanta ba Jeová, tanba ninia glória mak boot tebes. Nia soe kuda no tropa neʼebé saʼe kuda ba tasi kleʼan.”—Éxodo 15:20, 21; Salmo 136:15.

 Neʼe mak esperiénsia espesiál tebes iha Miriam nia moris, tempu neʼebé nia nunka haluha. Iha tempu neʼe Bíblia bolu Miriam nuʼudar profeta. Miriam mak ema primeiru neʼebé Bíblia temi nuʼudar profeta feto, loloos iha feto uitoan deʼit mak serbí Jeová iha dalan espesiál hanesan neʼe.—Juís 4:4; 2 Reis 22:14; Isaias 8:3; Lucas 2:36.

 Bíblia fó-hanoin ba ita katak Jeová haree ita no hakarak tebes atu haraik bensaun ba ita-nia hakaʼas an ho haraik an, pasiénsia, no mós ita-nia hakarak atu fó hahiʼi ba nia. Maski ita joven ka idade ona, mane ka feto, ita hotu bele hatudu fiar ba Jeová. Neʼe sei halo Jeová haksolok tebes no nia sei nunka haluha ida-neʼe no fó kolen mai ita. (Ebreu 6:10; 11:6) Neʼe mak razaun diʼak atu ita atu banati-tuir Miriam nia fiar!

 Kuandu ema simu priviléjiu no knaar espesiál, neʼe lori bensaun barak maibé bele mós lori perigu. Bainhira povu Izraél sai livre no laʼós atan ona, parese Miriam mak feto neʼebé naran-boot liu fali feto seluk iha povu Izraél nia leet. Neʼe halo Miriam sai foti an ka lae? (Provérbios 16:18) Sin, triste maibé nia sai hanesan neʼe ba tempu balu.

 Fulan balu depois ema Izraél sai husi Ejitu, Moisés fó benvindu ba grupu ida neʼebé mai husi fatin dook. Grupu neʼe inklui Moisés nia banin-mane Jetro, Moisés nia feen Zípora no Moisés nia oan-mane naʼin-rua. Moisés kaben ho Zípora tinan 40 ona. Karik tempu balu liubá Zípora vizita ninia família iha rai-Midian, no agora ninia aman Jetro lori fali Zípora ba ema Izraél nia hela-fatin. (Éxodo 18:1-5) Imajina toʼok neʼe halo povu kontente! Sira hakarak tebes atu hatene Maromak nia atan Moisés nia feen Zípora mak ema oinsá.

 Miriam mós sente kontente ka lae? Foufoun karik nia kontente. Maibé lakleur nia husik ninia hahalok foti an domina nia. Karik nia hanoin katak Zípora mak sei sai feto neʼebé famozu liu. Miriam no Arão hahú koʼalia negativu kona-ba Zípora. Baibain kuandu ema koʼalia negativu kona-ba ema seluk, lakleur deʼit liafuan sira bele sai makaʼas no kroʼat. Foufoun sira muramura katak Zípora mak ema Kus, a laʼós ema Izraél. Maibé ikusmai sira mós muramura kona-ba Moisés. Miriam no Arão dehan: “Jeová koʼalia liuhusi deʼit Moisés ka? Nia mós koʼalia liuhusi ita, loos ka lae?”—Números 12:1, 2.

 Liafuan neʼe hatudu sai katak Miriam no Arão haburas hanoin neʼebé perigu tebes. Sira la kontente ho dalan neʼebé Jeová uza Moisés tanba sira hakarak hetan kbiit boot liután. Sira haburas hanoin neʼe tanba Moisés mak domina duni ema seluk no buka glória ba ninia an ka lae? Moisés mós ema sala-naʼin, maibé nia laʼós ema neʼebé foti an ka domina ema seluk. Bíblia dehan: “Moisés mak ema neʼebé laran-maus liu fali ema seluk hotu iha mundu tomak.”—Números 12:2, 3.

 Derrepente deʼit, Jeová bolu Miriam no ninia alin-mane naʼin-rua ba tenda reuniaun nian. Kalohan koluna neʼebé reprezenta Jeová mak tun ba tenda reuniaun nia odamatan sorin. Tuirmai Jeová hatudu sai ninia hirus ba Miriam no Arão hodi korrije sira katak ninia relasaun ho Moisés mak úniku no nia mak hili Moisés no tau fiar boot ba Moisés. Jeová dehan: “Entaun, tanbasá mak imi la taʼuk atu koʼalia kontra haʼu-nia atan Moisés?” Miriam no Arão sente taʼuk no nakdedar. Tuir Jeová nia haree, sira-nia hahalok neʼebé la respeitu Moisés hanesan sira la respeitu Jeová rasik.—Números 12:4-8.

 Ita bele fiar katak Miriam mak komesa koʼalia kontra Moisés, tuirmai nia halo ninia alin-mane Arão mós apoia nia hodi kontra sira-nia kuñada Zípora. Tan neʼe Jeová fó kastigu ba Miriam ho moras-lepra. Moras aat neʼe halo nia isin sai “mutin hanesan jelu-rahun”. Arão husu kedas Moisés nia ajuda ho haraik an hodi Moisés bele husu Jeová atu fó perdua ba sira. Arão dehan: “Buat neʼebé ami halo ona mak beik.” Moisés neʼebé laran-maus hahú halerik ba Jeová hodi dehan: “Oh Maromak, favór ida kura nia bá!” (Números 12:9-13) Arão no Moisés nia reasaun neʼe hatudu katak sira naʼin-rua hadomi tebes sira-nia biin Miriam maski nia halo ona sala.

 Jeová hatudu laran-sadiʼa hodi kura Miriam neʼebé arrepende ninia sala. Maibé Jeová haruka Miriam atu haketak nia an ba loron hitu iha povu nia hela-fatin nia liʼur. Neʼe halo Miriam sente moe duni tanba ema Izraél hotu hatene katak Miriam hetan dixiplina husi Maromak. Maibé Miriam nia fiar mak salva nia. Miriam hatene duni katak Aman Jeová fó dixiplina ba nia tanba domin. Entaun nia halo tuir. Miriam hela ketak iha povu nia hela-fatin nia liʼur ba loron hitu, no povu sira hein iha sira-nia tenda. Liutiha loron hitu Miriam hatudu ninia fiar dala ida tan hodi sai haraik an no simu ajuda husi ema seluk atu “lori fali” nia ba povu nia hela-fatin.—Números 12:14, 15.

 Jeová fó dixiplina ba ema neʼebé nia hadomi. (Ebreu 12:5, 6) Jeová hadomi Miriam, tan neʼe korrije nia kuandu nia sai foti an. Dixiplina neʼe halo Miriam sente terus, maibé neʼe mak salva ninia moris. Tanba Miriam simu dixiplina ho haraik an, Jeová kontente fali ho nia. Miriam kontinua moris toʼo tempu neʼebé ema Izraél besik atu remata sira-nia viajen iha rai-fuik. Bainhira Miriam mate iha rai-fuik Zin iha Kades, ninia idade karik besik tinan 130. b (Números 20:1) Tinan atus ba atus liu tiha, Jeová gaba Miriam nuʼudar ema neʼebé serbí nia ho laran-metin. Liuhusi profeta Miqueias, Jeová fó-hanoin ba ninia povu: “Haʼu sosa fali imi husi uma atan nian. Haʼu haruka Moisés, Arão no Miriam ba imi.”—Miqueias 6:4.

 Ita bele aprende buat barak husi Miriam nia moris. Ita presiza proteje ema neʼebé la iha kbiit no koʼalia ho aten-brani hodi defende buat neʼebé loos, hanesan Miriam halo bainhira nia sei labarik. (Tiago 1:27) Ita ho haksolok fahe Maromak nia liafuan ba ema seluk hanesan Miriam. (Roma 10:15) Ita mós presiza hasees an husi hahalok oioin neʼebé perigu tebes hanesan laran-moras no muramura. (Provérbios 14:30) No hanesan Miriam, ita presiza simu dixiplina husi Jeová ho haraik an. (Ebreu 12:5) Ita bele banati-tuir Miriam nia fiar hodi halo buat sira-neʼe.