Tuir livru ikus husi Bíblia, 666 mak númeru, ka naran, ba animál fuik neʼebé iha ulun hitu no dikur sanulu, neʼebé sai husi tasi. (Apokalipse 13:1, 17, 18) Animál fuik neʼe reprezenta sistema polítiku iha mundu tomak, neʼebé “ukun ema husi suku, povu, língua no nasaun hotu”. (Apokalipse 13:7) Naran 666 reprezenta sistema polítiku neʼebé halo sala boot tuir Maromak nia haree. Tanbasá bele dehan hanesan neʼe?

 Neʼe laʼós deʼit naran. Naran neʼebé Maromak hili sempre iha ninia signifikadu. Porezemplu, Maromak troka mane ida naran Abram, neʼebé signifika “Aman mak iha pozisaun aas”, sai fali Abraão, neʼebé signifika “Aman ba ema-lubun”. Neʼe akontese bainhira Maromak promete katak nia sei halo Abraão sai “aman ba nasaun barak”. (Génesis 17:5, nota-rodapé) Hanesan neʼe mós, Maromak hanaran animál fuik neʼe 666 nuʼudar símbolu ba ninia hahalok.

 Neen mak númeru neʼebé fó sai kondisaun la perfeitu. Dala barak, Bíblia uza númeru nuʼudar símbolu ba buat ruma. Porezemplu, númeru hitu reprezenta kondisaun neʼebé kompletu ka perfeitu. Neen mak númeru neʼebé kuran ida husi hitu, tan neʼe bele reprezenta buat neʼebé la kompletu, ka la loos tuir Maromak nia haree, no neʼe bele iha ligasaun ho Maromak nia inimigu sira.​—1 Krónikas 20:6.

 Repete dala tolu atu tau énfaze. Dala ruma Bíblia tau énfaze ba buat ruma hodi repete dala tolu. (Apokalipse 4:8; 8:13) Tan neʼe, naran 666 tau duni énfaze katak tuir Maromak nia haree, ema nia sistema polítiku la iha susesu. Sira la iha kapasidade atu lori dame no seguransa neʼebé dura ba nafatin, tanba só Maromak nia Ukun deʼit mak bele.

Animál fuik nia marka

 Bíblia hatete katak ema simu “animál fuik nia marka” tanba sira “adora” animál fuik. (Apokalipse 13:3, 4; 16:2) Sira halo ida-neʼe hodi hahiʼi sira-nia nasaun, ninia símbolu, ka forsa militár. The Encyclopedia of Religion dehan: “Nasionalizmu sai fali hanesan relijiaun neʼebé kbiit boot iha mundu modernu neʼe.” a

 Oinsá mak ema hetan animál fuik nia marka iha sira-nia liman-loos ka reen-toos? (Apokalipse 13:16) Kona-ba ukun-fuan ba nasaun Izraél, Maromak dehan: “Kesi neʼe iha imi-nia liman nuʼudar sinál, no liafuan sira-neʼe tenke sai hanesan hena neʼebé kesi iha imi-nia reen-toos.” (Deuteronómio 11:18) Neʼe la dehan katak ema Izraél tenke kesi duni ukun-fuan iha liman ka reen-toos, maibé sira tenke halo tuir Maromak nia liafuan iha situasaun hotu no husik ida-neʼe mak dirije sira-nia hahalok no hanoin. Nuneʼe mós ho animál fuik nia marka, neʼe la dehan katak ema tau númeru neʼe nuʼudar tato, maibé neʼe refere ba ema neʼebé husik sistema polítiku atu kontrola sira-nia moris. Sira neʼebé iha animál fuik nia marka halo sira-nia an sai Maromak nia inimigu.​—Apokalipse 14:9, 10; 19:19-21.