“Alfa no Ómega” refere ba Jeová, Maromak neʼebé Kbiit Boot Liu Hotu. Fraze neʼe mosu dala tolu iha Bíblia.​—Apokalipse 1:8; 21:6; 22:13. a

 Alfa no Ómega mak letra primeiru no ikus iha alfabetu lian Gregu. Gregu mak língua neʼebé ema uza atu hakerek parte Bíblia nian neʼebé hanaran Testamentu Foun, neʼebé inklui mós livru Apokalipse. Letra Alfa no Ómega nia pozisaun iha alfabetu lian Gregu ajuda ita atu komprende katak Jeová mesak deʼit mak primeiru no ikus. (Apokalipse 21:6) Nia mak Maromak neʼebé Kbiit Boot Liu Hotu husi tempu uluk kedas, no nia sei kontinua sai nuʼudar Maromak Kbiit Boot Liu Hotu ba nafatin. Nia deʼit mak ida neʼebé “husi uluk kedas no ba nafatin”.​—Salmo 90:2.

 Iha Bíblia laran, fraze neʼe aplika ba Maromak Jeová no ninia Oan-Mane Jesus, maibé iha signifikadu neʼebé la hanesan. Haree toʼok ezemplu rua tuirmai neʼe.

•   Iha Isaias 44:6, Jeová dehan: “Haʼu mak primeiru no haʼu mak ikus. La iha Maromak seluk, só haʼu deʼit.” Iha versíkulu neʼe Jeová hatudu sai katak nia deʼit mak Maromak neʼebé loos ba nafatin, la iha Maromak seluk. (Deuteronómio 4:35, 39) Entaun iha situasaun neʼe fraze “primeiru no ikus” iha signifikadu hanesan ho “Alfa no Ómega”.

•   Liután neʼe, fraze “Primeiru [prótos, laʼós alfa] no Ikus [éskhatos, laʼós ómega]” mosu iha Apokalipse 1:17, 18 no 2:8. Kontestu ba versíkulu sira-neʼe hatudu katak versíkulu neʼe koʼalia kona-ba ida neʼebé mate no ikusmai moris-hiʼas fali. Tan neʼe, versíkulu sira-neʼe labele refere ba Maromak tanba nia nunka mate. (Habakuk 1:12) Maibé, Jesus mate no moris hiʼas fali. (Apóstolu 3:13-15) Nia mak ema primeiru neʼebé hetan moris-hiʼas iha lalehan ho isin espíritu neʼebé labele mate tan, no agora nia “moris tinan ba tinan ba nafatin”. (Apokalipse 1:18; Koloso 1:18) No tuirmai Jesus mak ida neʼebé fó moris-hiʼas ba ema. (João 6:40, 44) Entaun, nia mak ema ikus liu neʼebé Jeová rasik mak fó moris-hiʼas. (Apóstolu 10:40) Tan neʼe mak ita bele bolu Jesus nuʼudar “Primeiru no Ikus”.

 Lae. Ita ladún hatene sé mak koʼalia iha Apokalipse 22:13, no mós iha kapítulu neʼe iha ema barak mak koʼalia. Matenek-naʼin ida naran William Barclay esplika kona-ba versíkulu neʼe hodi dehan: “Buat sira-neʼe hakerek la tuituir malu; . . . no dala barak susar atu hatene sé loos mak koʼalia.” (The Revelation of John, Volume 2, Revised Edition, pájina 223) Tan neʼe, “Alfa no Ómega” iha Apokalipse 22:13 bele refere ba Maromak Jeová neʼebé simu títulu hanesan neʼe iha fatin seluk iha livru Apokalipse.