Bíblia hanorin katak husi kriatura hotu neʼebé moris iha rai, só ema uitoan deʼit mak sei bá lalehan. (Apokalipse 14:1, 3) Sira sei ukun nuʼudar liurai no amlulik hamutuk ho Jesus iha lalehan. (Lucas 22:28-30; Apokalipse 5:9, 10) Maibé ema barak sei hetan moris-hiʼas iha paraízu iha rai.​—Salmo 37:11, 29.

 Bíblia nunka temi kona-ba animál sira sei moris iha lalehan. Animál nunka bele kumpre kritériu hanesan ema neʼebé ‘Maromak bolu atu bá lalehan’. (Ebreu 3:1) Kritériu sira-neʼe inklui hatene didiʼak kona-ba Maromak, hatudu fiar no halo tuir Maromak nia mandamentu sira. (Mateus 19:17; João 3:16; 17:3) Só ema deʼit mak Maromak kria ho objetivu atu bele moris ba nafatin.​—Génesis 2:16, 17; 3:22, 23.

 Atu bele bá lalehan, ema tenke hetan moris-hiʼas. (1 Korinto 15:42) Bíblia temi kona-ba moris-hiʼas balu. (1 Reis 17:17-24; 2 Reis 4:32-37; 13:20, 21; Lucas 7:11-15; 8:41, 42, 49-56; João 11:38-44; Apóstolu 9:36-42; 20:7-12) Maibé, moris-hiʼas neʼebé Bíblia temi envolve deʼit ema, laʼós animál.

•  Saida mak akontese kuandu animál sira mate?

•  Animál sira iha sala ka lae?

•  Ita bele haterus animál sira ka lae?

 Bíblia hanorin katak animál sira no ema mak kriatura neʼebé moris. Tan neʼe Maromak haree animál nia moris no ema nia moris hanesan deʼit. Animál sira no ema mai husi “rai-rahun” no mós “iis moris nian”. (Génesis 1:24; 2:7, 19, nota-rodapé) Bíblia mós hanorin katak animál no ema bele mate. (Levítico 21:11, nota-rodapé; Ezequiel 18:20) Animál no mós ema fila fali ba rai-rahun bainhira sira mate. (Eclesiastes 3:19, 20) Neʼe katak sira la iha tan. a

 Lae. Sala mak hahalok, sentimentu, ka hanoin ruma neʼebé kontra Maromak nia matadalan. Atu bele halo sala, kriatura ida tenke iha abilidade atu foti desizaun kona-ba buat morál nian, maibé animál sira la iha kbiit atu halo nuneʼe. Baibain sira halo buat ruma tuir deʼit sira-nia instintu. (2 Pedro 2:12) Maski sira la halo sala, sira mós ikusmai mate.

  Lae. Maski Maromak fó kbiit ba ema atu domina animál sira maibé nia la fó lisensa atu halo aat ba animál sira. (Génesis 1:28; Salmo 8:6-8) Maromak hanoin kona-ba animál ida-idak, inklui mós manu sira neʼebé kiʼik tebes. (Jonas 4:11; Mateus 10:29) Nia haruka ninia povu atu trata animál sira iha dalan neʼebé diʼak.​—Éxodo 23:12; Deuteronómio 25:4; Provérbios 12:10.