Livru Apokalipse esplika kona-ba “feto ida” nuʼudar “feto-aat neʼebé naran boot” no nia iha naran “segredu: ‘Babilónia Boot’”. (Apokalipse 17:1, 3, 5) Feto neʼe reprezenta relijiaun falsu hotu iha mundu, neʼebé “troka lia-loos kona-ba Maromak ho lia-bosok”. a (Roma 1:25) Maski relijiaun sira-neʼe iha buat barak mak la hanesan, maibé sira hotu halo ema dook husi Maromak neʼebé loos, Jeová.​—Deuteronómio 4:35.

Pontu sira neʼebé ajuda ita hatene saida mak Babilónia Boot

1.   Babilónia Boot mak símbolu ida. Livru Apokalipse nakonu ho “sinál oioin”, tan neʼe, ita bele fiar katak Babilónia Boot mós símbolu deʼit, laʼós feto neʼebé tebes. (Apokalipse 1:1) Apokalipse mós dehan katak feto neʼe “tuur iha bee barak nia leten”, bee reprezenta “povu sira, ema-lubun sira, nasaun sira no ema husi língua oioin”. (Apokalipse 17:1, 15) Feto neʼebé tebes labele halo buat sira-neʼe.

2.   Babilónia Boot reprezenta organizasaun mundiál. Nia mós bolu nuʼudar “sidade boot neʼebé ukun liurai sira iha mundu”. (Apokalipse 17:18) Tan neʼe, Babilónia Boot iha influénsia boot iha mundu tomak.

3.   Babilónia Boot mak organizasaun relijiaun nian, laʼós polítiku ka negósiu. Babilónia antigu mak sidade relijiaun ida neʼebé iha naran boot kona-ba uza “ai-moruk fekit” no “hahalok matan-dook” oioin. (Isaias 47:1, 12, 13; Jeremias 50:1, 2, 38) Ema iha sidade neʼe halaʼo adorasaun falsu neʼebé kontra Maromak neʼebé loos, Jeová. (Génesis 10:8, 9; 11:2-4, 8) Ukun-naʼin sira iha Babilónia halo sira-nia an aas liu fali Jeová no la hafolin adorasaun ba Jeová. (Isaias 14:4, 13, 14; Daniel 5:2-4, 23) Hanesan neʼe mós ho Babilónia Boot, nia iha naran boot kona-ba “hahalok espiritizmu”. Ida-neʼe hatudu duni katak Babilónia Boot mak organizasaun relijiaun nian.​—Apokalipse 18:23.

    Babilónia Boot laʼós organizasaun polítiku nian tanba Bíblia hatete katak “liurai sira iha mundu” tanis no triste bainhira nia lakon. (Apokalipse 17:1, 2; 18:9) Nia mós laʼós organizasaun negósiu nian tanba Bíblia hatudu katak nia ketak husi “negósiu-naʼin sira iha mundu”.​—Apokalipse 18:11, 15.

Photograph taken by courtesy of the British Museum

4.   Babilónia Boot merese duni sai nuʼudar símbolu ba relijiaun falsu. Duké hanorin ema atu hakbesik liután ba Maromak neʼebé loos, Jeová, relijiaun falsu lori ema atu adora fali maromak sira seluk. Bíblia bolu neʼe mak hahalok prostituisaun iha dalan espirituál. (Levítico 20:6, nota; Éxodo 34:15, 16, nota) Relijiaun falsu barak kontinua hanorin Babilónia antigu nia fiar, inklui kona-ba trindade, ema mate nia klamar no uza estátua iha adorasaun. Relijiaun sira-neʼe mós kahur sira-nia adorasaun ho mundu nia hahalok oioin. Bíblia hatudu katak hahalok la laran-metin neʼe mak hanesan halo sala adultériu iha dalan espirituál.​—Tiago 4:4, nota.

    Relijiaun falsu sira-nia rikusoin no sira-nia loko an kona-ba riku, hanesan loos ho Bíblia nia esplikasaun katak Babilónia Boot “hatais hena kór-violeta no mean” no “hafurak ninia an ho osan-mean, fatuk-murak neʼebé folin-boot no pérola”. (Apokalipse 17:4) Babilónia Boot mak hun ba “buat foʼer hotu iha rai”, ka ba hanorin no hahalok sira neʼebé la hatudu respeitu ba Maromak. (Apokalipse 17:5) Relijiaun falsu nia membru mak “povu sira, ema-lubun sira, nasaun sira no ema husi língua oioin” neʼebé apoia Babilónia Boot.​—Apokalipse 17:15.

 Babilónia Boot lori todan kona-ba “sira hotu neʼebé ema oho tiha iha mundu”. (Apokalipse 18:24) Iha ema nia istória, relijiaun falsu laʼós deʼit hamosu funu no terrorizmu, maibé sira mós la hanorin lia-loos ba ema kona-ba Jeová, Maromak neʼebé domin. (1 João 4:8) Tanba la hanorin ema kona-ba neʼe mak ema oho malu.

 Iha Maromak nia haree, Babilónia Boot nia “sala sira sai barak tebes toʼo lalehan”. (Apokalipse 18:4, 5) Maromak hirus ho relijiaun falsu sira tanba hanorin buat neʼebé la loos kona-ba nia no trata ema iha dalan neʼebé aat.

 Bíblia dehan katak “Maromak tesi-lia ona” ba Babilónia Boot. (Apokalipse 18:20) Hodi uza liafuan simbóliku, Bíblia fó sai nanis katak Maromak sei halakon relijiaun falsu hotu. (Apokalipse18:8) Maromak sei book animál fuik kór-mean neʼebé reprezenta buat polítiku neʼebé forsa boot atu kontra relijiaun falsu no halakon sira hotu. (Apokalipse 17:16, 17) “Iha dalan hanesan neʼe mak sidade boot Babilónia sei soe tun tiha ho lalais, no ema sei nunka hetan fali nia.” (Apokalipse 18:21) Tan razaun neʼe, ema neʼebé hakarak atu halo kontente Maromak tenkesér “sai husi sira-nia leet”, haketak sira-nia an husi relijiaun falsu.—2 Korinto 6:14-17.