Maromak la hamosu dezastre naturais neʼebé akontese ohin loron, maibé Maromak hanoin ema sira neʼebé sai vítima tanba dezastre naturais. Maromak nia Ukun sei halakon buat hotu neʼebé halo ema terus, inklui dezastre naturais. Agora daudaun, Maromak fó kmaan ba sira neʼebé sai vítima tanba dezastre naturais.​—2 Korinto 1:3.

•  Tanbasá ita bele fiar katak dezastre naturais laʼós kastigu husi Maromak?

•  Dezastre naturais mak sinál katak loron ikus besik ona ka lae?

•  Iha dalan oinsá mak Maromak ajuda vítima husi dezastre naturais?

•  Bíblia bele ajuda ita atu prepara an antes dezastre naturais mosu ka lae?

•  Eskritura sira atu fó kmaan ba vítima husi dezastre naturais

 Dezastre naturais la hanesan duni ho forsa natureza neʼebé Jeová uza no hakerek iha Bíblia.

•   Dezastre naturais oho no hakanek ema oioin. Maibé Maromak nia kastigu neʼebé hakerek iha Bíblia kona deʼit ema aat. Porezemplu, bainhira Maromak halakon sidade Sodoma no Gomorra iha tempu uluk, Maromak salva mane diʼak ida naran Lot hamutuk ho ninia oan-feto rua. (Génesis 19:29, 30) Maromak bele haree ema ida-idak nia laran, no nia halakon deʼit ema aat sira.​—Génesis 18:23-32; 1 Samuel 16:7.

•   Baibain dezastre naturais akontese derrepente deʼit. Antes Maromak uza forsa natureza atu fó kastigu ba ema, nia fó avizu uluk ba sira. Ema neʼebé rona no troka sira-nia hahalok bele sees husi kastigu.​—Génesis 7:1-5; Mateus 24:38, 39.

•   Loloos, ema mós hola parte atu hamosu dezastre naturais. Oinsá? Hodi estraga ambiente no harii buat oioin iha área neʼebé kona rai-nakdoko, rai-nabeen, temperatura makaʼas. (Apokalipse 11:18) Tan neʼe, bainhira ema terus tanba sira-nia desizaun rasik, sira labele fó sala ba Maromak.​—Provérbios 19:3.

 Sin, profesia sira iha Bíblia fó sai katak sei mosu dezastre oioin durante “mundu neʼe nia rohan” ka “loron ikus sira”. (Mateus 24:3; 2 Timóteo 3:1) Porezemplu, kona-ba ita-nia tempu, Jesus hatete: “Rai-hamlaha no rai-nakdoko sei mosu iha fatin oioin.” (Mateus 24:7) Lakleur tan, Maromak sei halakon buat hotu neʼebé hamosu terus oioin, inklui dezastre naturais.​—Apokalipse 21:​3, 4.

•   Maromak fó kmaan ba vítima sira liuhusi ninia Liafuan Bíblia. Bíblia hatete katak Maromak hanoin ita no nia sente triste bainhira ita hetan terus. (Isaias 63:9; 1 Pedro 5:6, 7) Bíblia mós fó sai Maromak nia promesa kona-ba tempu neʼebé dezastre naturais sei nunka akontese tan.​—Haree “ Eskritura sira atu fó kmaan ba vítima husi dezastre naturais”.

•   Maromak ajuda vítima sira hodi uza ninia povu. Maromak uza ninia povu iha mundu atu banati-tuir Jesus nia ezemplu. Bíblia fó sai nanis ona katak Jesus sei fó kmaan ba “ema neʼebé laran-kanek” no “ema hotu neʼebé triste”. (Isaias 61:1, 2) Maromak nia povu hakaʼas an atu halo buat neʼebé hanesan.​—João 13:15.

   Maromak mós uza ninia povu atu fó ajuda iha dalan fíziku ba vítima dezastre naturais.​—Apóstolu 11:28-30; Galásia 6:10.

 Sin bele. Maski Bíblia laʼós livru kona-ba dezastre naturais, maibé Bíblia nia matadalan bele ajuda duni ita. Porezemplu:

•   Halo planu kona-ba buat neʼebé ita sei halo bainhira dezastre akontese. Bíblia hatete: “Ema neʼebé matenek haree perigu no subar nia an.” (Provérbios 22:3) Matenek atu halo planu antes dezastre mosu. Karik planu neʼe inklui prepara pasta emerjénsia no mós halo treinu kona-ba hasoru malu iha neʼebé bainhira dezastre akontese.

•   Hafolin liu moris duké rikusoin. Bíblia hatete: “Ita la lori buat ida mai mundu neʼe, no ita mós labele lori sai buat ida husi mundu neʼe.” (1 Timóteo 6:7, 8) Ita presiza prontu atu husik ita-nia uma no sasán bainhira salva ita-nia an husi dezastre. Ita presiza hanoin-hetan katak ita-nia moris mak importante liu fali sasán no rikusoin.​—Mateus 6:25.