Buat barak neʼebé ema halo iha selebrasaun Páskua (Easter) laʼós mai husi Bíblia. Se Ita aprende kona-ba istória, Ita bele hatene katak selebrasaun Páskua liga ho tradisaun antigu ida neʼebé iha rituál kona-ba reprodusaun. Haree toʼok buat balu tuirmai neʼe.

1.   Naran: Iha lian Inglés, Páskua mak Easter. Livru Encyclopædia Britannica hatete: “Ita la hatene ho loloos liafuan Easter mai husi neʼebé. Maizumenus iha tinan 700 EC, amlulik Venerable Bede foti liafuan neʼe husi ema anglo-saksaun nia maromak-feto primaveira naran Eostre.” Ema balu hanoin katak liafuan neʼe husi maromak-feto reprodusaun nian husi Fenísia naran Astarte, ka maromak-feto Istar husi Babilónia.

2.   Koellu: Neʼe símbolu ba reprodusaun neʼebé “mai husi rituál antigu no símbolu husi Europa no Médiu Oriente nia festa iha tempu primaveira”.​—Encyclopædia Britannica.

3.   Manu-tolun: Tuir livru Funk & Wagnalls Standard Dictionary of Folklore, Mythology and Legend, halimar ida hodi buka manu-tolun, neʼebé baibain koellu Páskua nian mak lori, “laʼós labarik sira-nia halimar deʼit maibé neʼe mai husi rituál antigu kona-ba reprodusaun”. Iha kultura balu, ema fiar katak manu-tolun Páskua nian “bele lori kontente, moris diʼak, saudavel, no seguru”.​—Traditional Festivals.

4.   Uza roupa foun: “Se ema hakbesik maromak-feto primaveira Eskandinávia nian, ka Eastre hodi la uza roupa foun, neʼe la hatudu respeitu no sei lori azár.”—The Giant Book of Superstitions.

5.   Adorasaun iha tempu loro-matan saʼe: Toman neʼe iha ligasaun ho rituál antigu atu adora loro-matan “iha tempu neʼebé oras loron no oras kalan sai hanesan no fó benvindu ba loro-matan ho ninia forsa boot neʼebé fó moris foun ba kriatura hotu”.—Celebrations—The Complete Book of American Holidays.

 Kona-ba Easter nia hun, The American Book of Days hatete: “Klaru katak igreja iha tempu uluk kahur ema jentiu sira-nia kostume ho hanorin Kristaun nian.”

 Bíblia fó avizu makaʼas ba ema neʼebé kahur adorasaun ba Maromak ho tradisaun no toman sira neʼebé Maromak la gosta. (Marcos 7:6-8) Segundu Korinto 6:17 hatete: “‘Haketak imi-nia an’, Jeová dehan, ‘no keta kona buat neʼebé la moos’.” Páskua ka Easter mak loron-boot jentiu nian, no ema neʼebé hakarak halo kontente Maromak presiza hasees an husi selebrasaun hanesan neʼe.