Maski ema ida bele hanoin katak nia iha direitu atu selu aat ho aat, maibé halo nuneʼe mak kontra Bíblia nia konsellu neʼebé dehan: “Keta hatete: ‘Haʼu sei halo ba nia hanesan nia halo ona ba haʼu; no haʼu sei selu fali buat neʼebé nia halo ona ba haʼu.’” (Provérbios 24:29) Bíblia nia matadalan sira ajuda ona ema barak atu la hanoin tan kona-ba selu aat ho aat.

Iha informasaun neʼe

•  Tanbasá sala atu selu aat ho aat?

•  Saida mak Maromak sei halo ba ema neʼebé halo aat ba ema seluk?

•  Oinsá mak haʼu bele halakon haʼu-nia hakarak atu selu aat ho aat?

•  Hanoin neʼebé sala kona-ba selu aat ho aat

 Se ema ida hakanek Ita-nia laran ka halo aat ba Ita, klaru Ita sei sente duni hirus no hakarak ema neʼe hetan kastigu tuir buat neʼebé nia halo. Maibé, atu selu aat ho aat mak kontra Bíblia nia hanorin. Tanbasá?

 Maromak la kontente kuandu ema koko atu selu aat ba ema neʼebé halo aat ba sira. Iha Bíblia, Maromak Jeová a dehan: “Haʼu mak iha direitu atu selu fali; haʼu sei selu fali sira-nia hahalok aat.” (Roma 12:19) Bíblia anima ita atu hakaʼas an hodi rezolve problema ho dame duké selu aat ba ema neʼebé halo aat mai ita. (Roma 12:18) Maibé oinsá se la iha dalan atu rezolve problema, ka ita la hetan susesu maski halo ona buat hotu neʼebé ita bele atu hadame malu? Bíblia hatete ita tenke tau fiar ba Jeová atu rezolve problema hotu iha tempu neʼebé loos.​—Salmo 42:10, 11.

 Agora daudaun, Maromak husik autoridade sira atu fó kastigu ba ema neʼebé halo buat aat. (Roma 13:1-4) Iha futuru, Maromak sei tesi-lia ba ema hotu neʼebé halo aat ba ema seluk, no nia sei halakon terus ba nafatin.—Isaias 11:4.

•   Keta halo buat ruma kuandu ita hirus hela. (Provérbios 17:27) Dala barak ema neʼebé halo buat ruma kuandu hirus hela ikusmai arrepende an kona-ba buat neʼebé nia halo. Maibé ema neʼebé hanoin uluk antes halo buat ruma, baibain halo desizaun neʼebé diʼak liu.—Provérbios 29:11.

•   Buka-hatene faktu. (Provérbios 18:13) Se ema ruma halo buat neʼebé la diʼak ba ita, koko hanoin toʼok: ‘Iha ka lae buat ruma neʼebé haʼu la hatene, neʼebé halo nia hatudu hahalok hanesan neʼe? Porezemplu, karik nia estrese hela ho buat ruma? Ka, nia la hatene katak ninia hahalok neʼe hakanek ema seluk?’ Dala ruma, ita sente katak ema hakanek ita ho neon, maibé tuir loloos lae.

 Hanoin neʼebé sala: Tanba Bíblia la fó lisensa atu selu aat ho aat, neʼe katak ita labele defende an se ema ataka ita.

 Faktu: Se ema ataka ita, ita iha direitu atu defende an ka buka ajuda husi autoridade sira. Maibé, Bíblia anima ita atu hasees an husi violénsia se bele.—Provérbios 17:14.