Lae. Bíblia la temi liafuan “purgatóriu”, no mós la hanorin katak bainhira ema ida mate, ninia klamar sei hamoos iha purgatóriu. a Haree toʼok buat neʼebé Bíblia hanorin kona-ba sala no mate no oinsá mak Bíblia nia hanorin kontra malu ho doutrina kona-ba purgatóriu.

•   Fiar ba Jesus nia raan mak hamoos ema nia sala, laʼós iha purgatóriu hanesan ema balu fiar. Bíblia hatete katak “[Maromak nia] Oan-Mane Jesus nia raan bele hamoos ita-nia sala hotu” no “Jesus Kristu . . . halo ita livre husi ita-nia sala liuhusi ninia raan”. (1 João 1:7; Apokalipse 1:5) Jesus fó “ninia moris hodi sosa fali ema barak” no kasu ema nia sala.​—Mateus 20:28.

•   Ema neʼebé mate ona la hatene buat ida. “Ema neʼebé moris hela hatene katak sira sei mate, maibé ema neʼebé mate ona la hatene buat ida.” (Eclesiastes 9:5) Ema neʼebé mate ona la sente buat ida, tan neʼe labele hamoos sira-nia an husi ahi purgatóriu nian.

•   Depois ema ida mate tiha, nia la hetan kastigu ba ninia sala. Bíblia hatete katak “sala nia kolen mak mate” no “ema mate ida hetan ona perdua ba nia sala”. (Roma 6:7, 23, Liafuan diak ba imi, segunda edisaun) Mate mak kastigu husi sala, no kuandu ema ida mate, nia simu kompletu ona sala nia kolen.