Bíblia la koʼalia espesífiku kona-ba eutanázia. a Maibé, Bíblia nia esplikasaun kona-ba moris no mate bele ajuda ita iha hanoin neʼebé loos kona-ba ida-neʼe. Ita labele halo ema seluk mate. Maibé se ema ida moras todan no besik atu mate, ita la presiza hakaʼas an atu hanaruk ninia moris.

 Bíblia hatete katak Maromak mak Kriadór no “hun ba moris”. (Salmo 36:9; Apóstolu 17:28) Tuir Maromak nia haree, moris mak folin-boot tebes. Tan razaun neʼe mak Maromak bandu ita atu labele oho ema seluk ka oho ita-nia an rasik. (Éxodo 20:13; 1 João 3:15) Liután neʼe, Bíblia haruka ita atu hakaʼas an proteje ita-nia moris no mós ema seluk nian. (Deuteronómio 22:8) Klaru katak Maromak hakarak ita atu hafolin moris.

Oinsá se ema ida moras todan no besik atu mate?

 Bíblia la fó lisensa ba ema atu hakotu ema seluk nia moris maski ema neʼe besik atu mate. Hanoin toʼok ezemplu ida husi Liurai Izraél naran Saul. Bainhira Saul kanek todan iha funu laran no besik atu mate, nia husu ninia atan ida atu hakotu ninia moris. (1 Samuel 31:3, 4) Atan neʼe lakohi. Maibé depois neʼe, iha mane seluk neʼebé hatete katak nia halo duni buat neʼebé Saul haruka. Kuandu rona ida-neʼe David fó sai katak mane neʼe halo ona sala tanba oho Saul. David nia hahalok neʼe haleno Jeová nia hanoin.​—2 Samuel 1:6-16.

Ita presiza hakaʼas an makaʼas atu hanaruk moris ka lae?

 Bíblia la haruka ita atu hanaruk ema nia moris se nia besik atu mate. Tuir loloos, Bíblia fó esplikasaun neʼebé diʼak. Mate mak ita-nia inimigu no ita ema mate tanba ita mak sala-naʼin. (Roma 5:12; 1 Korinto 15:26) Maibé, ita la presiza taʼuk mate tanba Maromak promete atu fó moris-hiʼas ba ema sira neʼebé mate ona. (João 6:39, 40) Ema neʼebé hafolin moris sei buka tratamentu médiku neʼebé diʼak liu. Maibé neʼe la dehan katak ita presiza hili tratamentu ruma atu hanaruk ita-nia moris se ita besik ona atu mate.

Oho an mak sala neʼebé nunka bele hetan perdua ka lae?

 Lae, Bíblia la temi oho an nuʼudar sala neʼebé labele hetan perdua. Maski nuneʼe oho an mak sala neʼebé sériu, b Maromak komprende katak razaun sira hanesan moras mentál, estrese, ka jerasaun bele book ema oho an. (Salmo 103:13, 14) Liuhusi Bíblia, Maromak fó kmaan ba ema sira neʼebé hasoru situasaun estrese. Liután neʼe, Bíblia hatete katak sei iha “moris-hiʼas ba ema neʼebé hatudu hahalok loos no mós ema neʼebé hatudu hahalok la loos”. (Apóstolu 24:15) Ida-neʼe hatudu katak ema neʼebé halo sala sériu, hanesan oho an mós iha esperansa atu moris-hiʼas.