Bíblia la temi kona-ba Halloween, neʼebé ema barak selebra iha 31 Outubru tinan-tinan. Maski nuneʼe, Halloween nia hun no ninia tradisaun kontra buat neʼebé Bíblia hanorin.

Iha informasaun neʼe

•  Halloween nia istória no tradisaun

•  Importante atu buka-hatene Halloween nia hun ka lae?

•  Tanbasá hanaran Halloween?

•   Samhain: Halloween nia hun liga ho Samhain. Livru The World Book Encyclopedia hatete: “Samhain mak relijiaun falsu nia festa neʼebé ema Selta sira mak selebra tinan 2.000 liubá. Ema Selta fiar katak ema neʼebé mate ona bele laʼo iha ema moris nia leet iha tempu neʼe. Durante Samhain, ema neʼebé moris bele vizita ema neʼebé mate ona.”—Haree “ Tanbasá hanaran Halloween?”

•   Halloween nia kostum, rebusadu, no husu dose: Tuir livru ida, ema Selta balu tau kostum neʼebé hanesan buan sira atu espíritu sira bele “hanoin katak sira mós maluk” no la halo aat ba sira. Iha mós ema neʼebé oferese buat midar ba espíritu sira atu sira la hirus ka la lori perigu ba ema. a

   Iha tinan 500 toʼo 1500 nia laran, ulun-naʼin Katólika iha Europa komesa simu kostume jentiu neʼe no haruka sira-nia membru iha igreja hatais kostum hodi tama uma sai uma no husu prezente kiʼik.

•   Klamar, vampir, ema neʼebé sai asu-lobu, buan, no zombi: Ba tempu kleur ona ema temi buat sira-neʼe hodi liga ho espíritu aat no demóniu sira. Livru Halloween Trivia hatete katak kriatura sira-neʼe mak monster neʼebé la hanesan baibain no “iha ligasaun ho mate, matebian ka taʼuk mate”.

•   Halloween nia lakeru: Iha tinan 500 toʼo 1500 nia laran, ema iha Bretaña “bá ema ida-idak nia uma no hatete katak sira sei halo orasaun ba matebian se uma-naʼin fó ai-han ba sira” no sira lori “nabu neʼebé bahat no sunu lilin iha laran hodi reprezenta klamar sira neʼebé sulan hela iha purgatóriu”. (Halloween—From Pagan Ritual to Party Night) Matenek-naʼin balu hatete katak ema uza ahi-oan atu espíritu aat labele hakbesik ba sira. Maizumenus tinan 200 liubá, ema iha Amérika Norte komesa uza lakeru hodi troka nabu tanba sira iha lakeru barak no fasil atu bahat no halo kuak.

 Sin. Ema barak hanoin katak Halloween mak hanesan selebrasaun ida neʼebé la lori perigu. Maibé buat neʼebé ema halo iha selebrasaun Halloween mak kontra duni buat neʼebé Bíblia hanorin. Halloween bazeia ba hanorin falsu kona-ba ema mate no espíritu ka demóniu sira.

 Haree toʼok eskritura sira tuirmai neʼebé hatudu oinsá Maromak nia haree ba ema nia fiar neʼebé liga ho Halloween:

•   “Imi la bele hetan ema ida nebee. . . liga ba ema mate, mate klamar ka matebian.”—Deuteronómio 18:10-12, Bíblia Kadi Kapasidade.

   Neʼe katak: Maromak la simu ema neʼebé koko atu kontaktu ho ema mate ka finje atu komunika ho ema neʼebé mate ona.

•   “Ema neʼebé mate ona la hatene buat ida.”—Eclesiastes 9:5.

   Neʼe katak: Tanba ema mate la hatene buat ida, sira labele komunika ho ema neʼebé moris hela.

•   “Haʼu lakohi katak imi hola parte iha diabu. Imi la bele halo parte housi Naʼi nia meja no mos housi diabu sira nia meja.”—1 Korinto 10:20, 21, Liafuan diak ba imi, segunda edisaun.

   Neʼe katak: Ema neʼebé hakarak halo kontente Maromak labele iha ligasaun ho diabu ka demóniu sira.

•   “Hamriik metin hodi kontra Diabu nia lasu sira, tanba ita halo funu . . . kontra anju aat sira.”—Éfeso 6:11, 12.

   Neʼe katak: Ema Kristaun presiza luta hasoru anju aat sira, no labele finje atu selebra hamutuk ho sira.