Adão no Eva mak ema primeiru neʼebé halo sala. Bainhira sira kontra Maromak hodi han husi “ai-hun neʼebé hanaran nuʼudar ai-hun koñesimentu kona-ba buat diʼak no aat,” sira halo sala. a (Génesis 2:16, 17; 3:6; Roma 5:19) Maromak bandu Adão no Eva atu labele han husi ai-hun neʼe tanba neʼe reprezenta Maromak nia autoridade, ka direitu atu deside saida mak loos ka sala ba ema. Hodi han husi ai-hun neʼe, Adão no Eva kontra Maromak nia autoridade, no foti desizaun rasik kona-ba saida mak loos no sala. Kuandu sira halo ida-neʼe, sira hatudu katak sira la simu Maromak nia autoridade.

•  Oinsá mak sala kona Adão no Eva?

•  Oinsá mak Adão no Eva nia sala kona ita?

•  Ita bele sai livre husi rezultadu aat husi Adão no Eva nia sala ka lae?

•  Hanoin neʼebé la loos kona-ba Adão no Eva nia sala

 Tanba sira halo sala, Adão no Eva sai ferik-katuas no ikusmai mate. Sira estraga sira-nia relasaun ho Maromak no lakon esperansa atu moris ba nafatin ho saúde neʼebé perfeitu.—Génesis 3:19.

 Adão ho Eva hatutan sala ba sira-nia oan no bei-oan hotu. Ida-neʼe hanesan dalan neʼebé inan-aman bele hatutan moras ba sira-nia oan. (Roma 5:12) Tan neʼe, ema hotu moris mai “ho sala,” b entaun ita la perfeitu no fasil ba ita atu halo sala.—Salmo 51:5; Éfeso 2:3.

 Sira hatutan sala ba ita hotu, no tan neʼe ita sai moras, ferik-katuas no mate. (Roma 6:23) Ita mós hetan susar husi konsekuénsia aat husi ita no ema seluk nia sala.—Eclesiastes 8:9; Tiago 3:2.

 Bele. Bíblia dehan katak Jesus mate hodi halo “sakrifísiu atu bele hamoos ita-nia sala”. (1 João 4:10, nota-rodapé) Jesus nia sakrifísiu bele halo ita livre husi rezultadu aat husi sala no loke dalan ba ita atu hetan esperansa neʼebé Adão no Eva lakon, neʼe mak moris rohan-laek no saúde perfeitu.—João 3:16. c

 Hanoin neʼebé sala: Ita sei nunka hetan relasaun diʼak ho Maromak tanba Adão no Eva nia sala.

 Hanoin neʼebé loos: Maromak la duun ita ba Adão no Eva nia sala. Maromak komprende katak ita mak ema sala-naʼin no hatene ita-nia limitadu. (Salmo 103:14) Maski ita hasoru susar husi sala, ita iha oportunidade no priviléjiu atu iha relasaun besik ho Maromak.—Provérbios 3:32.

 Hanoin neʼebé sala: Ema neʼebé hetan ona batizmu mak livre husi Adão no Eva nia sala, entaun bebé sira presiza hetan batizmu.

 Hanoin neʼebé loos: Maski batizmu mak hakat importante atu hetan salvasaun, só deʼit fiar ba Jesus nia sakrifísiu bele hamoos ita-nia sala. (1 Pedro 3:21; 1 João 1:7) Bíblia hatudu katak fiar bazeia ba koñesimentu, tan neʼe bebé sira seidauk iha fiar. Entaun, tuir Bíblia bebé sira labele hetan batizmu. Ema Kristaun iha apóstolu sira-nia tempu komprende hanorin ida-neʼe. Sira la fó batizmu ba bebé sira, maibé fó batizmu deʼit ba fiar-naʼin sira, katak “mane no feto” neʼebé hatudu ona fiar ba Maromak nia Liafuan.—Apóstolu 2:41; 8:12.

 Hanoin neʼebé sala: Maromak fó malisan ba feto sira tanba Eva mak han uluk ai-fuan neʼebé Maromak bandu.

 Hanoin neʼebé loos: Maromak la fó malisan ba feto. Maromak fó malisan ba “samea uluk nian, neʼebé hanaran Diabu no Satanás,” neʼebé tenta Eva atu halo sala. (Apokalipse 12:9; Génesis 3:14) No tuir Maromak nia hanoin, Adão mak simu responsabilidade ba sala neʼebé hatutan ba ema hotu, laʼós ninia feen.—Roma 5:12.

 Tanbasá mak Maromak dehan katak Adão sei domina ninia feen? (Génesis 3:16) Maski Maromak hatete liafuan neʼe, neʼe la hatudu katak Maromak simu hahalok neʼe. Maromak esplika deʼit rezultadu aat neʼebé sei akontese entre mane no feto tanba sira halo sala. Maromak hakarak mane atu hadomi no hatudu respeitu ba ninia feen no hatudu respeitu kleʼan ba feto hotu.—Éfeso 5:25; 1 Pedro 3:7.

 Hanoin neʼebé sala: Adão no Eva nia sala mak relasaun seksuál.

 Hanoin neʼebé loos: Adão no Eva nia sala laʼós relasaun seksuál tanba razaun sira-neʼe:

•   Maromak fó ukun-fuan ba Adão atu labele han ai-fuan husi ai-hun koñesimentu nian kona-ba buat diʼak no aat kuandu Adão mesak deʼit tanba seidauk kria ninia feen.—Génesis 2:17, 18.

•   Maromak haruka Adão no Eva atu “iha oan no sai barak bá”. (Génesis 1:28) Se Maromak haruka sira atu iha oan, maibé depois neʼe fó kastigu ba sira maski sira halo tuir ninia mandamentu, neʼe la hatudu domin.

•   Adão no Eva halo sala ketaketak. Primeiru mak Eva no depois mak ninia laʼen.—Génesis 3:6.

•   Bíblia esplika katak la sala ba feen-laʼen atu halo relasaun seksuál.—Provérbios 5:18, 19; 1 Korinto 7:3.