La iha ema ida neʼebé haree ona Maromak ho ninia matan rasik. (Éxodo 33:20; João 1:18; 1 João 4:12) Bíblia hatete katak “Maromak mak Espíritu”. Neʼe katak nia mak kriatura moris neʼebé ema labele haree ho matan.​—João 4:24; 1 Timóteo 1:17.

 Maibé anju sira bele haree Maromak tanba sira mak kriatura espíritu. (Mateus 18:10) Liután neʼe, ema balu neʼebé mate sei moris hiʼas ba lalehan ho isin espíritu no sira bele haree Maromak.​—Filipe 3:20, 21; 1 João 3:2.

 Dala barak Bíblia uza ideia kona-ba haree iha dalan simbóliku atu reprezenta koñesimentu. (Isaias 6:10; Jeremias 5:21; João 9:39-41) Tan neʼe, ohin loron ema ida bele haree Maromak liuhusi fiar hodi koñese Maromak no hafolin Maromak nia hahalok sira. (Éfeso 1:18) Bíblia esplika hakat sira oinsá ita bele haburas fiar hanesan neʼe.

•   Aprende kona-ba Maromak nia hahalok sira hanesan ninia domin, laran-luak, matenek no mós kbiit liuhusi ninia kriasaun. (Roma 1:20) Bainhira mane laran-metin ida naran Job aprende kona-ba Maromak nia kriasaun, Job sente hanesan nia haree rasik Maromak.​—Job 42:5.

•   Koñese Maromak liuhusi estuda Bíblia. Bíblia promete: “Se ó buka [Maromak], ó sei hetan nia.”​—1 Krónikas 28:9; Salmo 119:2; João 17:3.

•   Aprende kona-ba Maromak liuhusi estuda Jesus nia moris. Jesus haleno ho perfeitu ninia Aman Maromak Jeová nia hahalok, tan neʼe Jesus bele hatete: “Ema neʼebé haree ona haʼu, haree ona mós Aman.”​—João 14:9.

•   Halaʼo Ita-nia moris iha dalan neʼebé halo Maromak kontente, no Ita sei haree oinsá nia ajuda Ita. Jesus hatete: “Ksolok ba sira neʼebé laran-moos, tanba sira sei haree Maromak.” Hanesan temi ona, ema balu neʼebé halo Maromak kontente sei simu moris hiʼas ba lalehan no sei “haree Maromak” iha neʼebá.​—Mateus 5:8; Salmo 11:7.

 Iha istória iha Bíblia neʼebé haree hanesan ema haree Maromak ho sira-nia matan rasik. Maibé se ita haree didiʼak istória sira-neʼe nia kontestu ita bele haree katak Maromak uza anju atu reprezenta nia ka Maromak mosu liuhusi vizaun ruma.

 Anju sira.

Iha tempu antigu, Maromak haruka anju sira atu reprezenta nia hodi mosu ba ema no fó sai kona-ba Maromak nia naran. (Salmo 103:20) Porezemplu, loron ida Maromak koʼalia ho Moisés husi ai-hun tarak no Bíblia hatete katak “Moisés taka ninia oin tanba nia taʼuk atu haree ba Maromak loos”. (Éxodo 3:4, 6) Maibé tuir loloos, Moisés la haree Maromak. Kontestu husi eskritura neʼe hatudu katak Moisés haree “Jeová nia anju”.​—Éxodo 3:2.

 Nuneʼe mós bainhira Bíblia hatete katak Maromak “koʼalia ba Moisés oin ba oin”, neʼe katak Jeová no Moisés iha relasaun besik hodi koʼalia ba malu. (Éxodo 4:10, 11; 33:11) Tuir loloos, Moisés la haree Maromak nia oin, tanba “anju sira hatoʼo” informasaun neʼebé Moisés simu husi Maromak. (Galásia 3:19; Apóstolu 7:53) Maski nuneʼe, Moisés iha fiar neʼebé metin, tan neʼe Bíblia hatete katak nia “haree Ida neʼebé matan la haree”.​—Ebreu 11:27.

 Maromak mós koʼalia ho Abraão liuhusi anju sira. Se ita lee Bíblia lalais deʼit karik ita bele hanoin sala katak Abraão haree Maromak ho ninia matan rasik. (Génesis 18:1, 33) Maibé istória neʼe nia kontestu hatudu katak “mane naʼin-tolu” neʼebé vizita Abraão mak anju sira neʼebé Maromak haruka atu vizita Abraão. Abraão rekoñese katak anju sira-neʼe mak Maromak nia reprezentante no Abraão koʼalia ho anju sira hanesan nia koʼalia diretamente ho Jeová.​—Génesis 18:2, 3, 22, 32; 19:1.

 Vizaun sira.

Maromak mós mosu ba ema liuhusi vizaun sira, ka dezeñu neʼebé mosu iha ema nia neon. Porezemplu, bainhira Bíblia hatete katak Moisés no ema Izraél seluk “haree Izraél nia Maromak”, loloos sira “haree Maromak loos iha vizaun ida”. (Éxodo 24:9-11) Nuneʼe mós, dala ruma Bíblia hatete katak profeta sira “haree Jeová”. (Isaias 6:1; Daniel 7:9; Amós 9:1) Iha situasaun ida-idak, istória sira-nia kontestu hatudu katak ema sira-neʼe haree Maromak liuhusi vizaun, sira la haree nia ho matan.​—Isaias 1:1; Daniel 7:2; Amós 1:1.