Lae, ita labele halo ida-neʼe. Kona-ba ukun-fuan sira neʼebé Maromak fó ba nasaun Izraél, livru New Catholic Encyclopedia hatete hanesan neʼe: “Husi Bíblia ita bele haree katak, ema neʼebé halaʼo adorasaun neʼebé loos, la uza estátua iha sira-nia adorasaun.” Haree toʼok eskritura sira-neʼe husi Bíblia:

•   “Imi labele halo estátua ba imi-nia an ka halo buat naran deʼit atu reprezenta buat neʼebé iha lalehan ka iha rai ka iha bee laran. Imi labele hakruʼuk ba sira ka serbí sira, tanba haʼu, Jeová, imi-nia Maromak, mak Maromak neʼebé hakarak ema atu adora haʼu mesak deʼit.” (Éxodo 20:4, 5) Tanba Maromak hakarak ita ‘adora nia mesak deʼit’, nia lakohi ita atu adora estátua, imajen, lulik ka símbolu.

•   “Haʼu . . . la fó haʼu-nia hahiʼi ba estátua sira.” (Isaias 42:8) Maromak la simu ita-nia adorasaun neʼebé ita hasaʼe ba nia liuhusi estátua. Bainhira ema Izraél balu koko atu halo adorasaun ba nia liuhusi estátua karau-oan, Maromak dehan katak sira “halo ona hahalok neʼebé foʼer”.​—Éxodo 32:​7-9.

•   “Ita keta hanoin katak Maromak neʼe mak hanesan osan-mean, osan-mutin ka fatuk, neʼebé ema nia liman mak halo hodi tuir sira-nia hanoin.” (Apóstolu 17:29) Adorasaun neʼebé falsu baibain uza estátua “neʼebé ema nia liman mak halo”. Maibé ema Kristaun la hanesan neʼe. Sira halo tuir Bíblia nia liafuan neʼebé hatete, “ita laʼo tuir fiar, laʼós tuir buat neʼebé ita haree”.​—2 Korinto 5:7.

•   “Hadook an husi estátua.” (1 João 5:​21) Liuhusi ukun-fuan ba ema Izraél no mós ba ema Kristaun, Bíblia hatudu ho momoos katak Maromak la simu hanorin kona-ba uza estátua no símbolu ruma iha ita-nia adorasaun ba Maromak.