“Koʼalia lian husi rai oioin” refere ba milagre neʼebé akontese ba ema Kristaun iha apóstolu sira-nia tempu, sira hetan kbiit atu koʼalia língua oioin, maski seidauk aprende língua neʼe. (Apóstolu 10:46) Ema neʼebé koʼalia língua sira-neʼe komprende saida mak ema Kristaun sira hatete ba sira iha sira-nia língua. (Apóstolu 2:4-8) Ema Kristaun iha apóstolu sira-nia tempu hetan kbiit atu koʼalia iha lian oioin husi Maromak nia espíritu santu.​—Ebreu 2:4; 1 Korinto 12:4, 30.

•  Iha neʼebé no horibainhira mak milagre neʼe hahú?

•  Milagre neʼe nia objetivu mak saida?

•  Milagre neʼe kontinua ba nafatin ka lae?

•  Bainhira mak milagre neʼe para?

•  Oinsá ho ohin loron?

•  Oinsá mak ema bele hatene Kristaun neʼebé loos?

 Primeiravés milagre neʼe akontese iha Jeruzalein, iha dadeer kuandu ema Judeu selebra Festa Pentekostes iha tinan 33 Era Comum. Jesus nia dixípulu maizumenus naʼin-120 halibur hamutuk bainhira “sira hotu sai nakonu ho espíritu santu, no sira hahú koʼalia lian oioin”. (Apóstolu 1:15; 2:1-4) Ema-lubun boot “husi nasaun hotu iha mundu tomak” halibur no “sira rona dixípulu sira koʼalia iha sira ida-idak nia lian”.​—Apóstolu 2:5, 6.

1.   Atu hatudu katak Maromak apoia ema Kristaun. Iha tempu uluk, Maromak halo milagre oioin atu hatudu katak nia apoia fiar-naʼin sira hanesan Moisés. (Éxodo 4:1-9, 29-31; Números 17:10) Milagre atu koʼalia ho lian oioin mós iha objetivu hanesan. Atu hatudu katak Maromak mak apoia kongregasaun Kristaun neʼebé foin harii iha tempu neʼebá. Apóstolu Paulo hakerek: “Koʼalia língua oioin laʼós nuʼudar sinál ba fiar-naʼin, maibé ba sira neʼebé laʼós fiar-naʼin.”​—1 Korinto 14:22.

2.   Atu loke dalan ba ema Kristaun atu fó sasin ho didiʼak. Ema sira neʼebé rona ba Jesus nia dixípulu iha loron Pentekostes hatete: “Ita rona sira koʼalia iha ita-nia lian kona-ba buat furak oioin neʼebé Maromak halo.” (Apóstolu 2:11) Entaun, milagre neʼe nia objetivu seluk mak atu loke dalan ba ema Kristaun atu “fó sasin ho didiʼak” no atu “hanorin ema husi nasaun hotu atu sai [Jesus nia] dixípulu” hanesan Jesus haruka sira atu halo. (Apóstolu 10:42; Mateus 28:19) Maizumenus ema naʼin-3.000 neʼebé haree milagre neʼe no rona ba liafuan diʼak, sai Jesus nia dixípulu iha loron neʼe kedas.​—Apóstolu 2:41.

 Lae. Kbiit neʼebé mai husi espíritu santu, inklui koʼalia iha língua oioin, mak temporáriu deʼit. Bíblia fó-hatene nanis: “Se ita simu kbiit atu fó sai profesia, neʼe sei lakon; se ita simu kbiit atu koʼalia língua oioin, neʼe sei para.”​—1 Korinto 13:8.

 Iha tempu neʼebá, baibain apóstolu sira deʼit mak bele fó kbiit neʼebé mai husi espíritu santu ba ema Kristaun seluk, baibain apóstolu sira tau liman ba maluk fiar-naʼin. (Apóstolu 8:18; 10:44-46) Ita bele fiar katak ema neʼebé simu kbiit atu koʼalia língua oioin husi apóstolu sira labele fó kbiit neʼe ba ema seluk. (Apóstolu 8:5-7, 14-17) Hanoin toʼok ai-knanoik neʼe, governu bele fó kartaun kondusaun ba ema ida hodi lori karreta, maibé ema neʼe la iha direitu atu fó fali kartaun kondusaun ba ema seluk hodi lori karreta. Tan neʼe karik kbiit atu koʼalia iha língua oioin remata bainhira apóstolu sira no sira neʼebé simu kbiit neʼe husi sira mate.

 Kbiit atu koʼalia língua oioin remata maizumenus antes tinan 100 EC. Ohin loron ema labele dehan katak sira koʼalia língua oioin tanba Maromak nia forsa.

 Jesus hatete katak ita bele hatene ninia dixípulu sira liuhusi domin neʼebé la hanoin an deʼit neʼebé sira hatudu. (João 13:34, 35) Apóstolu Paulo mós hanorin katak ita bele hatene ema Kristaun loos liuhusi domin neʼebé sira hatudu. (1 Korinto 13:1, 8) Nia mós hatete katak Maromak nia espíritu santu sei book ema atu hatudu hahalok sira neʼebé mai husi espíritu santu, hahalok primeiru mak domin.​—Galásia 5:22, 23.