Sin. Bíblia mak livru antigu neʼebé hatán ba pergunta importante oioin kona-ba moris, no bele ajuda Ita atu moris kontente no sente hakmatek. Hanoin toʼok kona-ba pergunta balu.

1.   Iha Kriadór ka lae? Bíblia dehan katak Maromak mak ‘kria buat hotu’. (Apokalipse 4:11) Nuʼudar ita-nia Kriadór, nia hatene saida mak ita presiza atu moris kontente.

2.   Maromak hanoin haʼu ka lae? Tuir Bíblia, la susar ba ema atu hakbesik ba Maromak. Bíblia dehan: “Nia la dook husi ita ida-idak.” (Apóstolu 17:27) Nia interese ba Ita-nia moris no hakarak ajuda Ita atu halaʼo moris kontente.—Isaias 48:17, 18; 1 Pedro 5:7.

3.   Oinsá mak aprende kona-ba Maromak bele ajuda haʼu atu sai kontente? Maromak kria ita nuʼudar kriatura neʼebé ‘presiza ninia matadalan’, tan neʼe mak ita hakarak hatene objetivu ba ita-nia moris. (Mateus 5:3) Ita mós hakarak koñese ita-nia Kriadór no haburas relasaun diʼak ho nia. Maromak sente kontente kuandu Ita hakaʼas an atu hatene liután kona-ba nia. Bíblia dehan: “Hakbesik ba Maromak, no nia sei hakbesik ba imi.”—Tiago 4:8.

 Ema rihun ba rihun haburas ona relasaun diʼak ho Maromak no neʼe ajuda sira atu moris kontente no hakmatek. Neʼe la dehan katak kuandu Ita hatene kona-ba Maromak, Ita sei livre husi problema hotu. Maibé Bíblia fó sai Maromak nia matenek neʼebé bele ajuda Ita atu

•   Halaʼo moris família neʼebé kontente.

•   Iha relasaun diʼak ho ema seluk.

•   Tahan hasoru problema hanesan depresaun, estrese kona-ba osan, no moras todan.

 Iha relijiaun barak neʼebé uza Bíblia, maibé loloos sira la halo tuir buat neʼebé Bíblia hanorin. Relijiaun neʼebé loos kaer metin ba Bíblia nia hanorin, no ajuda Ita atu aprende liután kona-ba Maromak.